လညာတ် ဗော်ပရေၚ်ဍုၚ်ကွာန်ဂမၠိုၚ် (ကောန်ဂကောံ UNA) မကျလဝ်မာဲ ပေါဲရုဲမာဲ ၂၀၁၅ တအ်လေဝ် ညံၚ်ဂွံပါကီုဂှ် ဗော်ပရေၚ်ဍုၚ်ကွာန် မဇၞးလဝ်မာဲတအ် သ္ပစၞး ပ္တိုန်ထ္ၜးကဵု ပ္ဍဲသ္ဘၚ်သဳကၠဳ ပေန်လုၚ် ၂၁ ဗွဝ်ကၠံတေံကီုဏောၚ် ရဴဝွံ ဂွံတီကေတ် နူကောန်ဂကောံ UNA ရ။
UNA ကေုာံ မဟာမိတ်ညးတအ် ပ္ဍဲကာလပေါဲသဳကၠဳ ၂၀၁၅ (UNA)
“ဗော်ဂမၠိုၚ် မကျလဝ်ပေါဲရုဲမာဲ မဒှ်ကောန်ဂကောံ UNA ဂှ် မိက်ဂွံပ္တိုန်ထ္ၜးလညာတ်၊ မိက်ဂွံပ္တိုန်ထ္ၜးလိက်ကၞပ် နွံကီုမ္ဂး ဗော်မိတ် မဇၞးမာဲ ဂွံအခေါၚ်တိုန်တအ် လ္ၚတ်ထ္ၜံကေတ် လညာတ်ညးတအ် လိက်ကၞပ်ညးတအ်တုဲ ရမျှာၚ်ညးတအ် ညံၚ်ဂွံလုပ်စိုပ်သ္ဘၚ်သဳကၠဳဂှ် ရၚ်တၠုၚ်ဏာဏောၚ်၊ ရမျှာၚ်ညံၚ်ဂွံဒှ်မွဲဂှ် ပ္ညဳညးသ္ကအ်ဏောၚ်၊ တုဲတှေ် စၞးညးတအ်ဂှ် ညးစၞးဗော်မဇၞးလဝ်မာဲတအ် ပ္တိုန်ထ္ၜးကဵုဏောၚ်”ဥူသာၚ်လိက် ဖက်ဆောညးအုပ်ကာ (၁) ဗော် SNLD (ကောန်ဂကောံ UNA) ဂးရ။
ဒဝ်အံၚ်သာန်သုကျဳ (ညးကဵုကသပ်ဂၞန်ကၟိန်ဍုၚ်) ဂးကၠုၚ်လဝ်ဂှ် အခါကၠောန်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံတေံမ္ဂး ဗော်ပရေၚ်ဍုၚ်ကွာန်ဂလိုၚ်တအ် ဒုၚ်သဇိုၚ်ကဵု ပွမသ္ပစၞး ကၠတ်ထဝ်အဆံၚ်အဆံၚ်တုဲ ရၚ်တၠုၚ်အာဏောၚ် ပတှေ်လဝ်ရ၊ ဗော်ပရေၚ်ဍုၚ်ဟီုဂှ်လေဝ် အလုံဗော်ပရေၚ်ဍုၚ်ကွာန် (၉၀) ပြၚ်ဂှ်ဟွံသေၚ်ရ၊ ပ္ဍဲကဵုကၠတ်ထဝ်မွဲမွဲ ယြဴဗော်ပရေၚ်ဍုၚ်ကွာန်မွဲ အောန်အိုတ် ဂွံလဝ် ညးစၞးမွဲတလမာန်မ္ဂး ဗော်မဖှ်သာ်ဂှ်ဟေၚ် ပၠောပ်အဝေါၚ် ဒဒှ်ညးစၞး သ္ဘၚ်သဳကၠဳ ပေန်လုၚ်ဂှ်ဏောၚ် ဂးကၠုၚ်လဝ်ရ။
ဒှ်သာ်ဂှ်ရ အတိုၚ်လဟီုညးမ္ဂး သွက်ဗော်ပရေၚ်ဍုၚ်ကွာန် မွဲတလလေဝ် ဟွံဂွံလဝ်ညးစၞး ပ္ဍဲပေါဲမာဲ ၂၀၁၅ ဂှ်မ္ဂး အခေါၚ်တိုန် သ္ဘၚ်သဳကၠဳ ပေန်လုၚ် ၂၁ ဗွဝ်ကၠံဂှ် ဂွံဟွံမာန် ဂွံတီကေတ်ရ။
