ပ္ဍဲသၞာံဗ္တောန်ပညာ (၂၀၁၆-၂၀၁၇) ဝွံ အတိုၚ်လၟေၚ်ဗ္တောန် ဇုတ်ဓရံၚ်ပညာ ဘာအလဵုအသဳမ္ဂး ကဏ္ဍလိက်ပတ် ကောန်ဍုၚ်အရၚ်တအ် ဟွံပါလုပ်ဏီတုဲ ပ္ဍဲကာလ မ္ၚးနူအခိၚ်ဘာဂှ်ဟေၚ် ဒးဗ္တောန်ဏောၚ် ဂွံတီကေတ်ရ။

ကောံဓရီုတၟေၚ် ကၠတ်ထဝ်တွဵုရးမန် (၁/၂၀၁၆) (MNA)

“ကဏ္ဍလိက်ပတ် ကောန်ဍုၚ်အရၚ်တအ်ဂှ် ဟိုတ်နူဟွံလုပ် ပ္ဍဲဇုတ်ဓရံၚ် လၟေၚ်ဗ္တောန်ဏီဂှ်ကီု၊ အခိၚ်ပရေၚ်ဖေါအ်ဗြေဝ်ဘာဂှ်လေဝ် ပ္ဍဲမွဲသတ္တဟတှေ် နွံမွဲအလန်ဓဝ်ကီုတုဲ လိက်ကောန်ဍုၚ်အရၚ် ယဝ်ဗ္တောန် ပ္ဍဲအခိၚ်ပရေၚ်ဖေါအ်ဗြေဝ်ဂှ်မ္ဂး မွဲသတ္တဟတှေ် ဂွံဗ္တောန် ဗၞတ်မွဲဝါဟေၚ်ကီုရဏောၚ် ဒှ်မံၚ်ဗီုဂှ်” သာ်ဝွံ ဒံက်တာထိၚ်ဠေန် ဝန်ဇၞော်ပရေၚ်မၞိဟ် အလဵုအသဳတွဵုရးမန် ဂးရ။

ပ္ဍဲကောံဓရီုတၟေၚ် ကၠတ်ထဝ်တွဵုရးမန် (၁/၂၀၁၆) ဂှ် ဥူထောန်မေန်အံၚ် ဥက္ကကမ္မတဳသွာၚ်ကောန်ဍုၚ်အရၚ် ဟီုဂးလဝ် “ကိစ္စဗ္တောန်လိက်ကောန်ဍုၚ်အရၚ် ညံၚ်ဂွံဒှ်ချိုတ်တ်ပၠိုတ်တ် ဖန်ဇန်ကဵုကီုညိ” ဟီုဖ္တိုက်ဖၟောဝ်လဝ် သာ်ဂှ်တုဲ နကဵုဒံက်တာထိၚ်ဠေန် ဟီုထံက်တိုန် ဂလာန်လ္တူတေံရ။

နကဵုအ္စာတြုံတြုံ/ဗြဴဗြဴ မဂၠေၚ်ဝန် ဗ္တောန်လိက်ကောန်ဍုၚ်အရၚ်တအ် ယဝ်ဗ္တောန် အပ္ဍဲအခိၚ်ဗ္တောန်လိက်မ္ဂး သၟာၚ်နူခရိတ်ဂိတုလၟေၚ်ၚ်ဂှ်တုဲ သြန်ခရိတ်ထံက်ပၚ်လေဝ် ထပ်ဂွံအပ္ဍဲအခိၚ်ဗ္တောန်လိက်ဘာဂှ်ကီုဏောၚ် နွံသဘဴသာ်ဂှ်ရ။ ညးနွံပၟိက် မိက်ဂွံဗ္တောန် လိက်ကောန်ဍုၚ်အရၚ် မွဲအဆက်ကဵုအခိၚ်ဘာတအ် ညံၚ်ဂွံဗ္တောန်မာန် ပြေပြေပြံၚ်ၚ်ဂှ် ပ္ညဳဗ္တောန်အာညးသ္ကအ်ဏောၚ် ညးဆက်လဴထ္ၜးရ။

“လၟေၚ်ဗ္တောန် သွက်သၞာံဏအ် ပိုဲဓဇက်စွံအခိၚ်တုဲယျ၊ တန်မူလတှေ် အခိၚ်ဗ္တောန်လိက် နွံမူစိအခိၚ်ဂှ် ပိုၚ်ခြာစွံလဝ် အခိၚ်ဗ္တောန် ချိုတ်တ်ပၠိုတ်တ်တုဲယျတှေ် လိက်ကောန်ဍုၚ်အရၚ် ဂွံလုပ်ဗ္တောန် ပ္ဍဲအခိၚ်ဘာဂှ် ဒှ်ဟွံမာန်ရ၊ မ္ၚးနူအခိၚ်ဘာရ ဂွံအခေါၚ်ဗ္တောန်ဏောၚ်” သာ်ဝွံ ဥူမျဵုတေအ်အံၚ် သ္ကိုပ်စၞောန်ပ္ညုၚ် နူရုၚ်သ္ကိုပ်ပရေၚ်ပညာ တွဵုရးမန် ဟီုလဴကဵု ဌာန်ပရိုၚ်ဗၠးၜးမန်ရ။

