လၟုဟ်ပ္ဍဲဍုၚ်ဗၟာ ဒှ်ဒၟံၚ်အခိၚ်အခါ ယဲ H1N1 ကၠောံထၞာန်ကီုလေဝ် ပ္ဍဲတွဵုရးဍုၚ်မန် ညးက္လိဂွံယဲဏံ ဟွံမွဲဏီ ဒံက်တာဇြဝ်မေန်ထောန် သ္ကိုပ်က္ဍိုက်ပ်ပရေၚ်ထတ်ယုက်တွဵုရးဍုၚ်မန် ဟီုရ။
စပ်ကဵုကိစ္စသွက်ဂွံစဵုဒၞါ ယဲ H1N1 တုဲ ပ္ဍဲဂျူလာၚ် (၂၈) သၞာဲဒါသွာၚ်ပရေၚ်ထတ်တွဵုးရးကေုာံညးစၞးကၠတ်ထဝ် တွဵုရးဍုၚ်မန်တံ ကၠောန်ကၠုၚ်ကောံဓရီု ပ္ဍဲရုၚ်ကၠတ်ထဝ်တွဵုရးမန်တုဲဂှ် ဟီုဂးသောၚ်က္လးကဵုအ္စာပရိုၚ်တံ သာ်ဂှ်ရ။
သၞာဲဒါပရေၚ်ထတ်ယုက်တွဵုရးကေုာံကၠတ်ထဝ်တွဵုရးမန်တံ ကောံဓရီုကိစ္စ H1N1 (Naianug Naing Facebook)
ၜါတၠဟီုဂှ် နူပွိုၚ်ဍုၚ်ကျာ်မြဟ်ဂှ် မၞိဟ်ဗြဴမွဲတၠ၊နူဍုၚ်ရေဝ်ဂှ် ကောန်ၚာ်တြုံမွဲတၠ ဂးရ။
ဂအှ်တိုန်၊ခ္ဍက်တိုန်၊ ယောပ်ယေၚ်ကိတ်စဇကုဇကောဝ်ဏောၚ် ဒှ်ကၠုၚ်လက်သန်သာ်ဏံမ္ဂး ဗွဲကိုပ်ကၠာ ဒးမၚ်မွဲဝဳပရာယဲဇကုဏောၚ်၊ အဆံၚ်ဒုတိယ ညံၚ်ဂွိုအ်ကၠောံထၞာန်ညးတၞဟ်ဂှ် အခါရခ္ဍက်မ္ဂး ဒးကၟာတ်လဝ် နကဵုယာတ်ဗု ယာတ်ဗ္တာၚ်ဏောၚ်၊ စၟယဲဏံ အပ္ဍဲပွဳပွူ (၆) ပေမ္ဂး ဍေံကၠောံထၞာန်မာန်ဏောၚ်တုဲ ညးမံၚ်စုက်ကဵုမၞိဟ်ယဲဂှ်ကီု၊ အခါအာ ဒၞဲါမၞိဟ်ဂၠိုၚ်ၚ်ကီု ဒးစုတ်ဏာယာတ်ဂရောပ်မုက် (ယာတ်ကၟာတ်မုဟ်ပါၚ်) ဏောၚ် ညးဆက်ဟီုရ။
“စပ်ကဵု H1N1 တုဲ ဂးလဝ်ပ္ဍဲကောံဓရီု ယဲဏံညံၚ်ဂွိုအ်လုပ်တွဵုရးဍုၚ်မန်ဂှ် သၞေဟ်ကၚ်လ္ပာ်ဍုၚ်ရေဝ်တေံကီု၊ သၞေဟ်ကၚ်ပါၚ်လုပ်ဇြပ်ဗု သွာၚ်ကၠုၚ်နူကျာ်ပိတေံကီု ညံၚ်ဂွံစွံသတိကဵု သတ်တိရစ္ဆာန်လုပ်၊ ဗွဲတၟေၚ်တှေ် စာၚ်အဒါတံ ပါကၠုၚ်မ္ဂး ညံၚ်ဂွံဗဒေံါဒၞါ စၟဳစၟတ်အာဂှ် ဒးဖျေံဂလိုၚ်လဝ်ဇြဟတ်ဗၠာဲသၟိၚ်ဏောၚ်ဟီုဂှ် လ္ပာ်အလဵုအသဳလေဝ် ဒုၚ်တဲ” သာ်ဝွံ ဒံက်တာအံၚ်နာၚ်ဥူ ဒုဥက္ကဌ ကၠတ်ထဝ်တွဵုရးဍုၚ်မန် ဂးရ။
သွက်ဂွံစဵုဒၞါယဲ H1N1 ဂှ် ဂျူလာၚ် (၃၁) ဏံ ပ္ဍဲဇၟာပ်ပွိုၚ်ဍုၚ် ကၠောန်အာပရေၚ်ကဵုပညာ သီုကဵုဟီုတွံပရူ ဗီုဂွံစဵုဒၞါယဲဏောၚ် ညးဆက်ဟီုရ။
မၞိဟ်ဗြဴပလုၚ်မွဲတၠ အယုက်ၜိုတ် (၃၀) ဒုၚ်ဝဳဒၟံၚ်ပ္ဍဲဗ္ဒမ်ဂဥုဲ (ဇာနည်အောၚ်) မတ်မလီုဂှ် ဒှ်သံသယ H1N1 တုဲ ပ္ဍဲဂျူလာၚ် (၂၈) ပယာံဒေါဝ်တ္ၚဲ ဒးပလံၚ်ပ္တိုန်ဏာ ရုၚ်ဂဥုဲဇၞော်လ္ဂုၚ်တေံရဂှ်လေဝ် ဓမံက်ထ္ၜးလဝ်ပရိုၚ်တုဲမံၚ်ရ။
ယဲဇှ်ချာံ H1N1 ဝွံ နူကဵုယွီုမၞိဟ်တံမွဲတဆံၚ် ဍေံကၠောံထၞာန်မာန်ဏောၚ်ဒှ်တုဲ ယဝ်ယီုဒး ကျာနွံကဵုစၟယဲ မပြးတိတ်ကၠုၚ် နူဂအှ် ခ္ဍက် မၞိဟ်ယဲတံဂှ်မ္ဂး ဍေံကၠောံလုပ်ပ္ဍဲဇကုမာန်ဏောၚ် ဂွံတီကေတ်ရ။
ဂိတုဂျူလာၚ် နူ (၁၉) ဒဵုကဵု (၂၈) ပယာံတ္ၚဲစေၚ် (၂) နာဍဳဂှ် ပ္ဍဲအလုံဍုၚ်ဗၟာဏံ ညးနွံကဵုစၟယဲ Influenza A (H1N1) pdm 2009- Positive နွံ (၃၀) တၠတုဲ အပ္ဍဲဂှ် ချိုတ်အာ (၆) တၠဣရဂှ်လေဝ် နူဌာနဝန်ဇၞော်ပရေၚ်ထတ်ယုက် ကေုာံပရေၚ်ဝေၚ်ဇြဟတ်တေံ လလောၚ်လဝ်တုဲရ။
0 Comments