ပ္ဍဲတွဵုရးဍုၚ်မန်ဝွံ သီုဟွံစိုပ်ကာလ အတးသၚ်္ကြာန်ဏီ ပပ္တံနူ ဂိတုမာတ် (၁၆) ဒဵုကဵု ဂိတုအေဗရဴ (၅) မံက်ဂှ် ရပ်ဂွံလဝ် ကွဳယာန်ဂမၠိုၚ် ဟွံဒ္ဂေတ်ဗက်သၞောဝ် ဗၞတ် (၅၂၆) မတုဲရဂှ် ဂွံတီကေတ် နူရုၚ်သ္ကိုပ်ဗၠာဲသၟိၚ် တွဵုရးဍုၚ်မန်ရ။
သွက်ပရေၚ်ဂီုကၠီု သ္ဘၚ်အတးသၚ်္ကြာန်ဂှ် ပိုၚ်ခြာလဝ် ပရေၚ်ဂီုကၠီု (၃) သ္ကုတ် မတွံဂး ပရေၚ်ဂီုကၠီု ကၠာဟွံစိုပ်ကာလ အတး၊ ပရေၚ်ဂီုကၠီု ပ္ဍဲကာလသ္ဘၚ်အတး၊ ပရေၚ်ဂီုကၠီု ပ္ဍဲကာလ သ္ဘၚ်အတးလောန် သာ်ဝွံတုဲ ရၚ်တၠုၚ်မံၚ် ဂွံတီကေတ်ရ။
သ္ကိုပ်ဗၠာဲသၟိၚ်ဝေန်အံၚ် တွဵုရးဍုၚ်မန်ဂှ် “ ပ္ဍဲကွဳစက် ကွဳလိုန်ဓါတ် ရပ်ဂွံလဝ် လၟုဟ်ဏံဂှ် ကွဳလိုန်ဓါတ် ဗ္ဂပ်စုတ်လဝ် ပၠံၚ်ယက် ဗြုထတ်တ်တအ်ဂှ် ပါလုပ်ဂၠိုၚ်” သာ်ဝွံ ဂးရ။
ပ္ဍဲသ္ဘၚ်အတးသၞာံဏအ် ညံၚ်ဟဂွံဒှ်သေက်ဇဵု၊ ကွဳယာန်တအ် ညံၚ်ဟဂွံဇီုညးသ္ကအ်၊ ညံၚ်ဟဂွံဗကပ်ဂှ် နကဵုသမ္တီနွံနွံ စွံဓဝ်သတိတုဲ ညံၚ်ဂွံဒှ်ကုသိုလ် ညံၚ်ဂွံနွံကဵုပွမယေန်သၞာၚ်ဂှ် ဒးထိၚ်ကဵု၊ ထိၚ်ကဵုဗီုဂှ်မာန်မှ ဂကူ ဘာသာလဵုမွဲဟွံရုဲ နူဍုၚ်လဵု ကွာန်လဵုမွဲ ဟွံဟီု၊ဂြောဝ်ညး ဂြောဝ်အဲ သ္ကအ်ညး သ္ကအ်အဲ ဟွံရုဲ သီုကဵုမမိပ်သၠောၚ် ဝေၚ်အာ သ္ဘၚ်အတး ဂြုဂြုဂြီုဂြီု ဂီုဂီုကၠီုကၠီုမာန်ဏောၚ်ဒှ်တုဲ မုက်မတ်လေဝ် ယးတၟး ပ္ဍဲအဒေါဝ်ဂၠးတိဏောၚ်၊ဒှ်သာ်ဂှ်ရ စရာဲသိက္ခာ သမ္မတကဵု အလဵုအသဳ ပိုဲ ညံၚ်ဂွံသၠုၚ်ဂှ် ညးညးအဲအဲ မိက်ဂွံကဵု ပံၚ်တောဲမၚ်မွဲအာမွဲစွံ သာ်ဝွံ သ္ကိုပ်ဗၠာဲသၟိၚ် တွဵုရးမန် ဟီုရ။
ပ္ဍဲကွဳယာန် ရပ်ထိၚ်ဂွံလဝ် (၅၂၆) ဖ္ဍိုက်ဏအ်ဂှ် ကွဳစက် (၂၁) မ၊ ကွဳလိုန်ဓါတ် သၠာပိ (၁၅)မ၊ ကွဳလိုန်ဓါတ်ဂှ် (၄၉၀) မ သီဂွံလဝ်တုဲရ။
စပ်ကဵုကိစ္စဏံတုဲ ကွဳယာန် မရပ်လဝ်လၟုဟ်ဏအ်ကီု၊ကွဳယာန် ကြက်ရပ်ဂွံ ပ္ဍဲကာလအတးတေံကီု သ္ဘၚ်အတးတုဲဒှ်အိုတ်မ္ဂး ညးတအ် ရပ်စပ်စဳရေၚ်အာပၠန်ဏောၚ်ဂှ် ဂွံတီကေတ် နူရုၚ်သ္ကိုပ်ဗၠာဲသၟိၚ် တွဵုရးမန်ဂှ်ရ။
ပ္ဍဲကာလအတး တွဵုရးဍုၚ်မန် သၞာံအာတေံဂှ် ကွဳလိုန်ဓါတ် ဟွံမၚ်စေဝ်ပၞောန်ဂှ် ရပ်ဂွံ (၃၉၈) မ၊ ကွဳစက် ဟွံမွဲကဵုလာၚ်ဇြေန်ဂှ် (၂) မ၊ ကွဳစက်ဝးကအ် (ထဝ်ဠာဂျဳ) ဟွံဗက်သၞောဝ်ဂှ် (၁၇) မ၊ ကွဳလိုန်ဓါတ် ပံက်ပၠံၚ်ယက် မဗရုဒၟံၚ်ရမျှာၚ်ထတ်တ် နာနာသာ်ဂှ် ရပ်ဂွံ (၅၅) မရ။