ဟိုတ်နူဗြဲဇၞော်ထတ် ဍာ်ဒဵုစှေ် ပရၚ်တံလာ်တုဲ ဒဒန်(၂) တၞုၚ် နွံပ္ဍဲဂၠံၚ်ကျာ်ပိ- လှာဒကှ် တွဵုရးကရေၚ် ဟဳအာကရောံဍာ်တုဲလၟုဟ်မ္ဂး ပ္ဍဲဂၠံၚ်ဂှ် အာကၠုၚ်ဟွံဂွံ ဒးဒေံါအစဳဇန်အာတရဴရောၚ် ဂွံလဝ်ပရိုၚ် နူရုၚ်သ္ကိုပ်ပရေၚ်အုပ်ဓုပ် ပွိုၚ်ဍုၚ်လှာဒကှ်ရ။

ပ္ဍဲဗ္တံဂျူလာၚ်(၂၆) ဍာ်ကြုၚ်ထ္ပက်ဏာတုဲ ဒဒန်ကွေန်ကျဳ (ဒဒန်ယာယဳ ဗေလဳ) နွံပ္ဍဲစၟတ်ဂၞန်တိုၚ် ၂၀/၀-၁ ကေုာံ ဒဒန်ယက္ကလာ (ဒဒန်ယာယဳဗေလဳ) နွံပ္ဍဲစၟတ်ဂၞန်တိုၚ် ၃၀/၀-၁ ပ္ဍဲဂၠံၚ်ကျာ်ပိ – လှာဒကှ်ဂှ် သရိုဟ်ဟဳအာတုဲ သွက်ဂွံအာကၠုၚ် ဒှ်ဒၟံၚ်အခက်အခုဲဖိုဟ် ပ္ဍဲဂျူလာၚ် (၂၇) ဥူမျဵုအံၚ် သ္ကိုပ်ပရေၚ်အုပ်ဓုပ် ပွိုၚ်ဍုၚ်လှာဒကှ် ဟီုကဵုဌာန်ပရိုၚ်မန်ရ။

“ဒဒန်ဟဳအာ ၂ တၞုၚ်ယျတှေ် သွက်ဂွံအာကၠုၚ်ဂှ် ဂၠံၚ်ပိုတ်အာ။ ဂၠံၚ်ဂှ် အာကၠုၚ်ဟွံဂွံရပုဟ်။ သွက်ဂွံက္လေၚ်ပဠေဝ်သိုၚ်ဂှ် ပကောံဒၟံၚ်ဂကောံတၟေၚ်သိုၚ်ဒဒန် ကေုာံကပေါတ်တံဖိုဟ်ရ။ ဒၞါဲဂှ် ဍာ်ထတ်ကွေံကွေံတုဲ မၞိဟ်တံ ကၠောံကဵုဂၠုၚ် ဖံၚ်တုဲ အာကၠုၚ်မံၚ်ရ။ ကွဳစက်ဂှ် ဂြိပ်ဟွံဂွံဏီပုဟ်။ ကွဳစက်အာကျာ်ပိတံ ဒးဂေတ်အာလ္ပာ်ဇြပ်ဗုတေံ။ သၞာံအာဏံ အဆံၚ်ဏံ ဟွံဒှ်ပုဟ်” သာ်ဝွံ ဥူမျဵုအံၚ် ဂးရ။

ဒဒန်ဏံညံၚ်ဂွံတုဲဂှ် ဂကောံဒဒန်(၁၄) ဂစာန်ဖန်ဇန်မံၚ်ဖိုဟ်ရ။ ပ္ဍဲပွိုၚ်ဍုၚ်လှာဒကှ် ဒၞါဲတိသဝ်တံဂှ်မ္ဂး ဍာ်ၜေက်အာမံၚ်ဖိုဟ် ဂွံတီရ။

“လၟုဟ်ဍာ်ဇၞော်မံၚ်။ ဗြဲဂူမံၚ်တှေ် ဒၞါဲလ္ၚဵုဍာ်လုပ်။ ဒးစွံသတိကဵုစၟဏောၚ်။ သၞာံအာဏံ ဍေံဟွံဒှ်အဆံၚ်ဏံပုဟ်။ သၞာံဏံဗြဲရိုပ်ဆက်အာတှေ် ဍာ်နူလ္တူတေံ လိုအ်လဵုစှေ်ကၠုၚ်။ တၞဟ်ဟ်ဂှ် မုဟွံလီုပုဟ်။ ဒၞါဲသဝ်ဝ်ဂှ်တှေ်ဍာ်လုပ် ဍာ်မၚ်။ ဆ္ဂး ဍာ်ဂှ် ဟွံၜက်ပရၚ်ဏီ” သာ်ဝွံ ဥူမျဵုအံၚ် ဂးရ။

