မၞိဟ်ဗြဴမွဲတၠ အယုက်ၜိုတ် (၃၀) ယဲဒၟံၚ်ပ္ဍဲဗ္ဒမ်ဝဳယဲနာနာ (ဇာနည်အောၚ်) ဍုၚ်မတ်မလီု တွဵုရးဍုၚ်မန်ဂှ် ဟွံသၚ်ကာကဵု H1 N1 တုဲ ဂျူလာၚ် (၂၈) ပယာံဒေါဝ်တ္ၚဲ ပလံၚ်ပ္တိုန်ဏာ ရုၚ်ဂဥုဇၞော် လ္ဂုၚ်တေံရောၚ် ဂွံပရိုၚ်ရ။
“ပ္ဍဲတွဵုရးဍုၚ်မန်ပိုဲဏံ ၜိုတ်လဵုလေဝ်ဟွံဒှ်စကွေံပုဟ်။ နူလ္ဂုၚ်တေံရ ဒှ်မာန်ဏောၚ်ထေၚ်ရ။ မၞိဟ်ယဲဂှ် ပိုဲပလံၚ်ဏာလ္ဂုၚ် နကဵုကွဳစက်မၞိဟ်ယဲ။ လုပ်ဍုၚ်တှေ် ကၟာတ်ဍာန်တံ၊စၟဳစၟတ်တံနွံဏောၚ်တှေ် ပိုဲဆက်ကဵု ကွဳစက်ပ္ဍိုက်မၞိဟ်ယဲ K-Ambulance ကဵု ဂကောံဥူကျဝ်ဒူ ဍုၚ်လ္ဂုၚ် ပ္ဍဲ(အမြန်လမ်းထိပ် အမှတ်(၃) လမ်းဆုံထိပ်) တုဲ ပလံၚ်ဏာရုၚ်ဂဥုဲဇၞော်လ္ဂုၚ်ယျ။ ဟွံသၚ်ကာကဵု H1N1 တှေ် ဒးခစတ်ဂဥုဲ၊ ဂကောံပိုဲလေဝ် ဒးဗက်စၟဳစၟတ်” သာ်ဝွံ ဥူတာန်နာၚ်ထောန် ညးအုပ်ကာ ဂကောံရီုဗၚ်ဒိုက်ယဲ (အေးမြကြည်လၚ် နားရေးကူညီမှုအသၚ်း) မပြံၚ်ကေတ်မၞိဟ်ယဲဂှ် ဟီုရ။
ဗီုခစတ်ဂၟဟ်ဂဥုဲ ပ္ဍဲကွဳစက်ဖ္ဍိုက်မၞိဟ်ယဲတၟေၚ် (MNA)
“မၞိဟ်ယဲဂှ် ဇွဟ်တိုန်ထတ်။ဂမ္တဴသဝ်။ ဒးစုတ်လဝ် အံက်ဇြဳဂျေန်။ ပိုဲတီဂှ် ၜိုတ်နွံကဵုဇွဟ်ဓဝ်ရ။ စိုပ်ရုၚ်ဂဥုဲဇၞော်လ္ဂုၚ်မှ ဒှ်ဒၟံၚ်မၞိဟ်ယဲနွံကဵုသံသယ H1N1။ ကွဳစက်ဂှ် ပိုဲပက်ဂၟဟ် ခစတ်လဝ်ဂဥုဲ၊ ကၠောန်လဝ်ပရေၚ်သၟးဇ္ၚးကီုရ” သာ်ဝွံ ဥူယျေဝ်တွေန်ထောဋ် နူဌာနဟံၚ်ပြာ်ကါမံက် ဂကောံရီုဗၚ်ပရေၚ်ဒိုက်ယဲ (လ္ဂုၚ်) ဟီုရ။
ရန်ကဵုသွက်ဂွံစဵုဒၞါ H1N1 တုဲပ္ဍဲဂျူလာၚ် (၂၇) ဂှ် (သာသနာနွယ်ဖောၚ်ဒေးရှၚ်း) ကဵု ( ဘိုဘိုဝၚ်း အရေးပေါ်ကယ်ဆယ်ရေးအဖွဲ႔) တံ ပံၚ်တုဲ ပ္ဍဲသၞေဟ်ကွဳစက်ဇၞော် မတ်မလီုကီု၊ ပ္ဍဲသၞေဟ်ကွဳပၟတ် ကေုာံဒၞါဲမၞိဟ်ကောံဂၠိုၚ်တံကီု ပရအ်ကဵုဒၟံၚ် ဂရောပ်မုက် Mask ကီု ဂွံတီကေတ်ရ။
ပ္ဍဲဍုၚ်ဗၟာဏံ ကေၚ်ဒှ်ကၠုၚ် H1N1 ဂှ် ပ္ဍဲသၞာံ ၂၀၀၉ ဂှ် (၁၄) တၠ၊ ပ္ဍဲသၞာံ ၂၀၁၀ ဂှ် (၂၃၂) တၠ၊ သၞာံ ၂၀၁၄ ဂှ် (၁၆၇) တၠ ဒှ်ကၠုၚ်နွံ ဂွံတီလဝ် နူဌာနဝန်ဇၞော်ပရေၚ်ထတ်ယုက်ကေုာံဝေၚ်ဇြဟတ်တုဲ လၟုဟ် ဒၟါနူ H1N1 ဏံ မၞိဟ်ချိုတ် (၆) တၠတုဲ ဂွံတီကေတ်ရ။
