ပ္ဍဲအသေအဟာန် သ္ဘၚ်သဳကၠဳပရေၚ်ၜိုဟ်လလံဍုၚ် (ပေန်လုၚ် ၂၁ ဗွဝ်ကၠံ) တ္ၚဲဒုတိယ နူဗော်ကောန်ဂကူမန် ဂွံအခေါၚ်ပ္တိုန်ထ္ၜးလိက်စံၚ်တုဲ အပ္ဍဲဂှ်ဝွံ “ညံၚ်မဂွံစဒၟံၚ်သွဟွံမွဲကဵုၜဵုကီုရ” သာ်ဝွံ ရန်ကဵုသ္ဘၚ်သဳကၠဳဂှ်တုဲ နာဲလျးတၟး (ညးအုပ်ကာ ဗော်MNP) မတိုန်ဗှ်လိက်စံၚ်ဂှ် ဟီုဂးဏာ ပ္ဍဲဂလာန်ရုပ်နိဂီုရ။

“သွဟ်သ္ဘၚ်သဳကၠဳမကၠောန်ဒၟံၚ်တ္ၚဲဏံဂှ် ညးဍုၚ်ကွာန် အလုံမွဲဍုၚ်တံ စၟဳမံၚ်ဖအိုတ်ဏောၚ်။ ဆ္ဂး သ္ဘၚ်သဳကၠဳ ပိုဲကၠောန်မံၚ်တ္ၚဲဏံဂှ် ဆၜိုတ်တိုန်ဗှ်လိက်စံၚ်၊ ဆၜိုတ်သ္ပလဝ်စၟတ်သမ္တီဓဝ်ရ၊ ဟွံဖျေံသ္ဂုတ်သွာတ်ပုဟ်၊ ဒၟါနူဂှ်ရ ဟိုတ်နူဒှ်သ္ဘၚ်သဳကၠဳ ဟွံမွဲကဵုသွဟ်ဂှ်ရ ညံၚ်မ္ဒးစဒၟံၚ်သွဟွံမွဲကဵုၜဵုကီု ဒးဒုၚ်စ” နာဲလျးတၟး ဂးရ။

ပ္ဍဲဂိတုသေပ်တေမ်ဗာ ၁ မံက် မဒှ်တ္ၚဲတ္ၚဲဒုတိယ အသေအဟာန်သ္ဘၚ်သဳကၠဳ ပေန်လုၚ် ၂၁ ဗွဝ်ကၠံ ဂှ် ညးစၞး နူဂကောံအလဵုအသဳဂှ် ၄ တၠ၊ နူဂကောံကၠတ်ထဝ်ဂှ် ၄ တၠ၊ နူဂကောံဒပ်ပၞာန်ဂှ် ၄ တၠ၊နူဂကောံရပ်လွဟ် ကောန်ဍုၚ်အရၚ် ထ္ပက်စၟတ်တဲ NCA တုဲဂှ် ၉ တၠ၊ နူဂကောံ ဗော်ပရေၚ်ဍုၚ်ကွာန်ဂှ် ၁၂ တၠ၊ အပံၚ် ၃၂ တံဝွံ စပ်ကဵုပရေၚ်ၜိုဟ်လလံဍုၚ်တုဲ အတိုၚ်လညာတ် ဂကောံညးကဵုညးဂှ် ညးမွဲတၠတှေ် တိုန်ဟီုကၠုၚ်ဂလာန် ၜိုတ် (၁၀) မိဏေတ်ရ။

လိက်စံၚ် နွံကဵု မူသဇိုၚ် ၁၈ တၚ် သွက်ဂွံဒက်ပ္တန်ကၟိန်ဍုၚ်ပံၚ်ကောံ သၞောတ်ဖေဝ်ဒရေဝ်ကီု၊ သွက်ဂွံပဠေဝ်သၞောဝ် ၂၀၀၈ ကီု နကဵုဗော်ကောန်ဂကူမန် တက်ပရးလဝ် ဂွံဆဵုကေတ်ရ။

