ပေါဲရုဲမာဲအကြာ အလန်ဏံဂှ် ကၠောန်ဗဒှ် ပ္ဍဲဂိတုအေဗရဴ (၁)၊ သၞာံ ၂၀၁ရ တေံရောၚ်တုဲ  ပ္ဍဲပွိုၚ်ဍုၚ်ၜါသွာၚ်တ္ကံခၟိုၚ် ဒေသမာဲညးစၞး ကၠတ်ထဝ်ညးဍုၚ် သၠးဒၟံၚ်မွဲဒၞါဲကီုလေဝ် နကဵုဗော်မန်တံ အကာဲအရာသွက်ဂွံလုပ်ပြိုၚ်ဂှ် ချိုတ်တ်ပၠိုတ်တ် ဖျေံလဝ်သ္ဂုတ်သွာတ်ဟွံမွဲဏီရောၚ် ဌာန်ပရိုၚ်မန် ဆဵုဂဗသၟာန်သၟုက်လဝ်တုဲ ဂွံတီကေတ်ရ။

“ပေါဲရုဲမာဲ ၂၀၁၀ တေံကီု ၂၀၁၅ ဂှ်ကီု စွံအဓိကကဵု ညးစၞးပွိုၚ်ဍုၚ် ရုဲကဵုလဝ်ဂှ်သၟးရ၊ နူပွိုၚ်ဍုၚ် လုပ်ပြိုၚ်ဟာ ဟွံလုပ်ဟာဂှ် ညးတံရ သ္ဂုတ်သွာတ်၊ ညးစၞးလုပ်ပြိုၚ်ဂှ်လေဝ် နူဗဟဵုပိုဲ ရုဲကဵုညးတံဟွံသေၚ်၊ သွက်ပွိုၚ်ဍုၚ်ညးတံတှေ် ညးတံရုဲကေတ်ရ ဗဟဵုပိုဲ ပံက်ကဵုလဝ်အခေါၚ်ဗီုဂှ်” သာ်ဝွံ အ္စာသဝ်မာံနဲသဵု ညးအုပ်ကာနာနာ ဗော်ဒဳမဵုကရေဇြဳအလုံရးမန် AMDP ဟီုရ။

အဃောပေါဲရုဲမာဲ သၞာံ ၂၀၁၀ တေံ ပ္ဍဲဒေသမာဲကၠတ်ထဝ်ညးဍုၚ် ပွိုၚ်ဍုၚ်ၜါသွာၚ်တ္ကံခၟိုၚ်ဂှ် နာဲလှမိုၚ် နူဗော်ဒဳမဝ်ကရေဇြဳအလုံရးမန် ၜိုန်ဂွံဒုၚ်ရုဲ အံၚ်ဇၞးအာကီုလေဝ် အခါရ လုပ်ပြိုၚ်ပေါဲရုဲမာဲသၞာံ ၂၀၁၅ ပၠန်ဂှ် ကျအာ ညးစၞးဗော် NLD ရ။

ပ္ဍဲပေါဲရုဲမာဲ သၞာံ ၂၀၁၅ ပ္ဍဲဒေသမာဲ ကၠတ်ထဝ်ညးဍုၚ် ပွိုၚ်ဍုၚ်ၜါသွာၚ်တ္ကံခၟိုၚ်ဂှ် ဒဝ်ခေန်ဌေကျဲ ဗော် NLD ဇၞးအာ ညးစၞးဗော် ကျဖေါအ် USDP , ဗော်ကောန်ဂကူမန် MNP , ဗော်ဒဳမဝ်ကရေဇြဳအလုံရးမန် AMDP , တံတုဲ ဗွဲကြဴဏံ ဟိုတ်နူညးစိုပ်အာပ္ဍဲဂကောံ ရုၚ်သၞောဝ်ဥပဒေသဇိုၚ် ကၟိန်ဍုၚ်ဂှ်ရ ဒၞါဲညးဂှ် သၠးအာရ။