သွက်အ္စာ တြုံ/ဗြဴ ဗ္တောန်ကဵု လိက်ကောန်ဍုၚ်အရၚ်တအ်ဂှ်လေဝ် ပြဟ်ဟ်ဏအ် သြန် (ဗာတ်ဂျေတ်) ဟွံမွဲဏီ၊ တုဲပၠန် လၟုဟ်ဂှ် ဗက်ကေတ်ဒၟံၚ်စရၚ် လၟိဟ် အ္စာဘာ တြုံ/ ဗြဴ သီုကဵုစရၚ် လၟိဟ်ကွးဘာတအ်တုဲ၊ သြန်ထံက်ပၚ်လေဝ် ဒးကေတ်ၜိုတ်မူစိဂှ် ဟီုချိုတ်တ်ပၠိုတ်တ် ဟွံမာန်ဏီ ညးဆက်ဟီုရ။

သၞာံဗ္တောန်ပညာ သၞာံအာဏအ် အ္စာဘာ တြုံ/ဗြဴ မဗ္တောန်ဒၟံၚ် လိက်ကောန်ဍုၚ်အရၚ်ဂှ် မွဲဂိတုမ္ဂး ဂွံခရိတ်ထံက်ပၚ် (၃) ဠက်ဒကေဝ်ဓဝ်ရ။ ပ္ဍဲသၞာံပညာ ၂၀၁၆-၂၀၁၇ ဏအ် ဂွံဗာတ်ဂျေတ် ဂၠိုၚ်မ္ဂး ခရိတ်ထံက်ပၚ်ဂှ်လေဝ် ဂလိုၚ်ကဵုကီုဏောၚ်၊ ဇၟာပ်ပ်ဂိတု ပ္တိတ်ကဵုညံၚ်ဂွံမာန် ပ္တိုန်ထ္ၜး ပ္ညဳပ္ညပ်လဝ် ကုဝန်ဇၞော် ပရေၚ်ပညာ ကၟိန်ဍုၚ်တုဲရဂှ်လေဝ် သ္ကိုပ်စၞောန်ပ္ညုၚ်ဂှ်ဂးရ။

“ပိုဲၜိုတ်ဆဵုကၠုၚ်အ္စာဘာ တြုံ/ဗြဴ မန်၊ ကရေၚ်၊ ပအိုအ် ပိုဲတအ်မ္ဂး ဗလးဘာတုဲဏောၚ် ဒးဗ္တောန်မ္ဂး ဂွံကလေၚ်ပကောံကွးဘာဂှ် ဟွံလောဲသွာ ဟွံပြေပြံၚ် ဂးရ၊ ဒၟါနူဂှ်ရ ညံၚ်ဂွံဂွံအခိၚ်ဗ္တောန် ပ္ဍဲအခိၚ်ဖေါအ်ဗြေဝ်ဘာဂှ် ဒးအာတ်မိက်လဝ်” ဥူထောန်မေန်အံၚ် ဂးရ။

စပ်ကဵုလိက်ကောန်ဍုၚ်အရၚ်မ္ဂး ပ္ဍဲတွဵုရးမန်ဏအ် ပပ္တံနူသၞာံ ၂၀၁၃ တေံရ ဗ္တောံကၠုၚ်ဒၟံၚ် လိက်မန်၊ ကရေၚ်၊ ပအိုအ် တုဲ အ္စာဒးဗ္တောန်ဒၟံၚ်တအ်ဂှ်လေဝ် ဂွံဒုၚ်ကေတ် ခရိတ်ဂိတု ဇၟာပ်ပ်ဂိတုဟွံသေၚ်၊ သၞာံဗ္တောန်လိက် အိုတ်တုဲဟေၚ် ဂွံဒုၚ်ကေတ် ခရိတ်ဂိတုရ ဂွံတီကေတ်။

ပ္ဍဲသၞာံဗ္တောန်ပညာ သၞာံအာဂှ်ဝွံ အပ္ဍဲတွဵုရးမန်ဏအ် ဘာအလဵုအသဳ နွံ (၂၅၈) ဘာ၊ အ္စာတြုံ အ္စာဗြဴ မဂၠေၚ်ဝန် အလဵုအသဳဂှ် နွံ (၂၀၆) တလ၊ အ္စာံဗြဴမန် မ္ၚး (၂၈၁) တလ ကေုာံ ကွးဘာ တြုံတြုံ/ဗြဴဗြဴ ဗ္ဒါဲ (၃) ဠက် ကတ်ဗ္တောန်ဒၟံၚ်လိက်ကောန်ဍုၚ်အရၚ်ရ ဂွံတီကေတ်။