ပ္ဍဲကဵုကွာန်ဝၚ်ရာဲ အရာပ်ဝါဗိုၚ် သ္ၚိတူအာ(၄)မ ပရေၚ်ဗါ်ဂစိုတ်မၞိဟ်ဂှ် တော်ကဵုၚုဟ် မးဆုလၟုဟ်မ္ဂး ဆောံ လေၚ်အာၜိုတ်ကိုဋ်(၈၀၀)ဒကေဝ်ပြၚ်ၚ်ရောၚ် ရဲအရာပ်ဂှ်ဟီုထ္ၜးရ။
သ္ၚိတံဂှ် ဒှ်သ္ၚိဆုပြာန်ဖအိုတ်တုဲ သ္ၚိမၞိဟ်ဗါ်ဂစိုတ်မၞိဟ် နာဲအယုၚ်ဂှ် ထပ်လ္တူဂှ်သိုၚ်လဝ်ဆုမွဲထပ် ထပ်သၟဝ် ဂှ်တိုက်မွဲထပ်ရ၊ ‘သ္ၚိတူအာဖအိုတ်ဂှ်တှေ် သိုၚ်လဝ်ကဵုဆုပြာန်ခိုဟ်ဟ်ဖအိုတ်ဏောၚ်၊ တော်ကဵုၚုဟ်မး ဆုတ္ၚဲဏံတှေ် မွဲမတာန် ၜိုတ်(၂၀၀)ကိုဋ်ဟွံယျအ်ပုဟ်၊ တၟော်ထောံဖအိုတ်တှေ် ဆောံလေၚ်အာ ၜိုတ်(၈၀၀)ကိုဋ်ပြၚ်မံၚ်ဏောၚ်’ နာဲထာဝရ ကွာန်ဝၚ်ရာဲဂှ် တၟော်ဟီုထ္ၜးရ။
ညးတၠသ္ၚိတူအာ(၄)မဂှ် သ္ၚိမိဟစက်၊ သ္ၚိမိယေန်တဳ၊ သ္ၚိမိမၚ်္ဂလာ၊ သ္ၚိညးဗါ်ဂစိုတ်မၞိဟ် နာဲယုၚ် ဖအိုတ် သ္ၚိတူဆောံလေၚ်အာ(၄)မဂှ်ဒှ်သ္ၚိၝဲဒေံ ညးတံဖအိုတ်တုဲ သီုကဵုကွဳလိုန်ဓါတ်(၂)ဖ္ဍိုက် သ္ၚေက်တူအာကီုရ။
ဗီုသ္ၚိဒးဒုၚ်တူလဝ် ပ္ဍဲကွာန်ဝၚ်ရာဲ အရာပ်ဝါဗိုၚ် (MNA)
လၟုဟ်မ္ဂး ရဲသ္ၚိဒးဒုၚ်စံၚ်တူအာတံဂှ် ဒှ်မံၚ်အခက်အခုဲ သ္ဂောံမံၚ်စံၚ်တုဲ ရဲအရာပ်တံလေဝ် ထုဲထံၚ်မံၚ်ကဵု ပရေၚ်ကမ္မဋ္ဌာန်ကီု၊ သွက်ရဲသ္ၚိဒးဒုၚ်စံၚ်တူအာတံဂှ် ဟွံဂွံတက်ကၞာထးဏီရောၚ် နာဲအတောန် ဟီုရ။
‘အခိၚ်ဒှ်ဂှ်ဂှ် မၞိဟ်လေဝ်ပိုတ်မံၚ် အရာပ်ဝါဗိုၚ်ဂှ်၊ မၞိဟ်တြုံတြုံတံလေဝ်ဟွံမွဲကီု အခါရဒှ်မံၚ်အပ္ဍဲတေံဂှ် မ္ၚး ပ္ဍဲကွာန်ဏံဟွံတီပုဟ်၊ ဠအယုၚ်ဂှ် ဂွံသေနာတ် နာဲအယှေ ဂှ်တုဲမှ မၞိဟ်နူအပ္ဍဲတေံဆိုအ်တိတ်ဂှ် အခါဂှ်မှ ဂွံတီအခိၚ်ဂှ်ဂှ်မုလေဝ်ကေတ်ဟွံဂတာပ်ရပုဟ်၊ လၟုဟ်တှေ် ရဲသ္ၚိတူအာတံဂှ် ဒှ်မံၚ်အခက်အခုဲပရေၚ်ဂွံမံၚ် စံၚ်ဏောၚ်’ သာ်ဏံ နာဲအတောန်ဂှ် ဟီုထ္ၜးရ။
ဂိတုအေဗရဴ (၄) အခိၚ်ၜိုတ် (၉) နာဍဳပြၚ်ညိဂှ် သ္ၚိဒးဒုၚ်စံၚ်တူမံၚ်မွဲမတုဲမွဲမဂှ် လအ်ကဵုနာဍဳ ပြၚ်တုဲမှ ကွဳစက် ပလိုတ်ပၟတ်ကွာန်ဇိုၚ်ဝုတ်ဒိုဟ်တံ ကောံစိုပ်ကၠုၚ်ရ၊ ဟိုတ်နူ နာဲအယုၚ် ဂှ်ထဍေၚ်ဗါ်ဂစိုတ် မၞိဟ်ဂမၠိုၚ်တံတုဲ သီုပၠံၚ်ဂွံလဝ်လွဟ်ပၞာန်မၚ်ကၚ်ကွာန်မွဲတၠဂှ်ရ ကွဳစက်ပလိုတ်ပၟတ်တံလေဝ် ဟွံဂံၚ်လုပ် အာပလိုတ်ပၟတ် ဏီရ။
သ္ၚိတူအာအိုတ်တုဲ နူဒပ်ပၞာန်တံကီု၊ ဗၠာဲသၟိၚ်တံကီု၊ ပၞာန်မၚ်ကၚ်ကွာန်တံကီု ကောံဗိုၚ်ပန် နာဲအယုၚ် ဂွံချိုတ်အာတုဲမှ ကွဳစက်ပလိုတ် ပၟတ်တံ ဂွံဂံၚ်လုပ်သိုဟ်ပလိုတ်ပၟတ်ဂှ်ရ အခိၚ်ဂှ် သ္ၚိသီု(၄)မဂှ် မုလေဝ် ဒမြိပ်ကပေါတ်ဟွံဂတာပ် သ္ၚေက် အိုတ်အးဒၟံၚ်တုဲတုဲရ။
0 Comments