ယဝ်ဒေမၠံသြန်ဂွံ နူတိုက်ဘဏ္ဍာပရေၚ်ဖေါအ်ဗြေဝ်အာယှ ADB မ္ဂး ကိုန်အစဳဇန် ရုၚ်ပါ်ပရးဓါတ်လလဳ ကေုာံ တောဲဖျေံဓါတ်လလဳ နူမတ်မလီု-ရေဝ်-ထဝါဲဂှ် ဆက်ဓမံက်ရုပ်ရဴရောၚ် သာ်ဝွံ ပ္ဍဲကောံဓရီုလၟေၚ်ဍာံ ကၠတ်ထဝ်ညးဍုၚ်ကွာန် အလန်ဒုတိယ တ္ၚဲသေပ်တေမ်ဗာ ၂၆ ဂှ် ဒံက်တာထောန်နာၚ် ဒုဝန်ဇၞော် နူဌာနဝန်ဇၞော်အစောံဒြဟတ်ကဵုဓါတ်လလဳ ဂးလဝ်ရ။

သွက်ပွိုၚ်ဍုၚ်ရေဝ် ဟွံက္လိဂွံပၟတ်ဓါတ်လလဳ အလဵုအသဳဏီဂှ် ပ္ဍဲသၞာံဘဏ္ဍာဂတတေံ သွက်ဂွံတောဲနူကဵုၝောံဇုက် ဓါတ်လလဳဇၞော်ဂှ် အစဳဇန်နွံ/ဟွံမွဲ သာ်ဝွံ ဒံက်တာအံၚ်ထောန်ခါၚ် ညးစၞးကၠတ်ထဝ်ညးဍုၚ် နူဒေသမာဲပွိုၚ်ဍုၚ်ရေဝ် ပ္တိုန်ဂလာန်သၟာန်ပ္ဍဲကၠတ်ထဝ်ဂှ်တုဲ ဒုဝန်ဇၞော် ဒံက်တာထောန်နာၚ် ကလေၚ်ဟီုသှ်ကဵု အတိုၚ်ဗွဲလ္တူဂှ်ရ။

အတိုၚ်ကောံဓရီု ဂကောံအလဵုအသဳကၟိန်ဍုၚ် လၟေၚ်ဂၞန် ၈/၂၀၁၆ ဂှ်မ္ဂး နူကဵု ADB ရန်လဝ်သြန်ဒေမၠံ ဒဝ်ဠာအမေရိကာန် သၟဝ် ၅၀၀ ပြကောဋိကိုဋ် သွက်ကိုန်အစဳဇန် ပါ်ပရးဓါတ်လလဳ ၃ သွာၚ်ဂှ် ပၠောပ်လဝ်ကိုန်အစဳဇန်ဏံတုဲ ပလံၚ်ဗ္စိုပ်လဝ် လိက်ပၠောပ်ဂလာန်ရ၊ အဃောကာလ ပ်ညဳပ်ညပ်သဳကၠဳလဝ်ကု ADB ဂှ် နူ ADB ရီုဗၚ်ထံက်ပၚ် ကိုန်အစဳဇန်ရောၚ်ဂှ် နူဝန်ဇၞော် သှ်ထ္ၜးတုဲ ဂွံတီကေတ်ရ။

“လၟိဟ်ညးတံ ဒေမၠံကဵုသြန်ဂှ် ဟိုတ်နူနွံကဵု ဗ္ၜတ်အပိုၚ်အခြာဂှ်ရ လၟိဟ်သြန်နွံပၟိက်ဂှ် ဟွံပေၚ်ဏီမ္ဂး ဒးဂၠာဲ အဆက်အဆေန် ညးဒေမၠံကဵုသြန်ပၠန်ဏောၚ်၊ အခါရဂၠာဲမ္ဂး ညးတံလေဝ် ဗိုၚ်ရီုဗၚ်ကီုဏောၚ် ဂးကၠုၚ်လဝ်နွံ” သာ်ဝွံစပ်ကဵုပရေၚ်ဒေမၠံသြန်တုဲ ဒံက်တာထောန်နာၚ် ဟီုလဴက္လးသာ်ဂှ်ရ။

