သ္ကိုပ်ဝန်ဇၞော် တွဵုရးဍုၚ်မန် ဥူမေန်မေန်ဥူ မိက်ဂွံဒေါံနူတာလျိုၚ်တုဲ ပ္ဍဲတ္ၚဲဖေဖဝ်ဝါရဳ (၂၀) ဂှ် ချူဗ္စိုပ်လိက်နုက်တိတ် ကုသမ္မတဍုၚ်တုဲဣရ သာ်ဝွံ ဥူမျေအ်တာန်ဝေန် သ္ကိုပ်စၞောန်ပ္ညုၚ် ရုၚ်ဂကောံအလဵုအသဳ တွဵုးမန် ဟီုရ။
တ္ၚဲဖေဖဝ်ဝါရဳ (၂၀) ဖါသဝ်တ္ၚဲ ၜိုတ် (၄) နာဍဳ သ္ကိုပ်ဝန်ဇၞော်မေန်မေန်ဥူ ဆဵုဂဗကဵု ရဲမဳဒဳယျာတံရောၚ် ၜိုန်ဟီုချိၚ်လဝ်သာ်ဂှ်ကီုလေဝ် သ္ကိုပ်ဝန်ဇၞော် ၜက်အာတရဴတုဲ စၞးညးတေံ ဥူမျေအ်တာန်ဝေန် သ္ကိုပ်စၞောန်ပ္ညုၚ် ရုၚ်ဂကောံအလဵုအသဳ တွဵုရးဍုၚ်မန် ဒးလုပ်ဟီုသ္ပဒ္တန်ရ။
သ္ကိုပ်ဝန်ဇၞော်တွဵုရးမန် ဥူမေန်မေန်ဥူ (MNA)
“တ္ၚဲဏံ ဖေဖဝ်ဝါရဳ ၂၀ အခိၚ်တ္ၚဲစေၚ် ၜိုတ် ၂ နာဍဳဂှ်ရ ပ္တိုန်ဏာလိက်နုက်တိတ် ကုသမ္မတဍုၚ်၊ မူဟိုတ်နုက်တိတ်ရောဂှ် အခါစိုပ်မွဲတ္ၚဲတှေ် ဟီုကဵုပၠန်ဏောၚ်၊ ပြဟ်ဟ်ဏံအတိုၚ်သၞောဝ်ဥပဒေ အုပ်ဓုပ်ဍုၚ်ဂှ်ကီု၊ အတိုၚ်ဥပဒေ အလဵုအသဳရးဒေသဇၞော်ကီု နအလဵုဆန္ဒဇကု ပ္တိုန်ဏာလိက် အခေါၚ်နုက်တိတ် ကုသမ္မတဍုၚ်တေံရ၊ နူရုၚ်သမ္မတ ဗီုလဵုဖန်ရောဂှ် တဴရဴအတေံရ” သာ်ဝွံ ဥူမျေအ်တာန်ဝေန် ဂးရ။
ဟွံက္လိဂွံတၚ်သ္ပဒ္တန် ဟွံက္လိဂွံသ္ဂုတ်သွာတ် နူသမ္မတမ္ဂး သ္ကိုပ်ဝန်ဇၞော် ဥူမေန်မေန်ဥူ ဒးဆက်ကေတ်မံၚ်တာလျိုၚ် အတိုၚ်ပက္ကတိဏီရောၚ် ဥူမျေအ်တာန်ဝေန် ဆက်ဟီုရ။
အဃောဖေဖဝ်ဝါရဳ (၁၈)တုဲကၠုၚ်ဏံ ပ္ဍဲမုက်လိက် Facebook ဥူမေန်မေန်ဥူဂှ်ကီု ကုမဳဒဳယျာတံကီု အလဵုညးတေံ ချူလဝ်ပရူနုက်တိတ်နူတာလျိုၚ်ဂှ် ဂွံဆဵု ဂွံတီကေတ်သာ်ဂှ်တုဲ တ္ၚဲဏံဖေဖဝ်ရဳ (၂၀) ဖါနူဂယး အခိၚ်ၜိုတ် (၁၀) နာဍဳ မှာဇန် ၜိုတ် (၁၀၀) တၠ နူပွိုၚ်ဍုၚ်ၜဳ်ကလေၚ် ကၠုၚ်ဆဵုကဵုသ္ကိုပ်ဝန်ဇၞော် ပ္ဍဲရုၚ်အလဵုအသဳ တွဵုရးတုဲ လ္ပနုက်တိတ်ညိ အာတ်မိက်လဝ် ကုသ္ကိုပ်ဝန်ဇၞော်ကီု ဂွံတီကေတ်ရ။
