ကမ္ပနဳ June Cement Industry LDT ဂွံလဝ်အခေါၚ် နူဂကောံကမ္မယှေန် ဗလိုက်တံကၟိန်ဍုၚ်ဗၟာတုဲ သွက်ဂွံသိုၚ်ပ္တန် ရုၚ်စက်တိဗိလာတ် ပ္ဍဲဂတှေ်ဒဵုသာဲ ဇရေၚ် ကွာန်မွဲဂြဝ်-ကအ်ဒုန် ကအ်ပၞဟ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ရပ်ဒၟံၚ်ကမၠောန် အရၚ်ဂွံသိုၚ်ပ္တန်ရုၚ်စက်ဣရတုဲ ရုၚ်စက်ဏအ်ဂေတ်မ္ဂး မွဲတ္ၚဲတှေ် ပ္တိတ်တိဗိလာတ် ဗၞတ် ၅၀၀၀ တာန်ကီုဏောၚ်ဂှ် ဂွံတီကေတ် နူကောန်ကမၠောန် ကမ္ပနဳဂှ်ရ။
အဃောတးပဠေဝ်ဒၟံၚ်ဖဠာတ် အရၚ်ဂွံသိုၚ်ရုၚ်စက်တိဗိလာတ်တၟိမွဲမပၠန် (MNA)
“လၟုဟ် ပကောံမံၚ်ဗ္တဳဖိုဟ်၊ ဒၞါဲ သွက်ဂွံစွံကွဳစက်ယာန် ကဵု ဒၞါဲအရၚ်ကောန်ကလောန်တအ်ဂွံမံၚ်ဂှ် သိုၚ်ဒၟံၚ်ဣရ၊ အဲဂှ် ကောန်ကလောန်ဍောတ်တ်မွဲဏောၚ်တှေ် ရုၚ်စက်ဏအ် ဆလအ်ဂေတ်ရောဂှ် အဲဟွံတီရ” သာ်ဝွံ ကောန်မၠောန် မသိုၚ်မံၚ်ဂှ် ဂးရ။
ကမ္ပနဳ June Cement Industry LDT ဏအ် ကၠုၚ်သိုၚ်ရုၚ်စက်တိဗိလာတ်ဂှ် ပ္ညဳလဝ်ကဵုရဲဒေသတအ်လေဝ် ဟွံမွဲ၊ ဖဵု ခိုဟ်/ပရေံ ရုၚ်စက်ဏအ် ဗီုလဵုနွံမာန်ရောဂှ်လေဝ် လဴကလးလဝ် ဟွံမွဲ ရဲဒေသတအ် ဂးရ။
“ ပရူဍေံတအ် သိုၚ်ရုၚ်စက်ဏောၚ်ဂှ် ဟွံလဴကလး ဟွံကဵုလဝ်သမ္တီ ကဵုကောန်ဒေသတအ်ရ၊ ရုၚ်စက်ဏအ် စကာချးတၟအ်ကီုဏောၚ် ပိုဲဂွံမိၚ်လဝ်။ ဣဂှ်ရ ဍာ်ပရေံပရေံ ဍာ်ကၠိခ္ဍက် တိတ်နူရုၚ်စက်ဏအ် ယဝ်ဇွောဝ်လုပ်အာ ပ္ဍဲၜဳကဍတ်(အထြာန်) တှေ် ဆသတ်ဍာ်နွံပ္ဍဲၜဳဂှ်သၟးဟွံသေၚ် ဒှ်အန္တရာဲ၊ မၞိဟ်တအ်မတန်တဴမံၚ် မွဲဂရိပ်ၜဳဂှ်လေဝ် နွံကဵုအန္တရာဲဖအိုတ်ရ” သာ်ဝွံ နာဲထောန်ကျဳ ကောန်ကွာန် မွဲဂြဝ်ဂးရ။
သွက်ဂွံသိုၚ်ရုၚ်စက် တိဗိလာတ်ဏအ် ကၠာဟွံစိုပ် ၂၀၁၀ တေံရ ကမ္ပနဳ June Cement Industry LDT ဏအ် ကၠုၚ်ရာန်ကေတ်လဝ်တိ ဗၞတ် (၇၀၀) ဨက ပ္ဍဲအကြာ ကွာန်မွဲဂြောဝ် ကဵု ကွာန်ကအ်ဒုန် ကအ်ပၞဟ် တအ်ဂှ် တုဲမံၚ်ရ ရဲဒေသတအ်ဂး။
“ သွက်ဂွံဗဂေတ်ရုၚ်စက်ဏအ် နကဵုကမ္ပနဳ ပ္တိတ်ဒြဟတ်ဓါတ်လလဳ ကဵုမုရောဂှ် ဟီုလဴလဝ်ကဵု ရဲဒေသတအ် ဟွံမွဲရ။ ယဝ်စကာ ချးတၟအ်တှေ် ပိုဲဒ္စဵုဒ္စးဏောၚ်” နာဲယှိုဲဝေန် နူဂကောံဖေါအ်ဖြေဝ် ဒေသဒဵုသာဲ ဂးရ။
ယဝ်သိုၚ်ရုၚ်စက်တိဗိလာတ်ဏံတှေ် သွက် ပရေၚ်မၞိဟ်၊ ပရေၚ်ထတ်ယုက်၊ ပရေၚ်တိဗ္ၚကၠအ်သွဝ် ရဲဒေသတံ က္တဵုဒှ် ဘဲအန္တရာဲမာန်မံၚ်၊ ဟိုတ်နူဒှ်ကလောန် ဒးဖံက်ဖ္တိုဟ်မံၚ် လၟိုန်ဂှ်ရ ကျာ်စေတဳ တြေံတြေံဂမၠိုၚ် နွံပ္ဍဲဒဵုသာဲ ဒဵုမွဲဂြောဝ် တံကီု သီုဘုတ်ဘာ၊ ဘာဗ္တောန်လိက် မွဲဟာန် သ္ၚိဌာန် ရဲဒေသတံ မ္ညောတ်မ္ညဝ် ဒတဝ်ဒရိုက် လီုလာ်မာန်မံၚ်ဏောၚ် နာဲယှိုဲဝေန်ဂးရ။
ပ္ဍဲဂိတုမာတ် ၂၅၊ ၂၀၁၆ ဂှ် ဂကောံကမ္မယှေန်ပရေၚ်ဗလိုက်တံ (ဍုၚ်ဗၟာ) ကၠောန်သ္ပကောံဓရီု လၟေၚ်လၟိဟ် ၁၁/၂၀၁၆ တုဲ ကမ္ပနဳ June Cement Industry LDT ဏအ် ဂွံကၠုၚ်အခေါၚ်သိုၚ်ရ။
ပ္ဍဲပွိုၚ်ဍုၚ်ကျာ်မြဟ် တွဵုရးမန်ဂှ်ဝွံ ရုၚ်စက်တိဗိလာတ်မတ်မလီု MCL မကၠောန်ပ္တိတ် တိဗိလာတ် မွဲတ္ၚဲ ဂယိုၚ်တာန် ၅၀၀၀ ဂှ်လေဝ် ဗဂေတ်စက် ပ္ဍဲဂိတုတြဴဏအ်ရဏောၚ်ဒှ်တုဲ နူကဵုကမ္ပနဳ June Cement Industry LDT ဂှ်လေဝ် ထပ်သိုၚ်ဒၟံၚ် ရုၚ်စက်မွဲမပၠန်ရ ဂွံတီကေတ်။
