မွဲဒမြိပ်ဂၠံၚ်နူကွာန်ကလအ် စဵုဍုၚ်ခေါဇာ ဂၠံၚ်ဂွံသၠဲတိုန်ဂးတုဲ နူကဵုအလဵုအသဳ၊ ဌာနကၠောန်ဂၠံၚ်ညးဍုၚ်ကွာန် (ပြည်သူ့ ဆောက်လုပ်ရေး) တံ က္ဍိုပ်တိဝါဗ္ၚ ညးဍုၚ်ကွာန် မၞုံမံၚ်သ္ကဲဂၠံၚ် (၂) လ္ပာ်တံ တုက်လဝ်တိကၠအ်ဗွဲမဂၠိုၚ်တုဲ ညးဒေသ ဒးဒုၚ်ဆောံလေၚ်မံၚ်တိကၠအ်တံဂှ် မိက်ဂွံဂွံမံၚ်ၚ္ၚုဟ်လေဲရောၚ် ဟီုဂးမံၚ်အိုတ်ရ။
ဗီုသၠဲလဝ်ဂၠံၚ် နူကွာန်ကလအ် စဵုကဵုဍုၚ်ခေါဇာ (မန်ထဝ်)
တၠကၠအ် ညးဒေသကွာန်ဆၚ်ဂူမွဲတၠ မိမဝ်ဂှ် “ဍေံတံတုက်ဏောၚ်ဂှ် ကဵုတၠကၠအ်ပိုဲမုလေဝ် ဍေံဟီုလဝ်ဟွံမွဲပုဟ်။ ကဵု ဥက္ကဌကွာန်ဂှ်တှေ် ဍေံဟီုလဝ်နွံ။ ပိုဲဂှ်တှေ် တိကၠအ်ပိုဲ ဒးဒုၚ်ဆောံတှေ် ၚ္ၚုဟ်မးဗၞတ်ကြိုက်ဂှ်တှေ် မိက်ဂွံတွဵုလေဝ်” သာ်ဝွံ ညးဟီုရ။
ဂၠံၚ်ထပ်သၠဲမံၚ်တံဂှ်ဝွံ ကၠာဟွံတုက်သၠဲပ္တိတ်ဂၠံၚ်ဏီ ကၠအ်တၞံဆုနွံမံၚ်တံ မိက်ဂွံဂွံတၞံဆုတံဂှ်မ္ဂး အာထဗိုၚ်ကေတ် မာန်မံၚ်ဏောၚ်ဂှ် ဟီုလဝ်ကဵုညးအုပ်ဓုပ်ကွာန်နွံတုဲ လၟုဟ်တုက်သၠဲမံၚ်ဂၠံၚ်ဂှ် တိကၠအ်လ္ၚဵုဂှ် နူကဵုမုက်ဂၠံၚ် တုက်လုပ် အာပ္ဍဲကၠအ် ဗၞတ် (၁) ဖိဟ်/(၂) ဖိဟ်ဂှ် သွက်တိကၠအ် ပ္ဍဲမုက်ဂၠံၚ်ဂၠိၚ်မံၚ်တံဂှ် ဒးဂၠိုၚ်ဏောၚ် မိမဝ် ဆက်ဟီုလဝ်နွံရ။
ဒၞာဲတိဒးဒုၚ်တုက်လဝ်တံဂှ် တဵုလဝ်တၞံသတ်၊ ဒူရေၚ်၊ မၚ်ဂုတ်၊ တၞံထၜိုတ်နွံဗွဲမဂၠိုၚ်ကီု တိဒၞဲါလ္ၚဵုဂှ် ဒှ်တိဝါဗ္ၚတံဒှ်တုဲ ဂွံတုက်တိသ္ကဲဂၠံၚ်ဂှ် နူကဵုဌာနအလဵုအသဳတံ ကဵုလဝ်သမ္တီ ကုညးအုပ်ဓုပ်ကွာန်ဆေၚ်စပ်တံနွံကီုလေဝ် ပ္ညဳပ္ညပ်လဝ်ကဵု ညးတၠတိကၠအ်တံ ဟွံမွဲပုဟ်ဂှ် ညးတၠကၠအ်တံဟီုဂးမံၚ်နွံရ။