“သွက်ပိုဲတှေ် ညးဆဂွံကၠောန်ကဵု ဂၠံၚ်တံ ဒဒန်တံ ညိကွေံဏီ၊အဃောပြေပြံၚ်မံၚ်ဗီုဏံဂှ် သ္ကိုပ်ဝန်ဇၞော် တိတ်အာဏောၚ်မ္ဂး ဝန်ဇၞော်စိုပ်ကၠုၚ်လက္ကရဴဏံ ယဝ်ဟွံကလေၚ်ရံၚ်ပိုဲပုဟ်တှေ် ပိုဲတံ ဗီုအကၠာတေံပၠန်ရ ယိုတ်တိုန်နူဒဒိုက်ဟွံမာန်ရပုဟ်၊ ဒၟါနူဂှ်ရ ကၠုၚ်ဆဵုကဵုသ္ကိုပ်ဝန်ဇၞော်တုဲ လ္ပတိတ်ညိ ဆက်ယိုက်ဂၠေၚ်တာလျိုၚ်ညိ ပိုဲကၠုၚ်ဒုၚ်ဂုန်” သာ်ဝွံ (ဒေါ်ထားနွဲ႔) နူကွာန်ကၚ် ပွိုၚ်ဍုၚ်ၜဳကလေၚ် ဟီုရ။
သ္ကိုပ်ဝန်ဇၞော် တွဵုရးမန် ဥူမေန်မေန်ဥူ ကၠာဟဂွံပ္တိုန်လိက်နူတိတ်က္ဍၚ် ပ္ဍဲဖေဖဝ်ဝါရဳ (၂၀) ဖါနူဂယးဂှ်ရ သွက်သ္ကိုပ်ဝန်ဇၞော်တၟိဂှ် ရန်လဝ် ဒံက်တာအေဇြာန် ညးစၞးကၠတ်ထဝ်တွဵုရး နူဒေသမာဲ လၟိဟ် (၂) ပွိုၚ်ဍုၚ်ကျာ်ထဝ်ရောၚ် သာ်ဝွံ ဥူဝေန်ထိၚ် ကမ္မတဳဗဟဵု ဗော်NLD ပံက်ဟီုလဝ်ကဵု ရဲမဳဒဳယျာ လ္ၚဵုတံတုဲဣရ။
ဒံက်တာအေဇြာန်ဂှ်ကေၚ်ဒှ်ကၠုၚ် ကမ္မတဳဗဟဵု ဗော် NLD ကီုတုဲ လၟုဟ်လေဝ် ပ္ဍဲဂကောံကမ္မတဳ ထိၚ်ဒက်မၚ်မွဲ ပရေၚ်သဘာဝပွဳပွူကေုာံသယံဇာတဂှ်လေဝ် ဆက်ယိုက်ဂၠေၚ်လဝ် တာလျိုၚ် ဥက္ကဌ ရ။
ဥူမေန်မေန်ဥူ သ္ကိုပ်ဝန်ဇၞော်တွဵုရးမန်ဂှ် ဒှ်ညးစၞးကၠတ်ထဝ်တွဵုရး ကၠုၚ်နူဒေသမာဲလၟိဟ် (၂) ပွိုၚ်ဍုၚ်ၜဳကလေၚ်တုဲ အခါစိုပ်ကၠတ်ထဝ်ပၠန်လေဝ် က္လိဂွံတာလျိုၚ် ဒုဥက္ကဌကီုရ၊ နူဂှ်ဆက်သၠုၚ်တိုန်အာ အဆံၚ်သ္ကိုပ်ဝန်ဇၞော်တွဵုရးမန်တုဲ သီုရပ်လဝ်တာလျိုၚ် ဌာနဝန်ဇၞော်ပရေၚ်သိုၚ်ခၞံ ကေုာံဌာနဝန်ဇၞော်ပရေၚ်ဗဂဵုလဟဵုတံရ။
