သွက်ဂွံလုပ်ပြိုၚ် ပ္ဍဲသဘၚ်စရိုဟ်ဍာ် ဘာရာမညရဋ္ဌဗုဒ္ဓတက္ကသိုလ်ဍုၚ်မတ်မလီုဂှ် ဂိတုဖေဖဝ်ဝါရဳ (၁၈-၁၉) အခိၚ်သဝ်တ္ၚဲ (ရး၀၀) နာဍဳဂှ်မ္ဂး ရုဲစှ်အာ ညးတၠရမျာၚ်ရးမန်(၅)တၠရောၚ် ဂွံတီကေတ်ရ။
ကဏ္ဍရုဲစှ် ညးတၠရမျာၚ်ရးမန်ဏံဂှ် ကၠောန်သ္ပအာ ပ္ဍဲဘာရာမညရဋ္ဌဗုဒ္ဓတက္ကသိုလ် ဍုၚ်မတ်မလီုဂှ်ရတုဲ ပ္ဍဲကဵုညးလုပ်ပြိုၚ်သၟတ်တြုံ၊ သၟတ်ဗြဴသီုဖ်အိုတ်မၞိဟ်(၂၁)တၠဂှ် ညးတအ်ရုဲပတိတ်အာ မၞိဟ်ခိုဟ်အိုတ် (၅) တၠရောၚ် ကမ္မတဳကၠောန်ဗဒှ် ပေါဲပြိုၚ်ဒယှ်ဒွက်ဒယှ် သၟာဒယှ်ဒွက်နာဲဟံၚ်ဆာန်ဟီုရ။
“မၞိဟ်(၂၁)ဏံဂှ် ပ္ဍဲစၟတ်တ္ၚဲ(၁၈)ကဵု(၁၉)ဂှ် ပိုဲရုဲ(၅)တၠ မၞိဟ်(၅)တၠဏံ ပိုဲစုတ်ပ္ဍဲ သဘၚ်စရိုဟ်ဍာ်ဘာ ဂုဏ် အ္စာဏောၚ် ညးတၞဟ်တအ်ဂွံဆဵုညာတ်အာကီု” သာ်ဝွံ နာဲဟံၚ်ဆာန်ဟီုရ။
ညးလုပ်ပြိုၚ်(၂၁)တၠဂှ် မိသ္ဇၚ်မောဝ်၊ မာံဆာန်ဉာဏ်၊ မာံဆုတၠ၊ မိဆာန်ထဝ်သ္ဍဴ၊ မာံပေၚ်ဇဳ၊ မိဆာန်၊ မာံညဳခေတ်၊ မာံရတ်ဆာန်၊ မိဆာန်မန်၊ မာံအးဆာဲ၊ မာံအဲတၠနာဲ၊ မာံလွဳမန်၊ မာံဘိုၚ်ရီု၊ မိနဳလာမန်၊ မာံကဗျ၊ မာံအးဆာန်၊ မိမောဝ်သ္ဍဴ၊ မိရူပါရတ်၊ မာံလွဳရတ်၊ မာံမၞိက်ဆာန်၊ မိဨကရဳမန်တအ်ပါလုပ်တုဲ၊ မၞိဟ်သွက်ဂွံအခါတ်အကာဲဂှ် သၟာဒယှေ်ဒယှ် အာဲမန်၊ ဇဲမာန်၊ ဂံၚ်ဆာန်၊ အးဆာန်၊ သူရိယမာန်တအ် ပါလုပ်ဒၟံၚ်ရ။
“ပိုဲတအ်မိၚ်ပရိုၚ်ဗက်ဂှ် ဗီုဇကုကဵုဇကု လ္ၚတ်စကေတ်ရ ညးရုဲမၞိဟ်(၅)ရတှေ် ဂစာန်မံၚ်ဗီုညးကဵုညးရ ၜိုတ်ညးနွံရ ကဵုအ္စာဇၞော်ဇၞော်တအ်လေဝ် ဇကုဟွံဂွံလုပ်လဝ်တှေ် ဍေံခက်ညိ ဆအ္စာတဏံ ညးတအ် တေက်ကဵုပွိုၚ်ၜါတ္ၚဲဏံတှေ် ဍေံခိုဟ်အာညိ” သာ်ဝွံ ညးလုပ်ပြိုၚ် နူဒေသကွာန်ပ္ၚ မိဨကရဳမန် ဟီုရ။
ကဏ္ဍရုဲစှ်ညးတၠရမျာၚ်ရးမန်ဝွံ ညးတအ်ကံက်ကေတ်စရၚ် မၞိဟ်မိက်ဂွံလုပ်ပြိုၚ်တအ်ဂှ် ဂွံလၟိဟ်မၞိဟ်(၅၀) တၠရ။ စၟတ်တ္ၚဲဖေဖော်ဝါရီ (၈)ကဵု(၉)ဂှ် ပ္ဍဲမၞိဟ်(၅၀)ဏံ ညးတအ်ရုဲစှ်တိက်ကၠုၚ်(၂၁)တၠတုဲ မၞိဟ်(၂၁) ဏံဂှ်ပၠန် ပ္ဍဲစၟတ်တ္ၚဲ(၁၈)ကဵု(၁၉)ဂှ် ညးတအ်ဆက်ရုဲခ္ဍိုဟ်ပတိတ်အာလၟိဟ်(၅)တၠပၠန်ရောၚ်။ မၞိဟ်ဂွံဒုၚ်ရုဲ (၅)တၠဏံဂှ် ဂွံအခေါၚ်လုပ်ပြိုၚ်ပ္ဍဲသဘၚ်စရိုဟ်ဍာ် ဘာရာမညရဋ္ဌဗုဒ္ဓတက္ကသိုလ်မတ်မလီုဂှ်ရောၚ် ဂွံတီ ကေတ်ရ။
သဘၚ်စရိုဟ်ဍာ် ဘာရာမညရဋ္ဌဗုဒ္ဓတက္ကသိုလ်မတ်မလီုဂှ် ပ္ဍဲစၟတ်တ္ၚဲ ဖေဖော်ဝါရီ(၂၈၊ ၂၉) မတ်(၁) ဂိတုမာ်(၃၊၄)စွေက်ဂှ်သၚ်ကောံတုဲ မာ်(၅)စွေက်ဂှ် ကၠောန်အာသဘၚ်စရိုဟ်ဍာ်ဘာဂှ်ရောၚ် ဂွံတီကေတ် ရ။