ပ္ဍဲလိက်စံၚ်ဂှ်ဝွံ ညံၚ်ဂွံဒှ်ကၟိန်ဍုၚ် ဟွံဒုၚ်သဇိုၚ်ကဵု ပရေၚ်ဘာသာ၊ ဒပ်ပၞာန်ကၟိန်ဍုၚ်ပံၚ်ကောံ၊ ဒပ်ပၞာန်တွဵုရး ကောန်ဂကူဂမၠိုၚ် ၊ ဒပ်ဗၠာဲသၟိၚ် ကၟိန်ဍုၚ်ပံၚ်ကောံ၊ ပွမဒက်ပ္တန်တွဵုရးတၟိတၟိ သွက်ကောန်ဂကူ နမပ္တံသာ်ဝွံ တၞီလုပ်လၟိဟ်အိုတ်ရ။ လိက်စံၚ် ဗော်ကောန်ဂကူမန် မၞုံကဵုမူသဇိုၚ် ကၟိန်ဍုၚ်ပံၚ်ကောံဖေဝ်ဒရေဝ် မပ္တိုန်ထ္ၜးလဝ် ပ္ဍဲအသေအဟာန်ဂှ်ဝွံ ဒှ်တၚ်သ္ဂုတ်သွာတ် မကၠုၚ်နူကောံဓရီုဇၞော် ပရေၚ်ဂကူမန် သၞာံ ၂၀၁၆ ပ္ဍဲဂိတုအဝ်ဂါတ် တတိယသတ္တဟတေံရဂှ်လေဝ် ဂးလဝ် ပ္ဍဲဂလာန်မြော်ဂှ်ကီုရ။

ဗော်ဒဳမဝ်ကရေဇြဳအလုံရးမန် AMDP ဟဂွံတိုန်လဝ် ကောံဓရီုဇၞော် ပရေၚ်ကောန်ဂကူမန်(၂၀၁၆) ဂှ်လေဝ် ခၞံလဝ်လိက်စံၚ် နကဵုကဏ္ဍ ၅ သာ်မ္ဂး ပရေၚ်ဍုၚ်ကွာန်၊ ပရေၚ်ဂီုကၠီု၊ ပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်တိ ကေုာံအရာဆေၚ်ကဵု သဘာဝပွဳပွူတံ နွံကီုတုဲ ပ္ဍဲသေပ်တေမ်ဗာ ၂ မံက် မဒှ်တ္ၚဲတတိယ အသေအဟာန် ပေန်လုၚ် ၂၁ ဗွဝ်ကၠံဂှ် ဂွံအခေါၚ်တိုန်ဗှ်လိက်စံၚ်ဂှ်ကီု ဂွံတီကေတ်ရ။

ဆ္ဂး ဗော်ဍုၚ်မန်တၟိ NMSP မတိုန်ဒၟံၚ် ပေန်လုၚ် ၂၁ ဗွဝ်ကၠံဂှ်လေဝ် အစဳဇန်သွက်ဂွံဟီုမြော်ဂလာန် ပ္ဍဲသ္ဘၚ်သဳကၠဳဂှ် ဟွံချိုတ်ပၠိုတ်ဏီ ဂွံမိၚ်လဝ်ရ။

ပ္ဍဲအစဳဇန် တိုန်ဟီုဂလာန် စှ်စှ်မိဏေတ် ပ္ဍဲတ္ၚဲသေပ်တေမ်ဗာ ၁ မံက်ဂှ် ဂကောံရပ်လွဟ်ကောန်ဍုၚ်အရၚ် ဟဂွံတ္ပက်စၟတ်တဲ NCA ဏီတံ တိုန်မြော်ဂလာန် ဟွံမွဲကၠုၚ်ရ။

ဗီုဂှ်ကီု ဗော်ညဳသၟဟ်ဝ UWSP/USSA ဟဂွံထ္ပက်စၟတ်တဲ NCA ဏီဂှ် ညးစၞးဗော်ညးတံ ၜိုန်စိုပ်ကၠုၚ် သ္ဘၚ်သဳကၠဳဂှ်ကီုရလေဝ် ပ္ဍဲအခိၚ်ဒေါဝ်တ္ၚဲဂှ် က္လေၚ်ဂတးစဴအာ ဌာန်ဂအုပ်ညးတံ သာ်ဝွံ ဂွံဆဵုညာတ်ကေတ် ပ္ဍဲပရိုၚ်ဂမၠိုၚ်ရ။

ပ္ဍဲသ္ဘၚ်သဳကၠဳပရေၚ်ၜိုဟ်လလံဍုၚ် (ပေန်လုၚ် ၂၁ ဗွဝ်ကၠံ ) အလန်ပထမဏံဝွံ နူဗော်ဍုၚ်မန်တၟိ NMSP ဂှ် ညးစၞး ၁၄ တၠ၊ နူဗော်ကောန်ဂကူမန် ညးစၞး ၈ တၠMNP၊ နူဗော်ဒဳမဝ်ကရေဇြဳအလုံရးမန် AMDP ဂှ် ၈ တၠတံ တိုန်စိုပ်တုဲ နဒဒှ်ညးလ္ၚတ်ဂှ် က္ဍိုပ်သ္ကိုပ် ဗော်ညးဗြဴ (မန်) လေဝ် တိုန်စိုပ်ကီု ဂွံဆဵုကေတ်ရ။