နူကဵုမွဲဂိတုပြၚ်ၚ်တေံ စသၠဲမံၚ်ဂှ်တုဲ တိကၠအ်ဒးအာတံဂှ် သွက်ဂွံကဵုအာသြန်လေဲဟၟဲမွဲသာ် ကၠောန်အာသမၠဲဂၠံၚ် (၄၀) ပေ ရောၚ် ညးအုပ်ဓုပ်ကွာန်ဟၚ်ဂါံ နာဲအေန် ဟီုရ။
“တိဒးအာတံဂှ် နူကဵုအလဵုအသဳ သွက်ဂွံကဵုအလေဲသြန်ဏောၚ်ဂှ် ဍေံဟီုလဝ်ဟွံမွဲပုဟ်။ သွက်ဂွံသၠဲဂၠံၚ်ဏံဂှ် ဍေံဗစူ လဝ်တိုၚ် ‘တိဂၠံၚ်’ (လမ်းနယ်) လောန်ကၠုၚ်နူကဵု ၜိုတ် ရ သၞာံတေံနွံမံၚ်။ ဂၠံၚ်ဏံဂှ် မိၚ်မံၚ် ဍေံသၠဲအာ စဵုကဵုစိုပ် ဍုၚ် ခေါဇာဏောၚ်” သာ်ဝွံ နာဲအေန် ဟီုရ။
ဂုဏ်ဖဵုဍုၚ်ကဵုဒှ်၊ ဂုဏ်ဖဵုသွက်ညးဍုၚ်ကွာန်ဟလိုၚ်ကဵုဒှ် တိဝါဗ္ၚသီကေတ်တံကီု၊ လ္တူတိဝါဗ္ၚတံ သွက်ဂွံဒှ်ပရေၚ် တဴတက်ဖောအ်ဗြေဝ်ဂးတုဲ ပွမသိုၚ်ခၞံကဵုဒှ် ညးဂွံလဝ် အခေါၚ်ကၠောန်တိတမ်မူလ ကၠောန်လွဳပရာလဝ်တံဂှ် ပရေၚ် ညံၚ်ဟွံဒးဒုၚ်ဆောံလေၚ်ဂှ် ပွမကဵုလေဲ ‘ဟွံသေၚ်မ္ဂး’ နကဵုနဲကဲတၞဟ် သွက်ဂွံကၠောန်ဖန်ဇန်ကဵုမာန်ဂှ် ဂကောံပါ် ပရအ်တိဍာ်ဗဟဵု (ဗဟိုလယ်ယာမြေစီမံခန့်ခွဲမှုအဖွဲ့)တံ ဒးပ္ညဳပ္ညပ်ကဵု ဌာနမဆေၚ်စပ်ရောၚ် ပ္ဍဲကဵုသၞောဝ်အခေါၚ် ကၠောန်တိဍာ် အခန် (၉)၊ ၝောံပိုဒ် (၂၆) ဂှ် ချူထမံက်လဝ်နွံရ။
ဂၠံၚ်လုပ်ဍုၚ်ခေါဇာဝွံ နူကဵုပါၚ်ဂၠံၚ်လုပ်ကွာန်ကလအ် စဵုကဵုစိုပ်ဍုၚ်ခေါဇာဝွံ ဇမၠိၚ်နွံမံၚ် ၁၅ တိုၚ် ၄ ဖာလုၚ်တုဲ ဂၠံၚ်ဝွံသၠဲအာ စဵုကဵုကွာန်ပါၚ်မၚ်ဂၠန်ရောၚ် ညးဒေသတံ ဟီုဂးမံၚ်နွံရ။
