ပ္ဍဲဂိတုဖေဖဝ်ဝါရဳ (၈) နူဂယး (၁၀) နာဍဳ ကၠောန်သ္ပကောံဓရီုလၟေၚ် ပထမ ကၠတ်ထဝ်တွဵုရးမန် အလန်ဒုတိယ ပ္ဍဲၝောံခန် ကၠတ်ထဝ်တွဵုရးမန် ဍုၚ်မတ်မလီုဂှ်တုဲ ပ္ဍဲကောံဓရီုဂှ်ဝွံ ဒဝ်တေန်အိ ကၠုၚ်နူဒေသမာဲ လၟိဟ် (၁) ပွိုၚ်ဍုၚ်ဇြပ်ဗုဂှ် ဂွံဒုၚ်ရုဲပ္တိုန် ဥက္ကဌကၠတ်ထဝ်တုဲ ဒှ်ကၠုၚ်ဥက္ကဌဗြဴဗြဴကၠာအိုတ် ပ္ဍဲကၠတ်ထဝ် တွဵုရးမန်ဏံ ရ။

ပ္ဍဲကောံဓရီုလၟေၚ်ပထမ တ္ၚဲကၠာအိုတ်ဂှ် ဒံက်တာအေဇြာန် နူဒေသမာဲ လၟိဟ်(၂) ပွိုၚ်ဍုၚ်ကျာ်ထဝ် သ္ပသဘာပ တိတုဲ သၟာၚ်နူရုဲပ္တိုန် ဥက္ကဌကၠတ်ထဝ်ဂှ် နဒဒှ်ဒုဥက္ကဌဂှ်လေဝ် ရုဲပ္တိုန်ဏာ ဥုမေန်န်ဥု နူဒေသမာဲ လၟိဟ် (၂) ပွိုၚ်ဍုၚ်ၜဳက္လေၚ်ရဂှ်လေဝ် ဂွံဆဵုကေတ်ရ။

“ပ္ဍဲကၠတ်ထဝ်ဂှ် အဝဵုခၞံသၞောဝ်ဥပဒေဂှ် ပၟိက်ဇၞော်အိုတ်ရ။ သွက်ဂွံမၚ်မွဲ စဵုဒၞါကဵု လမျီုသ္ၚိထာန်ပိုန်ဟာန်ဒြပ်ရတ် ညးဍုၚ်ကွာန်ဂှ် သၞောဝ်ဥပဒေ မဒှ်ဂုန်ဖဵု ညးတံဂှ်ဟေၚ် ဒးကၠောန်အာဏောၚ်၊ ပ္ဍဲကၠတ်ထဝ်ဂှ် ပရေၚ်ခၞံသၞောဝ် ဥပဒေဂှ်ရ ကၠောန်အာ ဗွဲအဓိကဏောၚ်” ရဴဝွံ ဒဝ်တေန်အိ ဥက္ကဌကၠတ်ထဝ် တွဵုရးမန်ဂှ် ဟီုရ။

ပြဟ်ဟ်ဏံ နကဵုအဆံၚ်တွဵုရး မူဂွံကၠောန်အာရောဂှ် ဟီုချိုတ်တ်ပၠိုတ်တ် ဟွံမာန်ဏီ၊ ဗွဲအပြောံ ဗွဲယေဘုယျရ ဟီုထ္ၜးမာန် ဒဝ်တေန်အိ ဂးရ။

ပ္ဍဲကောံဓရီု ကၠတ်ထဝ်တွဵုရးမန်ဝွံ ညးစၞး တိုန်ကၠုၚ် နူပေါဲရုဲမာဲ ၂၀၁၅ ဂှ် ၂၃ တၠ၊ ညးစၞး နူဒပ်ပၞာန်ဂှ် ၈ တၠ၊ ပံၚ် ဖၟိုတ် ညးစၞးကၠတ်ထဝ် တွဵုရးမန် ၃၁ တၠတံ ယဵုသစာသ္ပစၟတ်သစ္စတုဲ ရုဲပ္တိုန် ဥက္ကဌ ကေုာံ ဒုဥက္ကဌ တံရ။

ပ္ဍဲညးစၞးကၠတ်ထဝ်တွဵုရးမန် တိုန်ကၠုၚ်နူပေါဲရုဲမာဲ ၃၂ တၠဂှ် နူဗော် NLD ပါလုပ် ၁၉ တၠ၊ ဗော်ကောန် ဂကူမန် MNP ပါလုပ် ၂ တၠ၊ ဗော်ဒဳမဝ်ကရေဇြဳ အလုံရးမန် AMDP ပါလုပ် ၁ တၠ၊ ဗော်ပျဳခါၚ်ဖျဵုUSDP ပါ လုပ် ၁ တၠရ။

မာံအံၚ်မန် (ဗော်ပျဳခါၚ်ဖျဵု) ညးစၞးကၠတ်ထဝ် တွဵုရး နူဒေသမာဲလၟိဟ် (၂) ပွိုၚ်ဍုၚ်ကျာ်မြဟ်ဂှ် “ ဆန္ဒပိုဲဂှ် ဥက္ကဌ ဒုဥက္ကဌ ပ္ဍဲကၠတ်ထဝ်တွဵုရးမန်ဂှ် မိက်ဂွံကဵုဒှ် ကောန်ဂကူမန်ပိုဲရ။ ဆ္ဂး ညးစၞးဗော်မန်ဂှ် အောန်လောန်အာ ဆၜိုတ်ခက်ဓဝ်ရတှေ် သ္ဇက်ပဟွံမွဲ။ ပၟိက်အဲဂှ် မွဲမွဲတလ ဒၞါဲဒုဥက္ကဌ ဒှ်ဒှ် ယဝ်ဒှ်နူညးစၞးမန်ပိုဲတှေ် မုညးဍုၚ် ကွာန်တံ မိက်ဂွံဒှ်ရောဂှ် တီဂၠိုၚ်ညိဏောၚ်၊ အကာဲအရာလၟုဟ်ဂှ် မၞိဟ်ဍေံကဵုဍေံရ တိုန်ဒှ်တှေ် သ္ဇက်ဟီုဟွံမွဲ။ ယဝ်ပိုဲပ္တိုန်လေဝ် ဂွံမာန်ဟွံသေၚ်။ ပံၚ်သီုဖၟိုတ်မှ ပ္ဍဲကၠတ်ထဝ်ဏံ ကောန်ဂကူမန် နွံ ၁၁ တလဓဝ်ရတှေ် မုသ္ပမာန်ရော” ရဴဝွံ ဂးတဴရ။

ပၟိက်ကောန်ဂကူမန်ဂှ် ကောန်ဂကူမန်တံရ တီအိုတ်၊ သွက်တွဵုရးမန်ဏံ သ္ဂောံခိုဟ်အာဂှ် ပံၚ်တောဲကဵု အလုံ ညးဖၟိုတ်တုဲ ကၠောန်အာမွဲစွံဏောၚ် မာံအံၚ်မန် ဂးရ။
ပ္ဍဲကောံဓရီုကၠတ်ထဝ်တွဵုရးမန် အလန်ဒုတိယ တ္ၚဲပထမဏံ ဥက္ကဌကၠတ်ထဝ်တြေံ နာဲကျေန်ဖေဂှ် ပအပ်ပြာပ် တာလျိုၚ် ကုဒဝ်တေန်အိ ဥက္ကဌကၠတ်ထဝ်တၟိ တုဲဒှ်အာရ။