ကောံဓရီု ကမ္မတဳပံၚ်တောဲ ဓမံက်ရုပ်ရဴ ပရေၚ်ၜိုဟ်လလံဍုၚ် (UPDJC) ကၠောန်လဝ်ပ္ဍဲသၚ်္ဂဟဟဝ်တေဝ် နေပျဳဒဝ် ပ္ဍဲဖေဖဝ်ဝါရဳ ၆ ဂှ် တုပ်စိုတ်ဖျေံလဝ်သ္ဂုတ်သွာတ် ‘ပ္ဍဲတွဵုရးချေၚ် ကေုာံတွဵုရးရခေၚ်တေံ ရန်လဝ်သွက်ဂွံကၠောန်ပေါဲသဳကၠဳ ပရေၚ်ဍုၚ်ကွာန် အဆံၚ်ကောန်ဂကူဂှ် ကၠောန်ဟွံဂွံဏီ’ ဂးတုဲ သွက်ဂွံတိုန် သ္ဘၚ်သဳကၠဳပရေၚ်ၜိုဟ်လလံဍုၚ် ပေန်လုၚ် ၂၁ အလန်ဒုတိယဂှ် ဟွံချိုတ်ပၠိုတ်ရ သာ်ဝွံ ဒုဥက္ကဌ လၟိဟ် ၂ ဂကောံ CNF ဒံက်တာသလိုၚ်လျာန်မုၚ်သာခံၚ် ဟီုရ။

“ပြဟ်ဟ်ဏံ ဂွိုအ်ကၠောန်ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူတှေ် ဂကောံမုက်ဒပ်ကောန်ဂကူချေၚ် CNF ပိုဲ သွက်ဂွံအာတိုန် သ္ဘၚ်သဳကၠဳ ပေန်လုၚ် ၂၁ အလန်ဒုတိယပၠန်ဂှ် ဟွံချိုတ်ပၠိုတ်ရ။ မုဒှ်ရောဟီုတှေ် သွက်ဂွံပ္တိုန်ထ္ၜးပ္ဍဲသ္ဘၚ်သဳကၠဳဂှ် ဂွံကၠောန်ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူမှ တၚ်နၚ်သွက်ဂွံပ္တိုန်ဂှ် က္လိဂွံမာန်ဏောၚ်” ဒံက်တာသလိုၚ်လျာန်မုၚ်သာခံၚ် ဂးရ။

ဒံက်တာသလိုၚ်လျာန်မုၚ်သာခံၚ် ဒုဥက္ကဌ လၟိဟ် ၂ ဂကောံ CNF (Facebook)

အစဳဇန်မုက်ဒပ်ကောန်ဂကူချေၚ် CNF ဂှ် ကြဴနူဖေဖဝ်ဝါရဳ ၂၀ တုဲမ္ဂး ပ္ဍဲတွဵုရးချေၚ် ကၠောန်အာ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ နအလိုက်ကောန်ဂကူချေၚ်ရောၚ်ရန်လဝ်သာ်ဂှ်ကီုလေဝ် အကာဲအရာတိဍာ် ဟွံၜိုဟ်သိုဟ်ဂးတုဲ အစဳဇန်ဂှ် ဒေါံလဝ်ကၠာ နူ UPDJC ဖျေံလဝ်သ္ဂုတ်သွာတ်ရ။

“ပ္ဍဲတွဵုရးချေၚ်ဂှ် ရန်လဝ် သွက်ဂွံပံက်ရုၚ်ဆက်ဆောံကီုလေဝ် ရဲဒေသတံ ဟွံမိက်ဒုၚ်တဲဏီဂှ်ရ ဟွံဒှ်ကၠောန်။ တွဵုရး ရခေၚ်ဂှ် နကဵုပရေၚ်ဍုၚ်ကွာန်မ္ဂး ဟိုတ်က္တံၚ်က္တဴ ယှုက်ၜန်မံၚ်ဏီဂှ်ရ သွက်ဂွံဒေါံလဝ်အစဳဇန်ပေါဲသဳကၠဳဂှ် ဒးဖျေံထောံသ္ဂုတ်သွာတ်ရ။ ဟွံကၠောန်ရ ဟွံသေၚ်ပုဟ်၊ သွက်ဂွံကၠောန်အာ အလုံဖအိုတ်ဂှ် ဂစာန်မံၚ်ဖိုဟ်ရ။ ပြဟ် ကဵု လ္ဇုဲရနွံ ကၠောန်ဂှ် ကၠောန်တွဵုရ” သာ်ဝွံ ဥူဇြဝ်ဌေ ဒုသ္ကိုပ်စၞောန်ပ္ညုၚ် ဌာနဝန်ဇၞော်ရုၚ်သမ္မတ ဟီုရ။

နူကောံဓရီု UPDJC သ္ဂုတ်သွာတ်လဝ် သ္ဘၚ်သဳကၠဳပရေၚ်ၜိုဟ်လလံဍုၚ် ပေန်လုၚ် ၂၁ ဗွဝ်ကၠံ အလန်ဒုတိယ သွက်ဂွံကၠောန် စနူတ္ၚဲဖေဖဝ်ဝါရဳ ၂၈ ၊ ပ္ဍဲဒေသပအိုအ်၊ ဒေသ RCSS/SSA တွဵုရးသေံ ၊ ရးဒေသဇၞော် ဗဂေါတံဂှ် သွက်ဂွံကၠောန်အာ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ၊ ပ္ဍဲတွဵုရးချေၚ်ကဵု တွဵုရးရခေၚ်ဂှ် လ္ပကၠောန်ဏီ၊ မပ္တံသာ်ဝွံ တုပ်စိုတ်ဖျေံလဝ်သ္ဂုတ်သွာတ် ဂွံတီကေတ်။

ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဂကူကရေၚ်ဂှ် ပ္ဍဲတွဵုရးကရေၚ်ကီု၊ နအလိုက်ဒေသဂှ် ပ္ဍဲရးဒေသဇၞော်တနၚ်သဳကီု ကၠောန်ကၠုၚ်လဝ်တုဲရ။

ဂကောံမုက်ဒပ်ကောန်ဂကူချေၚ် CNF ကေုာံဗော်ပရေၚ်ဗၠးၜး ရးရခေၚ် ALP တံဂှ် ဟိုတ်နူဒှ်ဂကောံ ထ္ပက်စၟတ်တဲ NCA တုဲဂှ်ရ အတိုၚ်မူပၞောန် ပေါဲသဳကၠဳပရေၚ်ဍုၚ်ကွာန်မ္ဂး ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ
နအလိုက်ဂကူဂှ် ပံၚ်တောဲကဵုဗော်ပရေၚ်ဍုၚ်ကွာန်တံတုဲ ကၠောန်သ္ပ ပ္ဍဲဒေသညးကဵုညး ဂွံရောၚ်ဂှ်လေဝ် ဂွံတီကေတ်ကီုရ။