ကိစ္စညးက္ဍိုက်ပ်မွဲတၠ အာတ်မိက်ကေတ်သြန် ပ္ဍဲဇခဳတန်ဍောတ်တ် မဂွံဒုၚ်ရုဲလဝ် သွက်ဂွံခါန်ပ္တိုန်တၟိ ပ္ဍဲကၠတ် ထဝ်တွဵုရးဍုၚ်မန်ဂှ် နူကမ္မတဳလ္ၚတ်သ္ၚဳဂၠိပ် လိက်တေၚ်ဗ္စိုပ်၊ လိက်ဒုၚ်ကရုဏာ၊ လိက်ပ္တိုန်ထ္ၜး ကေုာံကိစ္စနာနာ စၟဳစၟတ်တုဲအာဣရရောၚ် ဂွံတီကေတ် နူဥူအံၚ်ကျဝ်ဒူ ဥက္ကဌကမ္မတဳဂှ်ရ။

စပ်ကဵုကိစ္စဏံတုဲ ကုမၞိဟ် ၁၀ တၠ စနူညးက္ဍိုက်ပ် မွဲဟာန်ကေုာံ ညးဂၠေၚ်ဝန် တၟိ-တြေံ မပါလုပ်တံဂှ် စၟဳစၟတ်သၟာန်သၟုက်လဝ်တုဲ ပ္ဍဲဂျူလာၚ် ၁၃ ဂှ် ပလံၚ်ဗ္စိုပ်လဝ်လိက်ဒုၚ်စဳရေၚ် ကုဥက္ကဌ၊ ဒုဥက္ကဌ ကၠတ်ထဝ်တွဵုရးမန်တုဲဣရ ညးဟီုရ။

“သၟတ်ဍောတ်တ်ဟွံအံၚ်တံဏောၚ် တေၚ်တှေ် မွဲဗီုပအ်၊ ဂွံဒှ်ဇခဳတန်ဍောတ် မွဲမွဲဂှ် ဟွံလောဲပုဟ်၊ ဒးသှ်သီု လိက် သီုမၞိဟ်ဏောၚ်၊ ဒးဒုၚ်စၟဳစၟတ် စရာဲဍာ်ဒကေဝ် ချိုတ်တ်ပၠိုတ်တ်တုဲမှ စရာဲဇကုစိုပ်တှေ် ဂွံအံၚ်အာ၊ ဂစာန်သှ်လဝ်တၟာကလှေ် အံၚ်အာတုဲ အခါဂွံကမၠောန်ဂှ် လၟုဟ် စိုတ်ကၠောန်ဟွံမွဲရ ပ္တိုန်လိက်နုက်တိတ်တုဲ က္လေၚ်ပလံၚ်နၚ်လိက်တေၚ်ဂှ် ဒှ်ဓမ္မတာဟွံသေၚ်” သာ်ဝွံ ဥူအံၚ်ကျဝ်ဒူ ဂးရ။

သွက်ဂွံက္လအ် ဥက္ကဌ ကေုာံဒု ဥက္ကဌဂးတုဲ ညးက္ဍိုက်ပ်မွဲတၠ နွံအပ္ဍဲရုၚ်ကၠတ်ထဝ်ဂှ် အာတ်လဝ်သြန် ပ္ဍဲဇခဳတန်ဍောတ် မရုဲလဝ်တၟိ (၅) တၠ၊ မွဲတၠတှေ် သြန် ၃ ကိုဋ်ဒကေဝ်တုဲ ဒးရပ်စပ်စၟဳစၟတ် ကိစ္စဏံရ။

“ကၠတ်ထဝ်ဟီုဂှ် ဒၞါဲအးအးၚးၚး ဒၞါဲခၞံဥပဒေဏောၚ်၊ ဒၞါဲက္လၚ်ရမျှာၚ်ညးဍုၚ်ကွာန်ဏောၚ်၊ အေဇှ်ရ ကိစ္စဏံ ဒှ်ကၠုၚ် တှေ် နူကၠတ်ထဝ် ဌာန်ဒ္တန်အးအးဏံ ရပ်စပ်စၟဳစၟတ်ရ၊ တၚ်နၚ်စိုပ်ကၠုၚ်တံဂှ် ပ္တိုန်ထ္ၜးကဵု ကၠတ်ထဝ်ကၟိန်ဍုၚ် ဏောၚ်၊ ကဏ္ဍသှေ်ဂှ်တှေ် ဒှ်ကဏ္ဍရဲပရေၚ်အုပ်ဓုပ်ရ” သာ်ဝွံ ဒဝ်တေန်အိ ဥက္ကဌကၠတ်ထဝ် တွဵုရးဍုၚ်မန် ဟီုရ။

သွက်ဂွံခါန်ဗပေၚ်ညးဂၠေၚ်ဝန် ပ္ဍဲရုၚ်ကၠတ်ထဝ်တွဵုရးဍုၚ်မန်ဂှ် အတိုၚ်သၞောတ်ဒက်ပ္တန် ဂကောံရုၚ် ကၠတ်ထဝ်မ္ဂး ဒးဗပေၚ်ဇခဳတန်ဍောတ်ကီုဏောၚ်တုဲ အခါရကော်ဂှ် ညးအာတ်မိက်ဂရၚ်ပ္တီသ္ပဇခဳ နွံ ၁၆၀ တၠပြၚ်ရောၚ် ဂွံတီကေတ်နူဒုဥက္ကဌ ကၠတ်ထဝ်တွဵုရးမန်ကီုရ။

ပ္ဍဲညးဂရၚ်ပ္တီ ပ္တိုန်နၚ်စရၚ်ဂှ် စရာဲစိုပ် ဂွံဒုၚ်ရုဲ (၉) တၠတုဲ ကိစ္စအာတ်မိက်သြန်ဂှ် တၠဂုန်အ္စာမွဲတၠ ချူပ္တိုန်လဝ် ပ္ဍဲဝှိတ်ဗော်တုဲ ညးဇၞော်နူကၠတ်ထဝ်တံ ဂွံတီကေတ် ဒဒှ်ဂှ်ရ။

သၞာံ ၂၀၁၇ အိုတ်မ္ဂး သၟာၚ်နူ ညးဂၠေၚ်ဝန် ဌာနက္ဍိုက်ပ် ပရေၚ်အုပ်ဓုပ်နာနာတုဲ ခါန်ကေတ် ညးဂၠေၚ်ဝန် ဒုၚ်ကာ သွက်ကၠတ်ထဝ် ရးဒေသဇၞော် ကေုာံတွဵုရးတံညိ နူကၠတ်ထဝ်ကၟိန်ဍုၚ် ကဵုလဝ်စၞောန်နွံ ဂွံတီကေတ်ရ။