“အဃောပေါဲရုဲမာဲ ၂၀၁၅ ဂှ် ဒၞါဲဂှ် ဗော် MNP ပိုဲလုပ်ပြိုၚ်ကၠုၚ်လဝ်ကီုရတှေ် ပ္ဍဲပေါဲရုဲမာဲအကြာဏံလေဝ် ဒးဟီုအတိုၚ်မူကမၠောန်တှေ် ဒၞါဲသၠးအာဂှ် ဗော်ပိုဲသွက်ဂွံလုပ်ပြိုၚ်နွံ။ ဆ္ဂး သွက်ဂွံလုပ်ပြိုၚ်ဂှ် ဗော်ပိုဲ ဂွိုအ်ရုဲလဝ် ညးစၞးဏီ”  သာ်ဝွံ နာဲလျးတၟး ညးအုပ်ကာနာနာ ဗော်ကောန်ဂကူမန် MNP ဟီုရ။

ကၠာဂိတုနဝ်ဝေမ်ဗာ ဟွံအိုတ်ဏံ ယဝ်ကၠောန်ကောံဓရီုကမ္မတဳကေၚ်ကာဗဟဵု (MNP) မ္ဂး သွက်ဂွံလုပ်ပြိုၚ် ပေါဲရုဲမာဲအကြာဂှ် ရုဲညးစၞးမာန်ရောၚ် ဂးရ။

ယၟုညးစၞးလုပ်ပြိုၚ်တံဂှ် နူနဝ်ဝေမ်ဗာ ၂၈ ဒဵုကဵု ဒဳဇြေမ်ဗာ ရ အပ္ဍဲပွိုၚ်တ္ၚဲတံဏံ ဒးပ္တိုန်စရၚ်ရောၚ်ဂှ် နူကမ္မယှေန်ပေါဲရုဲမာဲကၟိန်ဍုၚ်တေံ လလောၚ်လဝ်ရ။

ပ္ဍဲဒေသလ္ဂုၚ်၊ သေတ်ကာၚ်၊ ဗဂေါ၊ မန်၊ ရခေၚ်၊ သေံ၊ ချေၚ် ၊ ကယာ တံဂှ် ပံၚ်ဖအိုတ် ဒၞါဲဒေသမာဲ ညးစၞးသၠးအာ  နွံ ၁၉ ဒၞါဲတုဲ စိုပ်ဂိတုအေဗရဴ ၁ မံက် သၞာံ ၂၀၁ရ တေံမ္ဂး ကၠောန်ပေါဲရုဲမာဲအကြာ အပ္ဍဲဒၞါဲတံဂှ်ရောၚ် သာ်ဝွံ ပ္ဍဲအံက်တဝ်ဗာ ၂၃ တုဲကၠုၚ်ဏံ နူကမ္မယှေန်ပေါဲရုဲမာဲ လလောၚ်လဝ်ရ။

နနဲဏံကီု ပ္ဍဲပေါဲရုဲမာဲအကြာ အဃောသၞာံ ၂၀၁၂ ဂိတုအေဗရဴ ၁ မံက်ၜက်ကၠုၚ်တေံဂှ်လေဝ် ပ္ဍဲအလုံမွဲဍုၚ်ဗၟာဏံ ဒေသမာဲ ညးစၞးသၠးအာ နွံ ၄၈ ဒၞါဲတုဲ ဒၞါဲညးစၞးကၠတ်ထဝ်ညးဍုၚ် သၠးအာ ပ္ဍဲဍုၚ်မတ်မလီုဂှ် ဒဝ်ခေန်ဌေကျဲ ဗော် NLD လုပ်ပြိုၚ်ဇၞးအာရ။

ပေါဲရုဲမာဲအကြာ အလန်ဏံ ဗော်ဇၞော်ၜါဗော် NLD ကဵု USDP တံ လုပ်ပြိုၚ် ဇၟာပ်ပ်ဒၞါဲရောၚ်ဂှ် ဟီုလဴလဝ်ကဵုဌာန်ပရိုၚ်တံ တုဲရ။