သမ္မတ NLD ပၠောပ်လဝ်စရၚ် သွက်ဂွံခါန်ပ္တိုန် နဒဒှ် သ္ကိုပ်ဝန်ဇၞော်တွဵုရးမန် ကုဥူမေန်န်ဥူ ဂှ် မၞိဟ်ဒုၚ်တဲဟွံမာန်နွံမံၚ်တုဲ ကၠာဟွံယဵုသစာ ဒဒှ်ဂအုပ်ဝန်ဇၞော်ဂှ် ညးစၞးကၠတ်ထဝ် လ္ၚဵုလ္ၚဵု နူဗော် NLD ဒၞါတာအာဏောၚ် ရဴဝွံ ဟီုလဴကဵုဌာန်ပရိုၚ် ဗၠးၜးမန်ရ။

ညးစၞးကၠတ်ထဝ် စရာဲခိုဟ်နူညးတေံ နွံတၟာဂလိုၚ်ဖိုဟ် ရုဲခါန်ဏာဗီုဏံဂှ် တုပ်တဴ မပဒေက်ဖျဝ်ဖျေံ ကုညးစၞကၠတ်ထဝ်တၞဟ်ဟ်တံကီုရ သာ်ဝွံ ညးစၞး NLD မွဲတလ ဟွံမိက်ဓမံက်ယၟုဂှ် ဟီုရ။

လဟီုညးစၞးဂှ်မ္ဂး “ဣဏံဂှ် NLD အာဒၟံၚ်ဂၠံၚ်သၞောတ်ဗဟဵုက္ဍိုက်ပ်ရ။ နူဒုဥက္ကဌ ကၠတ်ထဝ် ထပ်ပ္တိုန်ဍေံ ဂအုပ်ဝန်ဇၞော်တှေ် မၞိဟ်သှေ်မံၚ် မွဲဗွဝ်ဗျုဏီ၊ မၞိဟ် ခိုဟ်တောနူဍေံ နွံမံၚ်မွဲဗွဝ်ဏီ။ သ္ပထောံဗီုဏံတှေ် မၞိဟ်သှေ်မံၚ်တံ မွဲလေဝ်ဟွံလုပ်အဝေါၚ် ဒှ်အာဗီုဂှ်ဏောၚ်” ဂးရ။

ပွမခါန်ပ္တိုန် ဥူမေန်ဥူ ဒဒှ်ဂအုပ်ဝန်ဇၞော် ပ္ဍဲကၠတ်ထဝ်တွဵုရး နူတဏေံတေံဂှ် ညိလေဝ် ဟွံသၟာန် လညာတ် ညးစၞးကၠတ်ထဝ်တံဂှ် ဟွံစှေ်စိုတ်ဍာံဍာံရ၊ ခါန်ပ္တိုန်သ္ကိုပ်ဝန်ဇၞော် ကုဥူမေန်န်ဥူဂှ် ဟိုတ်ဗီုလဵုထ္ၜးထ္ၜး ဒုၚ်တဲ ဟွံမာန်လးလး ညးစၞးဂှ် ဂးရ။

ညးစၞး NLD မွဲတလပၠန်ဂှ်လေဝ် “ သၞောတ် နူလ္တူတေံ ဟီုယွံတှေ် ဒးယွံဗက် ဖအိုတ်ဏောၚ်ဂှ် ဟွံဒးစိုတ်ရ မိက်ဂွံကဵုပြံၚ်လှာဲဟွံသေၚ်ဟာ။ ဒဳမဝ်ကရေဇြဳတှေ် သၟာန်လေဝ် ဆန္ဒညးဂလိုၚ်။ နူပ္တိုန်လဝ်ဍေံ ဒုဥက္ကဌကၠတ်ထဝ်ဂှ် ဟွံဒးစိုတ်မံၚ်ရ။ ၜိုတ် ဒုဥက္ကဌရတှေ် မုဟွံဒှ်လေဝ်ဂးတုဲ မုလေဝ်ဟွံဟီုရံၚ်ကၠုၚ်မံၚ်” ရဴဝွံ ဂးတဴရ။

သွက်ကၠတ်ထဝ်တွဵုရးမန်လၟုဟ်ဏံ ခါန်ပ္တိုန်လဝ် ကုဥူမေန်န်ဥူ နဒဒှ်ဒဒှ် ဒုဥက္ကဌ တုဲကၠုၚ်မံၚ်ရ။

ညးဍုၚ်ကွာန်တံ ဟိုတ်နူပတှေ်မံၚ်ဒဝ်အံၚ်သာန်သုကျဳဂှ်ရ ဝန်ဇၞော်ဂမၠိုၚ် နူဒဝ်အံၚ်သာန်သုကျဳ ရုဲပ္တိုန်လဝ်ဖအိုတ်တံဏံ ညးဍုၚ်ကွာန်တံဒုၚ်တဲဟွံမာန်ဂှ်ဟွံမွဲ သာ်ဝွံ မာံထေန်အံၚ်ဟာန် ညးစၞးကၠတ်ထဝ် တွဵုရး ဗော် NLD ဟီုကဵုဌာန်ပရိုၚ်ဗၠးၜးမန် ရ။

ဥူမေန်န်ဥူဝွံ က္လိဂွံအာယုက် ၄၆ သၞာံတုဲ တန်တဴမံၚ် ပ္ဍဲကွာန်(တောၚ်စွန်း) ပွိုၚ်ဍုၚ်ၜဳက္လေၚ်ရ။ ဂွံလဝ် အဆံၚ်ပညာ BE (မဟိမုအေန်ဂျေန်နဳယာ) တုဲ ယိုက်ဂၠေၚ်ရၚ်တၠုၚ်မံၚ် နဒဒှ် ဒုဥက္ကဌ ဗော် NLD ပွိုၚ်ဍုၚ် ၜဳက္လေၚ်လေဝ်ကီု၊ နဒဒှ်သ္ကိုပ်ပရေၚ်ဘဏ္ဍာ ဂကောံ တဵုပလမ် ကၠောန်ပ္တိတ်ထ္ၜိုတ် ပွိုၚ်ဍုၚ်ၜဳက္လေၚ်လေဝ်ကီု၊ နဒဒှ်ကမ္မတဳကောပ်ကာဲ ရုၚ်ဂဥုဲပွိုၚ်တိုက် (တောၚ်စွန်း) လေဝ်ကီု ဂွံတီလဝ်ရ။