သဘၚ်ဗဂိန်တဆိပ်ကြာ သာသနာဓဇ ဓမ္မာစရိယ မကၠောန်ဗဒှ် ပ္ဍဲကဵုဍုၚ်မာန္တလေဝ်ဂှ် ခမဳသၚ်မန်တံ အာဒုၚ် ကေတ် တဆိပ်ကြာဂှ် ဒကာတံလေဝ် ဗက်အာဒုၚ်တၠုၚ်နကဵုကွဳစက်ဇၞော်ဇၞော်တံဗွဲမဂၠိုၚ်ဂၠၚ်ကီုရောၚ် ဂွံတီကေတ်ရ။

“သီုဖအိုတ်ဂှ် ဒကာမန်ပိုဲစိုပ်အာအတေံ ၜိုတ် (၁၀၀၀) ပြၚ်ၚ်ရ။ စိုပ်ဍုၚ်အၚ်ဝ (မာန္တလေဝ်) တေံဂှ် ဘာမန်ပိုဲၜိုတ်နွံ ဂွံဇူဒီုဂှ် ဒကာပ္ဍဲအၚ်ဝတေံ ညးတံဖန်ကဵုဖ်အိုတ်ရ။ တ္ၚဲကေတ်တဆိပ် (ဘွဲ့) ဂှ်တှေ် ညးတံကောံမွဲဒၞာဲ၊ ညးတံဖါပ်သၚ်မွဲ ဗ္ဂာပ်၊ ဒကာတံဂှ် ညးတံကဵုဒါန်ပုၚ်ဂွဳကဵု ဍာ်သုၚ် (ရေသန့်) ရ။ ညာတ်ဒးဂကူမန်တံ ကယျိုၚ်ဍာဲမံၚ်ဂှ် ရံၚ်စဆာဲကွေံ ကွေံ၊ တိတ်အာရေၚ်ၚ်ဂှ် ဒကာကောန်ဍုၚ်အရၚ်တံ ညာတ်ဒးတှေ် အမ်သဝ်လေဝ်” သာ်ဝွံ ညးမက္လိဂွံတဆိပ်ကြာ တၠဂုဏ်ဝိန္ဒသာရ (ကွာန်ကအ်ပလိုၚ်) ဟီုမြော်ကဵုသၞံၚ်တိုၚ်ရ။

ပၞောဝ်ကဵုခမဳသၚ်မန်တံ ကလိဂွံတဆိပ်ကြာဂှ် ခမဳသၚ်မွဲဇကုမ္ဂး နကဵုကွဳစက်ဇၞော် (မှန်လုံယာဉ်) မွဲဖ္ဍိုက် ဒကာၜိုတ် (၅၀) တၠတံကီု သၚ်လ္ၚဵုဒကာဗက်အာစဵုကဵု (၁၀၀) တၠလေဝ်နွံ၊ ညးလ္ၚဵုကဵုနကဵုကွဳစက်ဍောတ်တ်ၜါပိမ အာစိုပ်ဍုၚ်မာန္တ လေဝ်တုဲ ဒုၚ်တၠုၚ်ပ္တိုန်ဂုဏ်စရာဲအိုတ်ကီုရောၚ် ညးဆက်မြော်ထ်ၜးရ။

အသေအဟာန်ဗ္ဂိန်တဆိပ်ကြာ ဍုၚ်မာန္တလေဝ်

သဘၚ်ဗ္ဂိန်တဆိပ်ကြာဏံဝွံ ကၠောန်ဗဒှ်ဒၟံၚ်ပ္ဍဲကဵုဍုၚ်မာန္တလေဝ်ကဵု ဍုၚ်လ္ဂုၚ် မွဲဒၞာဲမွဲသၞာံရ။ သၞာံကၠောန်ဗဒှ် ပ္ဍဲကဵုဍုၚ် မာန္တလေဝ်မ္ဂး ဒၞာဲသ္ဂောံအာဗဵုလ္ၚတ်ကြေဝ်ဝေၚ် နွံမံၚ်ဗွဲမဂၠိုၚ်ကီု တၟော်ကဵုဍုၚ်လ္ဂုၚ်မ္ဂး မၞိဟ်ကေၚ်စိုပ်အောန်ကီုတုဲ မၞိဟ်အာစိုပ်ပတိုန်ဂုဏ်စရာဲဂၠိုၚ်ဒၟံၚ်ရ။