ပ္ဍဲပေါဲရုဲမာဲ ၂၀၁၅ တုဲကၠုၚ်ဏအ် ဗော်ပရေၚ်ဍုၚ်ကွာန် (ကောန်ဂကောံ UNA) မဂွံလဝ်ညးစၞးကၠတ်ထဝ် သီုပိအဆံၚ် (ကၠတ်ထဝ်ညးဍုၚ်၊ကၠတ်ထဝ်ကောန်ဂကူ၊ ကၠတ်ထဝ်ရးဇၞော် ဟွံသေၚ်သာ်ဂှ် ကၠတ်ထဝ်တွဵုရး) ဂှ် ဗော်ဂဥုပ် ဒဳမဝ်ကရေဇြဳ ဂကူကောန်ဍုၚ်အရၚ်သေံ SNLD၊ ဗော်ကောန်ဂကူရခေၚ် ANP ၊ ဗော်ဂဥုပ်ဒဳမဝ်ကရေဇြဳ ဇြဵုမဳ ZCD၊ ဗော်ကောန်ဂကူမန် MNP တအ်ရ။
ဗော်ပရေၚ်ဍုၚ်ကွာန် ကောန်ဍုၚ်အရၚ် ၈ ဗော် မဇၞးလဝ် ပေါဲရုဲမာဲ ၁၉၉၀ ဂှ် ပံက်ကၠုၚ်လဝ် ဂကောံညဳသာမဟာမိတ် ဂကူကောန်ဍုၚ်အရၚ်ဂမၠိုၚ် UNA တုဲ ပ္ဍဲကောံဓရီုဂကောံ UNA ဂိတုမေ (၇) သၞာံ ၂၀၁၆ ဂှ် ထပ်ဒုၚ်တဲကဵု ဗော်ကောန်ဍုၚ်အရၚ် ၄ ဗော် မအာတ်လုပ်ဂကောံဂှ်ပၠန်တုဲ လၟုဟ်မ္ဂး ပ္ဍဲဂကောံ UNA ဂှ် ဗော်ပရေၚ်ဍုၚ်ကွာန် ကောန်ဍုၚ်အရၚ် နွံကၠုၚ် ၁၂ ဗော်ဣရ။
ဗော်ဂောန်ဂကောံ UNA မဇၞးလဝ်မာဲတအ်ဂှ်ဝွံ လညာတ်နူကဵု ဗော်ကောန်ဂကူကရေၚ်၊ ဗော်ကောန်ဂကူ ကယာန်၊ ဗော်ဒဳမဝ်ကရေတ်တေတ် ကဝ်က ရးသေံဇၞော်၊ ဗော်ကန်ဂရေတ် ဒဳမဝ်ကရေဇြဳ ကောန်ဂကူကချေၚ် မကျမာဲ တအ်သၟးဟွံက လညာတ် နူဗော်ကောန်ဂကူခူမဳ (ခမဳ) ၊ ဗော်ဆာန်ဂကူရခေၚ်၊ ဗော်ဒဳမဝ်ကရေဇြဳ ကောန်ဂကူမြဵု ၊ ဗော်ဒဳမဝ်ကရေဇြဳ ဂကူကောန်ဍုၚ်အရၚ်ဓနု မဒှ်ကောန်ဂကောံတၟိတအ်ဂှ်လေဝ် ဒုၚ်ကေတ်တဲတုဲ ညးစၞး UNA မဇၞးလဝ်မာဲ တအ် သ္ပစၞး ပ္တိုန်ထ္ၜးကဵု ပ္ဍဲသ္ဘၚ်သဳကၠဳ ပေန်လုၚ် ၜိုဟ်လလံဍုၚ် ၂၁ ဗွဝ်ကၠံတေံကီုဏောၚ် ဂွံတီလဝ်ရ။
သ္ဘၚ်သဳကၠဳ ပေန်လုၚ် သွက်ၜိုဟ်လလံဍုၚ် ၂၁ ဗွဝ်ကၠံဂှ် ညံၚ်ဂွံကၠောန်ဗဒှ်မာန် ပ္ဍဲဂိတုဂျူလာဲ ဖါအိုတ် ဟွံသေၚ်တှေ် ၜိုတ်ဂိတု အဝ်ဂေတ် မံက်တေံဂှ် နူအလဵုအသဳ ဂစာန်ဖန်မံၚ်ဖိုဟ်ရ။
