ပ္ဍဲ၂၀၁၅ တေံ ပပ္တံနူ ဂိတုဂျာန္နဝါရဳ ဒဵုကဵု ဒဳဇြေမ်ဗာ အလုံမွဲသၞာံ ပ္ဍဲကၟိန်ဍုၚ်ဗၟာဏံ ပ္ဍဲဒေသကောန်ဍုၚ်အရၚ် ဒၞါဲနွံကဵု ပဋိပက္ခလွဟ်ကီု၊ပ္ဍဲဒေသ မဒိုအ်လဝ် ပရေၚ်ပန်ပှော်ကီု ပရေၚ်ဒဒှ် ပလီုပလာ်အခေါၚ်အရာမၞိဟ် က္တဵုဒှ်ကၠုၚ်လဝ် ၈၄ အမှု၊ သာ်ဝွံ သ္ၚဳဂၠိပ်ကေတ် လိက်ဒုၚ်စဳရေၚ် ဂကောံဇာနှိက် စၟတ်သမ္တီအခေါၚ်အရာမၞိဟ်-ဍုၚ်ဗၟာ (ND-Burma) မပ္တိတ်လဝ် ပ္ဍဲတ္ၚဲဖေဖဝ်ဝါရဳ ၂၉ ဂှ်တုဲ ဂွံတီကေတ်ရ။
ပ္ဍဲလိက်ဒုၚ်စဳရေၚ်ဂှ်ဝွံ အပ္ဍဲပရေၚ်ပလီုပလာ်အခေါၚ်အရာမၞိဟ် နွံကၠုၚ် ဗၞတ် ၈၄ အမှုဏံဂှ် အရာဒှ်ဂၠိုၚ်အိုတ် ပွမဍဵုဍိုက်ပျဲပျာံဂှ် နွံကၠုၚ် ၂၆ အမှုတုဲ အရာ ကၟာတ်လဒဵု အခေါၚ်ဟီုဂး ဗၠးဗၠးၜးၜး ကဵု အခေါၚ်ပံက်ဂကောံ ဗၠးဗၠးၜးၜးဂှ် နွံကၠုၚ် ၁ရ အမှု ၊ ပွမပြိုက်ဂစိုတ်ဂှ် ၁၁ အမှုရ။
ညးလျိုၚ်ပရေၚ်စန်ဒက် ဂကောံ (ND-Burma) မၞုံယၟု (လိုည်းပိုးၚယ်) ဂှ် “ ဒၞါဲ ဒးဒုၚ်ပလီုလာ် အခေါၚ်အရာမၞိဟ် က္တဵုဒှ်ဂၠိုၚ်အိုတ်ဂှ် တွဵုရးကချေၚ် ကဵု တွဵုရးသေံတေံရ။ ပ္ဍဲၜါတွဵုရးဏံပၠန်ရ ပရေၚ်ဍဵုဍိုက်ပျဲပျာံကီု ပရေၚ်ပြိုက်ဂစိုတ်ကီု က္တဵုဒှ်ဂၠိုၚ်အိုတ်” သာ်ဝွံ ပ္ဍဲအရာ သၟာန်သှ်ကဵု ဌာန်ပရိုၚ်ဗၠးၜး ကောန်ဂကူမန်ဂှ် ဟီုလဴထ်ၜး သာ်ဂှ်ရ။
ဆဂှ်သၟးဟွံသေၚ် လ္ပာ်တွဵုရးကရေၚ် ကဵု တွဵုရးသေံ မဒိုအ်လဝ် ပရေၚ်ပန်ပှော်ဂှ်လေဝ် ပွမပလီုပလာ် အခေါၚ်အရာမၞိဟ် နွံဒၟံၚ်တၟာဂလိုၚ်ဏီရ ညးတေံဂး။
ဍုၚ်ဗၟာဝွံ ပ္ဍဲသၞာံ ၂၀၁၅ ဂိတုအံက်တဝ်ဗာတုဲကၠုၚ်တေံ ပွမထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် (NCA) တုဲကၠုၚ်ကီုလေဝ် ဒၞါဲၜိုဟ်သြိုဟ်ဂှ်နွံဆၜိုတ် ညိညဟေၚ်ရတုဲ ပ္ဍဲဒေသ ဟဂွံထ္ပက်စၟတ်တဲ NCA လ္ပာ်ဒေသ မပ္တံ ရခေၚ်၊ ကချေၚ်တေံဂှ်မ္ဂး ပဋိပက္ခလွဟ် ဂဵုထၞာန်ဒၟံၚ်ဖိုဟ်ရ ဂှ်လေဝ် ဓမံက်လဝ် ပ္ဍဲလိက်ဒုၚ်စဳရေၚ် ဂှ်ကီုရ။
ခတိုပ် လိက်ဒုၚ်စဳရေၚ် (Photo ND-Burma)
ညးလျိုၚ်ပရေၚ်စန်ဒက် ဂကောံ (ND-Burma) မၞုံယၟု (လိုည်းပိုးၚယ်) ဂှ် “ဒပ်ပၞာန်ဗၟာကီု ဂကောံရပ်လွဟ် ကောန်ဍုၚ်အရၚ်တံကီု မၚ်မွဲဒ္ဂေတ်ဗက် သၞောဝ်လိက်ကသုက် ဂျဳနဳဗာ သၞောဝ်လိက်ကသုက် လၟေတ်ဍုၚ်နာနာတံတုဲ ဒိုအ်ကၠေံ ပွမကဵုဒဒိုက် ပြိုက်ပျဲ လ္တူရဲအရာပ်တံဂှ်ညိ၊ သ္ပဇြိုဟ်နက်ကဵု သ္ၚိဌာန် ပိုန်ဒြပ် လမျီု ညးဍုၚ်ကွာန်တံညိ၊ ဇၟာပ်ညးတာလျိုၚ်တံ မၚ်မွဲ အခေါၚ်အရာမၞိဟ် အိုတ်ညိ ရဴဝွံ ဖတိုက်ဖအောဝ် လဝ်နွံ” ရဴဝွံ ဓမံက်ထ်ၜးလဝ် ပ္ဍဲပရိုၚ် (ND-Burma) နွံ ဂးရ။
ND-Burma ဝွံ ပံက်လဝ်ပ္ဍဲသၞာံ ၂၀၁၄ တေံတုဲ ပ္ဍဲဂကောံဝွံ ဂကောံ ၁၃ ဂကောံ မပ္တံကဵု ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် (AAPP)၊ဂကောံကေၚ်ကာဗၟာ-မြန်မာ့ရေးရာ (BI)၊ ဂကောံဒက်ပ္တန် အခေါၚ်အရာမၞိဟ်ပ္ဍဲဍုၚ်မန် (HURFOM)၊ ဂကောံညးဗြဴပလံၚ် (PWO) တံ တၞီလုပ်လၟိဟ် အိုတ်ရ။
0 Comments