သွက်ကိုန်အစဳဇန် အဆံၚ် ၂၃၀ ကေဗဳဂှ် အိက်သြန်ဟွံပါ တၟော်လဝ် ဒဝ်ဠာအမေရိကာန် လၟိဟ်ပြကောဋိကိုဋ် ၁၀၃.၄ ပြကောဋိကိုဋ် အိုတ်မာန်ရောၚ်တုဲ အေနှန်အိက်သြန် ADB ဂှ် ပ္ဍဲပွိုၚ် ၈ သၞာံ ကာလဟွံဒးဆာပ်လေဲ (ဆိုၚ်းၚံ့ကာလ) ဏီဂှ် ဗၞတ်မွဲတၟံကၠံ၊ ပွိုၚ် ၂၄ သၞာံ ကာလဒးဆာပ်လေဲဂှ် အိက်ဍေံ ၁.၅ တၟံကၠံ ဂွံတီကေတ်ရ။

ပ္ဍဲလက်ထက်အလဵုအသဳတုဲကၠုၚ်တေံ ၜိုန်ရန်လဝ် သွက်ဂွံဓမံက်ရုပ်ရဴ နကဵုသြန်ဒေမၠံကေတ် နူတိုက်ဘဏ္ဍာကြုက် Exim Bank ကီုလေဝ် အခိုက်အလိုက် ဒးဖန်ဇန် ဆေၚ်ကဵုဒေမၠံသြန်ဂှ် ဟိုတ်နူအခိၚ်လံလလောန်ကီု၊ အေနှန်အိက်သြန်လေဝ် ဂၠိုၚ်ကီု၊ အခါကေတ်ကပေါတ်ပၠန်လေဝ် ဒးကေတ်ကပေါတ်ကြုက်ဟေၚ်ရ ဂးလဝ်သာ်ဂှ်ကီုတုဲ သွက်ဂွံဓမံက်ရုပ်ရဴ ကိုန်အစဳဇန် နပွမဒေမၠံသြန် နူကြုက်ဂှ် ဒှ်ဟွံမာန်ရတုဲ အလဵုအသဳတၟိဏံ ပါဲကၠေံရ ဂွံတီကေတ်။

ပ္ဍဲတွဵုရးမန် ၉ ပွိုၚ်ဍုၚ်ဂှ် က္လိဂွံပၟတ်ဓါတ်လလဳအိုတ်ရဒှ်တုဲ သှေ်ပွိုၚ်ဍုၚ်ရေဝ်မွဲရ ဟွံက္လိဂွံပၟတ်ဓါတ်လလဳဏီ။ ပ္ဍဲလက်ထက် အယုက်ကၠတ်ထဝ်အလန်ပထမ အလဵုအသဳတုဲကၠုၚ်တေံ ညးစၞးကၠတ်ထဝ်ညးဍုၚ် နူဒေသမာဲ ပွိုၚ်ဍုၚ်ရေဝ် ၜိုန်သၟာန်ကၠုၚ်လဝ်ကၠတ်ထဝ် လုကဴပိဝါတုဲကီုရလေဝ် ဒဵုလၟုဟ် ဟွံက္လိဂွ္ပံပၟတ်ဓါတ်လလဳ အလဵုအသဳဏီ ဒံက်တာအံၚ်ထောန်ခါၚ် ဟီုလဴထ္ၜးဏာကီုရ။

ဒေမၠံဂွံသြန်တံဂှ်မ္ဂး ဓမံက်အာရုပ်ရဴ ကေမၠာန်ပရေၚ်တောဲပၟတ်ဂှ်ရောၚ်၊ သွက်ပွိုၚ်ဍုၚ်ရေဝ် သ္ဂောံဂွံပၟတ်ဓါတ်လလဳဍုၚ်ဂှ် နကဵုဌာနဝန်ဇၞော်လေဝ် ဆက်ဂစာန်အာရောၚ်ဂှ် ဒံက်တာထောန်နာၚ် ဒုဝန်ဇၞော် နူဌာနဝန်ဇၞော် အစောံဒြဟတ်ကဵု ဓါတ်လလဳ လဴထ္ၜးကီုရ။

ကာလလၟုဟ်ဏံ အပ္ဍဲပွိုၚ်ဍုၚ်ရေဝ်ဂှ် ပၟတ်ဓါတ်လလဳပုဂ္ဂလိက နူကမ္ပဏီ (မြတ်သူရထွန်း) ပါ်ပရးကဵုလဝ်ပၟတ် ပွိုၚ် ၂၄ နာဍဳ ပ္ဍဲလ္တူဍုၚ်ရေဝ်ဂှ် (၉) အရာပ် ကေုာံ ကွာန်သၞေဟ်ကာ၊ အစေန်၊သၞေဟ်ဓမၚ်၊အၜဝ်၊ ပါၜဳ၊ ဒူရာတံတုဲ မွဲယူဏေတ်မ္ဂး (၃၅၀) ဒကေဝ် ဂွံတီလဝ်ရ။