သၟာကမၠောန်ပလုၚ် ပြံၚ်ကၠုၚ်ကၠောန်ဒၟံၚ်ကလောန်တမ္ၚာ ပ္ဍဲဒေသပွိုၚ်ဍုၚ်ရေဝ် တွဵုရးမန်ဂှ်ဝွံ အကြာဍေံတအ်ကဵုဍေံတအ် ပွဂစိုတ်ညးသ္ကအ် ဆက်ဒှ်မံၚ်ဖိုဟ်တုဲ ပ္ဍဲဂိတုမေဏအ် အမှုမၞိဟ်ချိုတ်မွဲအမှု ကဵု အမှုဂစိုတ်မၞိဟ်မွဲအမှု ထပ်ဒှ်တိုန်ပၠန် ဂွံတီကေတ်ရ။

ပ္ဍဲဂိတုမေ(၁၅) တုဲကၠုၚ်ဏအ် ဂွံဆဵုကေတ် ဇွရဲပ္ၚာ (၂) ဇွ ပ္ဍဲၜဳရ။ ပ္ဍဲဂိတုမေ (၂၁) ဂှ်လေဝ် ရဲပ္ၚာ မတန်တဴဒၟံၚ် ပ္ဍဲကွာန်ပါၚ်ၜဳ ဍေံတအ်ကဵုဍေံတအ် အရေဝ်ဂၠိုၚ်သေက်ဇဵု ညးသ္ကအ်တုဲ ဒှ်ကၠုၚ်အမှုဂစိုတ်မၞိဟ် (၁) အမှုပၠန် ဂွံတီကေတ် နူရုၚ်ဗၠာဲသၟိၚ် ဍုၚ်ရေဝ်ရ။

“ဒဒှ်ပ္ဍဲပါၚ်ၜဳဂှ် ဍေံတအ်ကဵုဍေံတအ် အရေဝ်ဂၠိုၚ်ညးသ္ကအ်တုဲ ဇိုၚ်တဲလောန်အာ။ လၟုဟ် ပိုဲရပ်လဝ် ကောန်ဒုဟ် ၜါတလ။ မၞိဟ်ချိုတ်အာဂှ် ညးလဵုရော ကၠုၚ်နူလဵုရောဂှ် ပိုဲဟွံတီ ချိုတ်ပၠိုတ်ဏီ” ညးလျိုၚ်ဗၠာဲသၟိၚ်မွဲတလ မ္ဒးဒၟံၚ်အလန်တာလျိုၚ် (ဗ္ဒိုပ်ဗၠာဲသၟိၚ် ဍုၚ်ရေဝ်) ဂှ် ဂးရ။

မၞိဟ်မချိုတ်အာဂှ် အယုက်ၜိုတ် (၃၅) ၊ ညးၜါတလ ဒးဒုၚ်ရပ်လဝ် နဒဒှ်ကောန်ဒုဟ်ဂှ် မွဲဂှ် ကိုဝ်ထိုဲ နူဒေသဖျာပုၚ်၊ မွဲပၠန်ဂှ် ထောန်လေန်အံၚ် နူပွိုၚ်ဍုၚ် ဒဂုၚ်သမၠုၚ်ကျာ( တောၚ်ဒဂုံမြို႕နယ်) ရးလ္ဂုၚ်ရဂှ်လေဝ် ညးဗၠာဲသၟိၚ်ဂှ် ဂးရ။

ကောန်ကလောန်ၜဳ (ရဲပ္ၚာ) ဒးချိုတ်ဒၟံၚ် ပ္ဍဲၜဳဂှ် နွံဟိုတ် နာနာသာ်ရ။ လ္ၚဵုဂှ် ဒၟါနူယဲဝေဒနာလေဝ် ချိုတ်အာနွံ၊ လ္ၚဵုဂှ် ဟိုတ်နူအရေဝ်ဂၠိုၚ် ဇိုၚ်တဲၜက်အာတုဲ ဒှ်ကၠုၚ်အမှုဂစိုတ်မၞိဟ်လေဝ် နွံကၠုၚ်ရ။

“ပ္ဍဲဏအ် ချိုတ်မံၚ်ဗီုဗီုဏအ်ဂှ် ဗွဲမဂၠိုၚ်တှေ် ရဲပ္ၚာ ဌာန်ပလုၚ်သၟးရ။ အတိုၚ်ရဲကွာန် ဇိုၚ်ၚ်တအ်ဏအ်ဟီုဂှ် ပ္ဍဲပွိုၚ်မွဲသၞာံတှေ် ရဲပ္ၚာ ကောန်ကလောန်ၜဳ တအ်ဏအ် ချိုတ်မံၚ် ဗ္ဒါဲၜိုတ် (၁၀၀) ဏောၚ် ဂွံတီကေတ်” သာ်ဝွံ ဥူထောန်အေ မၞုံတာလျိုၚ် လ္ပာ်တွဵုမန် (နူဗော်ဒဳမဝ်ကရေဇြဳကွးဘာ) မရီုဗၚ်ဒၟံၚ် ပရေၚ်ကောန်ကလောန်ၜဳ ဂှ် ဂးရ။

ဇွရဲပ္ၚာ (၂) ဇွ ဂွံဆဵုလဝ် ပ္ဍဲၜဳ ပ္ဍဲမေ (၁၅) တေံဂှ် မွဲဂှ် မျဵုဇြဝ်ဥူ အယုက် ၜိုတ် (၂၀) ဂဥုဲဇဗပိုတ်တုဲ ဒးချိုတ်အာ ဒှ်မာန်၊ မွဲပၠန်ဂှ် ဥူအံၚ်ဝေန် အယုက်ၜိုတ် (၄၀) ဂွံလဝ်ဂွဵုပ္ဍဲက္ဍိုပ် မဇြိုဟ်လုပ်အာ ၜိုတ်ၜါၝောံတဲ ဂွံဆဵုကေတ် ရဴဝွံဥူထောန်အေ ဂးရ။

ကိစ္စ ဇွ (၂) ဇွ ပ္ဍဲၜဳဂှ် လၟုဟ် ပံက်လဝ်အမှုပရေၚ်ချိုတ်ဖိုဟ်တုဲ ကိစ္စအမှုဂစိုတ်မၞိဟ် က္တဵုဒှ်ကၠုၚ် ပ္ဍဲပါၚ်ၜဳဂှ်လေဝ် ရပ်စပ်စၟဳစၟတ်ဒၟံၚ်ဖိုဟ် ဂွံတီလဝ် နူရုၚ်ဗၠာဲသၟိၚ်ရေဝ်ရ။

ပ္ဍဲပွိုၚ်ဍုၚ်ရေဝ်ဂှ်ဝွံ ပ္ဍဲသၞာံ ၂၀၁၆ နူဂိတုဂျာန်နဝါရဳ ဒဵုစိုပ် ဂိတုအေဗရဴ နွံကၠုၚ်ကဵုအမှု (၉၈) အမှုဂှ် ပ္ဍဲအမှုဇၞော် နွံမံၚ် ၁၀ ဂကူဝွံ အမှုဂစိုတ်မၞိဟ် (၄) အမှု၊ အမှုမၞိဟ်ချိုတ် (၁၆) အမှု၊ အမှုပၠံၚ်ၜးဒြပ် (၁) အမှု ကဵု အမှုမေထုန် (၂) အမှု၊ အမှုတၞဟ်ဟ် ၃၄ အမှု ကဵု အမှုဒုၚ်စဵုဒၞါ ၄၁ အမှုလေဝ် က္တဵုဒှ်ကၠုၚ်ကီု ဂွံတီကေတ်ရ။