ဂိတုဂျောန် ၂၆ ဂှ် ဒှ်တ္ၚဲဗ္တိုက်ပလီု ဂဥုဲၜူမာဲ အလုံဂၠးကဝ်ဏောၚ်တုဲ စိုပ်တ္ၚဲဂှ်မ္ဂး ဇာနှိက်သၟတ်မန် (ရေဝ်) ကီု၊ခမဳသၚ်ဇၞော်ဇၞော်ကေုာံ သၚ်သၟတ်မန်ကီု က္ဍိုက်ပ်တုဲ ကၠောန်အာ ပေါဲဒ္စဵုဒ္စး ဂဥုဲၜူမာဲ ပ္ဍဲဍုၚ်ရေဝ်ဏောၚ် ဂွံတီကေတ် နူကမ္မတဳဖန်ဇန်ပေါဲဒ္စဵုးဒ္စး ဂှ်ရ။

လိက်လလောၚ် သွက်ဂွံဒ္စဵုဒ္စး ဂဥုဲၜူမာဲ (Facebook)

“ ဂဥုဲၜူမာဲဂှ် လၟုဟ် ပြးဂၠိုၚ်တိုန်ကွေံကွေံရ။ မိမကောန်ၚ္ၚာ်တအ်လေဝ် ဗီုလဵုဂွံပ ကိစ္စဏအ်ရောဂှ် ချပ်ဟွံဒးအိုတ်ရ။ ကောန်ၚ္ၚာ် ဒးလဝ်ဂဥုဲၜူမာဲတအ်ဂှ်လေဝ် ပရေၚ်ထတ်ယုက်လေဝ်ယောၚ်၊ ပရေၚ်ပညာလေဝ် လီုကၠုၚ်ဂှ် ဂွံဆဵုမံၚ်ဂတမတ်။ ဒှ်သာ်ဂှ်ရ ပ္ဍဲအရာဗ္တိုက်ပလီု ဂဥုဲၜူမာဲဏအ် သီုခမဳသၚ်၊ သီုသၟတ်တအ်၊ သီုဂကောံနာနာ ကေုာံမိမ ညးဇၞော်ဍုၚ်ကွာန်တအ်လေဝ် ညံၚ်ဂွံပါလုပ်ကၠုၚ် စုုံစုံဇဳဇဳတုဲ ကၠောန်အစဳဇန်ဏအ်ရ။ ပါလုပ်သီုညးဖ်အိုတ်မ္ဂး ကိစ္စဗ္တိုက်ပလီုဂဥုဲၜူမာဲဏအ် အံၚ်ဇၞးမာန်ဏောၚ်” တၠဂုဏ်ကုသလ မချဳဒရာၚ် ပရေၚ်ဒ္စဵုဒ္စးဏအ် ဂးကဵု ဌာန်ပရိုၚ်မန်ရ။

ကိစ္စဂဥုဲၜူမာဲဏအ်ဂှ် နမၞိဟ်မွဲဓဝ်ရတှေ် ကာလလဵုမွဲဗ္တိုက်ပလီုဟွံမာန်ရ။ လ္ပာ်အလဵုအသဳ ၜိုန်ရပ် ကေတ်မံၚ်အရေဝ်ကီုလေဝ် အောန်အာဟွံသေၚ် ဂၠိုၚ်တိုန်ခ္ဍၚ်ရ။ ဒှ်သာ်ဂှ်ရ မိက်ဂွံကဵု ဌာနဆေၚ်စပ်တအ် ရပ်ပတေၚ်တိုန် ညံၚ်ဂွံစိုပ်တရဴကီုရ တၠဂုဏ်ကုသလ ဂး။

“ဟိုတ်နူဂဥုဲၜူမာဲဏအ်တုဲ အနာဂတ် သၟတ်ပိုဲတအ် ကၠေံမံၚ်ဏောၚ် ဒးဒုၚ်စသိုၚ်ရ။ ဣဏအ်ဂှ် ဒှ်အန္တရာဲဇၞော်ဇၞော် သွက်သၟတ်တအ်ရ။ ပရေၚ်ဂဥုဲၜူမာဲဏအ် ညံၚ်ဂွံကြဳစှေ် အောန်စှေ် အိုတ်အာဂှ် ပိုဲဒးဂၠာဲနဲဏောၚ်” နာဲဇမ္ဗုရတ် ညးရၚ်တၠုၚ်မံၚ် ဂကောံဇာနှိက်သၟတ်မန် (ရေဝ်) ဂှ် ဂးရ။

ပ္ဍဲတ္ၚဲတေံဂှ် ဘိက်လဝ် ညးတာလျိုၚ်နူဌာနမဆေၚ်စပ်တအ်ကီုတုဲ ပရူစပ်ဖျပ်ကဵု ဂဥုဲၜူမာဲကီု၊မၞိဟ်နိဿဲဂဥုဲၜူမာဲ ညံၚ်ဂွံအောန်စှေ်အာကီု၊ ပရေၚ်ကေတ်အရေဝ်/စောဲအမှု အတိုၚ်ဥပဒေကီု ဗီုလဵုသ္ပတှေ်ခိုဟ်ရောဂှ် သဳကၠဳအာညးသ္ကအ်ဏောၚ် နာဲဇမ္ဗုရတ် ဂးရ။

ကိစ္စဗ္တိုက်ပလီု ဒ္စဵုဒ္စး ဂဥုဲၜူမာဲဏအ် ပ္ဍဲစၟတ်တ္ၚဲ ဂျောန် ၂၆ ၊ ဒေါဝ်တ္ၚဲ ၜိုတ် (၁) နာဍဳ ကၠောန်အစဳဇန် ဟီုတွံ ပ္ဍဲဇြပ်သ္ဘၚ်ဓရ်မန် အရာပ် (ရန်မျိုးအောၚ်) ဍုၚ်ရေဝ်ဏောၚ်တုဲ အခိၚ်တ္ၚဲစေၚ် ၜိုတ် (၃) နာဍဳမ္ဂး ရပ်ကဝါ်ဏာ ပဝ်သတာတုဲ နကဵုရမျှာၚ် ဒ္စဵုဒ္စး ကညာၚ်ဇက်အာ လ္ပာ်ကျာ်ဒေါဝ်ဍုၚ် တေံဏောၚ် ကမ္မတဳကၠောန်ဗဒှ် အစဳဇန်ဏအ် ဂးရ။

ပ္ဍဲတွဵုရးမန်ဝွံ ပပ္တံနူ သၞာံ ၂၀၁၁ ဒဵုကဵု ၂၀၁၅ ဂိတုအံက်တဝ်ဗာအိုတ် အပ္ဍဲပွိုၚ် (၅) သၞာံဏအ် နူဌာနဆက်စပ်တအ် ရပ်စပ်ကေတ်အရေဝ် ပရေၚ်ဂဥုဲၜူမာဲဂှ် နွံ (၄၂၄) အမှုတုဲ ကောန်ဒုဟ်ဂှ် နွံ( ၆၅၈) တလ ဂွံတီကေတ် အတိုၚ်လိက်စၟတ်သမ္တီဂမၠိုၚ် ရ။