ပ္ဍဲဂၠံၚ်တရဴ စဴကၠုၚ်နူမာန္တလေဝ်ဂှ် ဒကာဘာတံ ပကောံနၚ်ကောန်ကွာန်တံတုဲ စဵုတၞုၚ်ပွိုၚ်ဍုၚ်ဇကုဂှ် ဒကာဘာကဵု သၟတ်ဝုတ်ဗၠာဲတံ ဂွံဒုၚ်တၠုၚ်တွာ်ဖျဴနၚ်စဵုကဵုကွာန် ဘာမသ္ပဒ္တဴ နကဵုကွဳစက်၊ ကွဳလိုန်ဓာတ် ပ္တဴအလာံသာသနာ၊ အလာံ ကောန်ဂကူမန်လေဝ်နွံရ။

နူပွိုၚ်ဍုၚ်ဇြပ်ဗု ဘာမုဟ်ဒဵု ကွာန်ဝါရက် တၠဂုဏ်ဝိဇယဓဇဂှ် ကလိဂွံတဆိပ်ကြာကီုတုဲ ညးမစဳဇန်ဒၟံၚ် သွက်ဂွံဒုၚ် တၠုၚ် နာဲနာၚ်ဥူ ဂှ်“ပိုဲဘိက်လဝ် ကွာန်ပွဳပွိုၚ်ပိုဲ၊ ကွာန် (ဝါရက်) ပိုဲဏံ၊ ကွာန်ဒဒန်ချေတ်၊ ဝါကလေဝ်၊ ကျာ်ပန် ဂကောံ သၟတ်တံဂှ် ပိုဲအာကောံ ပ္ဍဲဖလာတ်ကျာ်ခံက်ဂွံခံက်ကေတ် (ခပ်ရခပ်ယူ) ကွာန်လေံတက်ရ။ မၞိဟ်တံသၟးဂှ် ၜိုတ် (၁၂) ကွဳစက်၊ ကွဳစက်သံၚ်ဗံက် ကွဳစက်လကျာ်တံ နွံပၠန်၊ ပ္ဍဲကွာန်ပိုဲ သၚ်တံမွဲလှေ်လေဝ် ဟွံကေၚ်ဂွံလဝ်တှေ် ရဲ ကွာန်ဂှ် အာဒုၚ်တၠုၚ် ဇၟာပ်သ္ၚိဒှ်ဂွံဏောၚ်” သာ်ဝွံ ညးဟီုကဵုသၞံၚ်တိုၚ်ရ။

သၚ်နူကဵုတွဵုရးဍုၚ်မန်ဂှ် (၃၂) ဇကုကီု သၚ်မန်နူကဵုတွဵုရးဍုၚ်လ္ဂုၚ် မပ္တံကဵုဘာဓာတ်ပံၚ်ကောံ၊ ဘာကၟာဆီ၊ ဘာကျာ် သြဳမန်၊ ဘာဗဵုလ္ၚီတံလေဝ် အံၚ်ဇၞးလဝ်တန်ဓမ္မာစရိယ ကလိဂွံတဆိပ်ကြာကီုရ။

ပ္ဍဲကဵုဂိတုဖေဖဝ်ဝါရဳ (၁၅) ဂှ် ကၠောန်ဗဒှ်သဘၚ်ဗဂိန်တဆိပ်ကြာဂှ် သၚ်အံၚ်ဇၞးလဝ်တန်ဓမ္မာစရိယ (၁၁၇၀) ဇကုကီု ပါဠိဂုဏ်တၟေၚ် (၂) ဇကု ကီု သဳရိပဝရ (၁၀) ဇကုကီု ဗ္ဂိန်ကဵုလဝ် တဆိပ်ကြာရောၚ်။