ပ္ဍဲဒဒန်လီုအာ (၂) တၞုၚ်ဂှ် ဒဒန်ကွေန်ကျဳ ဇမၠိၚ်ဍေံ နွံ (၁၀၀) ပေ၊ ဒဒန်ယက္ကလာ ဇမၠိၚ်နွံ (၁၂၀) ပေတုဲ ပရေၚ်အာကၠုၚ် ပိုတ်ဗွဲခေတ္တဏောၚ် ဌာနဝန်ဇၞော်ပရေၚ်သိုၚ်ခၞံ၊ ဌာနက္ဍိုက်ပ်ဍာန်ဒဒန် တွဵုရးကရေၚ် လလောၚ်လဝ်တုဲရ။

ဗီုဏံကီု ဒဒန်ကြုၚ် (မဟဲဆီ) နွံပ္ဍဲဂၠံၚ်ဇၞော် လ္ဂုၚ်-ဗိက်-ကံသံၚ်ဂှ်လေဝ် ဟိုတ်နူဍာ်ဒဵုထ္ပက်ကီုတုဲ ပ္ဍဲဂျူလာၚ် ၂၆ ပယာံဗ္တံ ၜိုတ် ၁၁ နာဍဳပြၚ် သရိုဟ်လီုပိုတ်အာတုဲ ဒးကၟာတ်လဝ်ဂၠံၚ်ကီု ဂွံတီကေတ်ရ။

နူဌာနက္ဍိုက်ပ်ဇလဗေဒကေုာံပရေၚ်ဗြဲကျာ လလောၚ်လဝ် ပ္ဍဲဂျူလာၚ် ၂၇ ပယာံတ္ၚဲစေၚ် ၂ နာဍဳဂှ်မ္ဂး ပ္ဍဲရးဇၞော်ဨရာဝတဳ ကဵု တွဵုရးမန်ဂှ် ဇၟာပ်ဒေသ၊ရးဇၞော်သေတ်ကာၚ်သ္ကုတ်သၟဝ်၊ ရးဇၞော်ဗဂေါ၊ တွဵုကချေၚ် ကေုာံတွဵုရးကရေၚ်တံဂှ် ဒၞါဲပြံက်က် ဗြဲဇၞော်ကၠုၚ်တုဲ ဗၞတ်ဗ္ၜတ်ဍာ်ဗြဲဂှ် ပ္ဍဲတ္ကံ (ဟိုၚ်းကြီး) (၇ ဒဿမ ၄၇) ၝောံတဲကီု ပ္ဍဲဍုၚ်ကျာ်မြဟ် (၆ ဒဿမ ၁၄) ၝောံတဲ၊ ပ္ဍဲဍုၚ်ရေဝ် (၅ ဒဿမ ၉၀) ၝောံတဲ၊ ပ္ဍဲမုဟ်ဍုၚ် ကဵု ဍုၚ်လှာဒကှ်တံဂှ် (၅ ဒဿမ ၄၇) ၝောံတဲကီု ပ္ဍဲဍုၚ်ပံၚ် ( ၅ ဒဿမ ၃၅ ၝောံတဲ)၊ ပ္ဍဲမတ်မလီု (၄ ဒဿမ ၈၈) ၝောံတဲ၊ ပ္ဍဲတ္ကံခၟိုၚ် (၃ ဒဿမ ၈၆) ၝောံတဲ၊ ပ္ဍဲဍုၚ်ဗဂေါ (၃ ဒဿမ ၆၆) ၝောံတဲ၊ ပ္ဍဲဍုၚ်ၜဳက္လေၚ် (၃ ဒဿမ ၅၀) ၝောံတဲ၊ ပ္ဍဲမံၚ်မလ (၃ ဒဿမ ၄၆) ၝောံတဲ၊ ပ္ဍဲဍုၚ် (မချမ်းဘော) ကဵု ကျာ်ခမဳ တံဂှ် (၃ ဒဿမ ၃၉) ၝောံတဲ ပ္ဍဲဍုၚ်သဓီုဂှ် (၃ ဒဿမ ၁၉) ၝောံတဲ ဂွံတီကေတ်ရ။