ပ္ဍဲသ္ၚိစာတ်တၟိကျာ်မြဟ် နွံပ္ဍဲပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ပြံၚ်စွံကောန်သ္ၚိစာတ် (ကောန်ဒုဟ်) ဟွံမာန်ဏီဖိုဟ် သ္ကိုပ်က္ဍိုက်ပ်တွဵုရး နူဌာနက္ဍိုက်ပ်သ္ၚိစာတ် တွဵုရးဍုၚ်မန် ဂးရ။

သ္ၚိစာတ်ကျာ်မြဟ်ဂှ် ဒုၚ်သဇိုၚ်ကဵုသြန်ဗာတ်ဂျေတ် လၟေၚ်သၞာံ နူကၟိန်ဍုၚ်တေံ ဖျေံကဵုနၚ်ဂှ်တုဲ သိုၚ်ခၞံဒၟံၚ်ရ၊ လၟုဟ်မ္ဂး ကမၠောန်သိုၚ်ခၞံဂှ် တုဲဒှ်ဂွံ ဆၜိုတ် ၈၅ က္ဍိုပ်ကၠံဟေၚ်တုဲ ပရေၚ်ဂီုကၠီုလေဝ် ဟွံမွဲဏီရ၊ ဒၟါနူဂှ်ရ ပြဟ်ဟ်ဏံ လုပ်ပြံၚ်စွံ ကောန်သ္ၚိစာတ်တံဟွံဂွံဏီ သာ်ဝွံ ဥူလေန်ဗိုလ်နံၚ် သ္ကိုပ်က္ဍိုက်ပ်တွဵုရး နူဌာနက္ဍိုက်ပ်သ္ၚိစာတ် တွဵုရးဍုၚ်မန် ဂးရ။

“ၜိုတ်သၞာံ ၂၀၁၉-၂၀ တေံမှ တုဲမာန်ဏောၚ်၊ ပိုဲလေဝ် မိက်ဂွံကဵုတုဲ ပြဟ်ဟ်ကီုရ၊ ပ္ဍဲဒၞါဲက္ဍန်ဂြက်ဏံ သ္ဂောံပဆုဲပြံၚ် ကောန်သ္ၚိစာတ်ဂွံဂှ် အဓိက ဒးကၠောန်ဒၟံၚ် နကဵုသြန်ဗာတ်ဂျေတ် နူကၟိန်တေံ ဏောၚ်တုဲ လၟုဟ်မှ တုဲဂွံလဝ် ၜိုတ် ၈၅ က္ဍိုပ်ကၠံညိကွေံဏီ” ဥူလေန်ဗိုလ်နံၚ် ဂးရ။

ကိစ္စဂွံဖျုဲပြံၚ်သ္ၚိစာတ်ဏံဝွံ စနူသၞာံဘဏ္ဍာ ၂၀၁၃-၂၀၁၄ တုဲ နကဵုသြန်ဘဏ္ဍာ မဂွံဒၟံၚ်လၟေၚ်သၞာံဂှ်ဟေၚ် ဒးသိုၚ်ခၞံဒၟံၚ်သ္ၚိစာတ်ကျာ်မြဟ် (ပွိုၚ်ဍုၚ်ကျာ်မြဟ်) ရ။

ဖျုဲပြံၚ်ဏာ သ္ၚိစာတ်ကျာ်မြဟ်တေံတုဲမ္ဂး သ္ၚိစာတ်မၞုံဒၟံၚ်ပ္ဍဲဍုၚ်မတ်မလီုလၟုဟ်ဂှ် ဗီုလဵုဖန်ပၠန်ရော နူကၟိန်ဍုၚ်တေံ ဟီုလဝ်ဟွံမွဲဏီ သာ်ဝွံလေဝ် ညးသ္ကိုပ်က္ဍိုက်ပ်တွဵုရးဂှ် ဂးရ။

ကောံဓရီုလၟေၚ် (၁၁) ဝါ ပ္ဍဲကာလကၠတ်ထဝ်တွဵုရးဍုၚ်မန် အလန်ပထမ တုဲကၠုၚ်တေံ ဒံက်တာအံၚ်နာၚ်ဥု အမာတ်ကၠတ်ထဝ်တွဵုရး နူဒေသမာဲ လၟိဟ် (၁) ပွိုၚ်ဍုၚ်တ္ကံခၟိုၚ် သၟာန်လဝ် “ဂအာၚ် တိုက်စမြိုၚ် သ္ၚိစာတ်မတ်မလီုလၟုဟ်ဏံ သွက်ဂွံသွံကဵုပုဂ္ဂလိက နွံဟာ ဟွံမွဲဟာ” ဂှ်တုဲ ဖျုဲပြံၚ်ဏာ ဒၞါဲသ္ၚိစာတ်တၟိတေံတုဲမ္ဂး သ္ၚိစာတ်မတ်မလီုဏံ ဟိုတ်နူဒှ်ဒၟံၚ်တိ ဌာနဝန်ဇၞော် ကေၚ်ကာအပ္ဍဲဍုၚ်ဂှ်ရ ညံၚ်ဂွံဒှ် သွက်ပရေၚ်ဖေါအ်ဗြေဝ်ဍုၚ်ကွာန်ဂှ် နူဂကောံအလဵုအသဳ တွဵုရးဍုၚ်မန် ပ္ညဳကဵုဌာနဝန်ဇၞော်ကေၚ်ကာအပ္ဍဲဍုၚ်တုဲ ပ္တိုန်ထ္ၜးကဵု အလဵုအသဳကၟိန်ဍုၚ်တေံပၠန်ဏောၚ် သာ်ဝွံ ဝန်ဇၞော်ပရေၚ်ပယျဵုဓနက်ကေုာံပရေၚ်ဂီုကၠီု အလဵုအသဳ တွဵုရးဍုၚ်မန် ကဵုလဝ်သွဟ်ရ။

သ္ၚိစာတ်ကျာ်မြဟ် အဆံၚ် (က) သွက်ကေါန်သ္ၚိစာတ် (၁၀၀၀) မွဲလ္ၚီတၠဂှ် သိုၚ်ခၞံဒၟံၚ် ပ္ဍဲဂအာၚ် (၂၅၆ ဒဿမ ၆၆ ဨက) နွံပ္ဍဲ ဂၞန်တိ (၅၈၆) ကေုာံ (၅၉၀) ဇရေၚ်ကွာန်ကုန်ပလိုၚ် (ရေတွၚ်းကုန်း) ပွိုၚ်ဍုၚ်ကျာ်မြဟ်ရ။

ပ္ဍဲတွဵုရးဍုၚ်မန်ဝွံ သ္ၚိစာတ်ကျာ်မြဟ် (မတ်မလီု) အဆံၚ် (က) အကွက်ကောန်သ္ၚိစာတ် (၁) လ္ၚီတၠ မွဲမ၊ သ္ၚိစာတ်သဓီု အဆံၚ် (ခ) အကွက်ကောန်သ္ၚိစာတ် (၅၀၀) တၠ မွဲမ သာ်ဝွံ သ္ၚိစာတ် နွံ ၂ မရောၚ် ဂွံတီကေတ် နူဌာနက္ဍိုက်ပ်သ္ၚိစာတ်တွဵုရးကီုရ။