ပရေၚ်ရုဲစှ်သ္ကိုပ်အုပ်ဓုပ်အရာပ်/ကွာန် အပ္ဍဲပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ဟွံတုဲဒှ်ဖၟိုတ်ဏီရောၚ် သ္ဂောံတီ ကေတ်နူဂလာန် သ္ကိုပ်အုပ်ဓုပ်ပွိုၚ်ဍုၚ်ကျာ်မြဟ် ဥူအံၚ်ထိုက် ဟီုထ္ၜးဂှ်ရ။

ပ္ဍဲပွိုၚ်ဍုၚ်ကျာ်မြဟ်ဂှ်မ္ဂး ဒက်ပ္တန်လဝ်နကဵုအရာပ်လ္တူဍုၚ် (၂) အရာပ်ကဵု ကွာန် ၄၃ ကွာန်နွံတုဲ အရာပ်/ ကွာန် မရုဲစှ်သ္ပဒ္တန်တုဲဂှ် နွံ ၄၃၊ ဟွံပြေပြံၚ်ဏီအာစိုပ်ဒတုဲဏီဂှ် နွံမံၚ်ၜါကွာန်ဏီရောၚ် ဂွံတီကေတ်ရ။

သ္ကိုပ်အုပ်ဓုပ်ပွိုၚ်ဍုၚ်ကျာ်မြဟ် ဥူအံၚ်ထိုက်ဂှ် “၄၃ ကွာန်ဂှ် သ္ပလဝ်ဒတန်တုဲယျ သှေ်မံၚ်ကွာန်မွဲဂြဝ်ကဵု (ရေ တွၚ်းကုန်) ဂှ် ဟွံဂွံသ္ပဒတန်ဏီ၊ ဆဂး သွက်ကွာန်မွဲဂြဝ် ဂွံကလေၚ်ရုဲတၟိဂှ် လိက်စှေ်ကၠုၚ်ယျ၊ သှေ်မံၚ်ကွာန် (ရေတွၚ်းကုန်) ဂွံကလေၚ်ရုဲစှ်တၟိပၠန်လေဝ် လိက်ဟွံစှေ်ပုဟ် ဂွံသ္ပဒတန်ပၠန်လေဝ် လိက်ဟွံစှေ်ကၠုၚ်ဏီဖိုဟ်” သာ်ဝွံ ညး ဟီုရ။

ပ္ဍဲကွာန်မွဲဂြဝ်ဂှ် ကၠောန်သ္ပလဝ်ပေဲါရုဲစှ်သ္ကိုပ်အုပ်ဓုပ်ကွာန် နူကဵုဂိတုဂျာန္နဝါရဳ ၉ တေံတုဲ လ္တူညးဂွံဒုၚ်ရုဲစှ်လဝ် နဒ ဒှ်သ္ကိုပ်အုပ်ဓုပ်ကွာန်တၟိဂှ် ထ္ၜးဟိုတ်ကဵုတၚ်နၚ် မံၚ်တန်တဴလဝ်ပ္ဍဲကွာန် ဟွံပေၚ် ၁၀ သၞာံဂးတုဲ နူကဵုညးမပါ လုပ်ဒၟံၚ် အပ္ဍဲဂကောံကောပ်ကာဲ ၅ တၠလ္ၚဵုတံ က္လေၚ်ဒစဵုဒစးတေၚ်ပ္တိုန်လဝ်လိက်ရ။

“တုဲကၠုၚ်ဂိတု ဂျာန်နဝါရဳ စၟတ်တ္ၚဲ ၉ ဂှ် နာဲအံၚ်သိၚ်ဂှ် ဂွံမာဲ ၁၀ မ အဲဂှ် ဂွံမာဲ ၁၃ မ နူကဵု ညးကောပ်ကာဲ မသုန် တၠ သီုညးဍုၚ်ကွာန်တအ် တုပ်စိုတ်ထပက်လဝ်စၟတ်တဲတုဲယျတှေ် နကဵုစိုတ်အဲတှေ် ပြေ ပြံၚ် အာယျ ဆဂးဂွံ ၂ တ္ၚဲတုဲမှ ညးတအ်ပတိုန်လဝ်ဒုဟ်လ္တူအဲ” သာ်ဝွံ ညးဂွံဒုၚ်ရုဲစှ်လဝ်သ္ကိုပ်အုပ်ဓုပ်ကွာန် နာဲထုၚ်ဝေန် ဟီုရ။

ဒုၚ်သ္ဇိုၚ်ကဵုလိက်ဒစဵုဒစးဂှ်တုဲ ပ္ဍဲဂိတုမာတ်သတ္တဟလက္ကရဴအိုတ်ဏံ ညံၚ်ဂွံက္လေၚ်ရုဲစှ်တၟိမာန် နူကဵုဌာနပရေၚ် အုပ်ဓုပ်ပွိုၚ်ဍုၚ်ကဵုလဝ်စၞောန်တုဲကီုလေဝ် ဒဵုစိုပ်တ္ၚဲချူပရိုၚ် မာတ် ၂၉ ဏံ ဟွံတုဲဒှ်ဏီရ။

ညးမဒှ်သ္ကိုပ်ကောပ်ကာဲ သွက်ဂွံရုဲစှ်အုပ်ဓုပ်ကွာန်မွဲဂြဝ် နာဲထောန်ကျဳဂှ် “နကဵုအဲဂှ် ရုဲစှ်ဏာ နကဵုဥပဒေ ဍိုက်က် ပေၚ်ၚ် ကီုရ၊ ဆဂး တ္ၚဲဏအ် အတိုၚ်ဥပဒေ ပိုယ်ကၠောန်ဏာဓဝ်ဍာံကီုလေဝ် နူကဵုမၞိဟ်လတူတေံ သ္ပထောံ ဓဝ်ဟွံဍာံတုဲ လၟုဟ်တၚ်ခက်ခုဲ ဒှ်ကၠုၚ်နာနာသာ် ဍုၚ်ကွာန်ညးတၞဟ်တုဲဒှ်အိုတ်ရ ကွာန်ပိုယ်ဂှ်ဟွံတုဲဒှ်ဏီပုဟ်” သာ်ဝွံ ဟီုရ။

ပ္ဍဲကဵုရုဲစှ်သ္ကိုပ်အုပ်ဓုပ်အရာပ်/ကွာန် ဟွံပြေပြံၚ် မသှေ်သၟေဟ်ဒၟံၚ်ၜါကွာန် အပ္ဍဲပွိုၚ်ဍုၚ်ကျာ်မြဟ်လၟုဟ်ဏံဂှ် ဟိုတ်နူဂကောံ ကောပ်ကာဲတအ်ဒှ်မံၚ် ၂ ကရေက်တုဲ ခက်ခုဲမံၚ်ဒဵုကဵုလၟုဟ်ဏီရောၚ်ဂှ်လေဝ် သ္ကိုပ်အုပ်ဓုပ်ပွိုၚ် ဍုၚ်ကျာ်မြဟ် ဥူအံၚ်ထိုက် ဟီုရ။

အာယုက်အုပ်ဓုပ်အရာပ်/ကွာန်ဂှ် တုပ်သၟဟ်ကဵုအာယုက်သမ္မတကၟိန်ဍုၚ် မအိုတ်ပ္ဍဲဂိတုမာတ် ၃၁ ဏံရောၚ် နူကဵုကၠတ်ထဝ်ကၟိန်ဍုၚ် က္လေၚ်ပလေဝ်ပလေတ်သ္ပဒ္တန်လဝ်တၟိရ။