ဗော်ၜါဗော်ဝွံ နကဵုဂကောံအဒေါဝ် (ဂကောံပညဳပညပ်) ဟွံပါလုပ်မွဲသာ် နကဵု ညးတံ ၜါဗော် တက်ကျာ သွက်ဂွံပံၚ်ကောံညးသကအ်ဂှ် ဒှ်ပရိုၚ်ခိုဟ် ပရိုၚ်တၟေၚ် ပ္ဍဲကဵုအကြာအလုံဂကူမန်ပိုဲတံတုဲ ဂကူပိုဲတံလေဝ် ဒုၚ်တၠုၚ် ဗော်ၜါဗော် သွက်ဂွံပံၚ်ကောံရ။ ပရေၚ်ဗော်ၜါဗော်ဏံ ပံၚ်ကောံညးသကအ် ဍေံကတဵုဒှ် ပ္ဍဲကဵုသၞာံ (၂၀၁၈) ဏံမ္ဂး ညးဍုၚ်ကွာန်တံ မိပ်စိုတ်တက်တဲ ဒုၚ်တၠုၚ်ဂြုဂြုဂြီုဂြီုရောၚ်။
ဆဂး ဗီုလဵုဒှ်ဒှ် ဗော်ၜါဗော်ဏံ ယဝ်ရပံၚ်ကောံ ဒှ်အာ မွဲဗော်ရောၚ် ဟီုတှေ် ဒးဒုၚ်တၠုၚ် ဗွဲမအိုဟ်တၟိုဟ်စိုတ်ရ။ အတိုၚ် လညာတ် နူကဵုအလုံဂကူမန်တံတှေ်လေဝ် ဗော်မန် ဒးနွံမွဲဗော်ဟေၚ် ညးတံ နွံပၟိက်ရ။ ညးတံ ဟွံမွဲပၟိက်ကဵု ဗော်မန် ဒှ်အာ ဒှ်ပိရောၚ်။ လညာတ်သမ္တီညးဍုၚ်ကွာန်တံဂှ် ဍာံပြမံၚ်ရ။ ပ္ဍဲအခိၚ်အခါ ဗော်သ္ပစၞးကဵုအလုံကၟိန်ဍုၚ် ဗီုဗော်အေန်အေဝ်ဒဳတံ ဒြဟတ်ဇၞော်မံၚ် ဒြဟတ်တဴမံၚ်ဂှ် ယဝ်ရ ဇကုပြးမံၚ် ဂၠိုၚ်ကဵုဗော်မ္ဂး ဒးဂိကဵုဍေံရောၚ်။ မွဲသာ်ပၠန်၊ ဂကူမန်ပိုဲ ပ္ဍဲအခိၚ်အခါ ဟွံဂွံသၠးပွးဏီဏံဂှ် ပရေၚ်ဂကူဂွံဗၠးၜးဂှ် ပၟိက်ဇၞော် နူကဵုစကာသုၚ်စောဲ သၞောတ်ဒဳမဝ်ကရေဇြဳရောၚ်။ သၞောတ်ဒဳမဝ်ကရေဇြဳဂှ် ဍေံအုပ်လဒမ်လဝ် သွက်အလုံကၟိန်ဍုၚ်တုဲ သွက်ဂကူဒြဟတ်ဍောတ်တံဂှ် ပရဲတိတ်အောန်ကွေံရောၚ်။
လိက်လလောၚ်တြးဗော်မန်ၜါ(Copy)
လက္ကရဴအိုတ် မွဲသာ်ပၠန်ဂှ် ဂကူမန်ပိုဲ ပရေၚ်ပကတ်ပကေၚ် စပ်ကဵုသၞောတ်ဒဳမဝ်ကရေဇြဳ အောန်တဴမံၚ်ဏီဂှ် မွဲသာ်၊ ညးလေပ်လိက် (ဗၟာ) ညးလေပ်ပညာခေတ် အောန်တဴမံၚ်ဏီတုဲ ပ္ဍဲအရာစုတ်မာဲဂှ် ယဝ်ရ ဒှ်အာ ၜိုပ်ၜါ ၜိုပ်ပိ ၜိုပ်ဍုန် ၜိုပ်ယာဇိုၚ် ၜိုပ်ဗု ၜိုပ်ဍာ်မိတ်ဟီုတှေ် ညးတံ ယှုက်ထုဲအာရောၚ်တုဲ စဵုကဵုကဵုမာဲဟွံဒး မာဲဇကုဂှ် ဒှ်အာမာဲ သွက်ညးတၞဟ်သအာၚ်တံရောၚ်။ ဣဏံဂှ် ဒးဒှ်ဒဝိၚ်အိုတ်ရ။
ဟိုတ်ဂှ်ရ တ္ၚဲဏံ အခိၚ်လုပ်မံၚ်ပေဲါဗတိုက် သွက်ပရေၚ်ဗၠးၜးဂကူုဂှ် ဗော်ပရေၚ်ဍုၚ်ကွာန် ခိုၚ်ၚ်ကၠိုက်က်မွဲ သ္ပစၞးကဵု အလုံဂကူမန်ဂှ် နွံပၟိက်ရောၚ်။ ဗော်ဏံဟေၚ် သွက်ဂွံပၠတရဴ ညံၚ်ဂွံဇၞးမာဲ ပ္ဍဲကဵုပေဲါရုဲမာဲ (၂၀၂၀) တေံ ပၟိက်ဇၞော်ကွေံရောၚ်။ ဆဂး ဗော်ဏံဂှ် ဒှ်ဒြဟတ် ဗော်သ္ပစၞးကဵု အလုံဂကူမန်တုဲ ဒြဟတ်ပရေၚ်ဍုၚ်ကွာန်ဖအိုတ် သ္ဂောံပါလုပ်ဂှ် ဒးသီဗ္ၜောဝ် စန်ဒက်အာထေက်ရောၚ်။
ဗော်ဒဳမဝ်ကရေဇြဳအလုံရးမန် ကေုာံ ဗော်ကောန်ဂကူမန် ပံၚ်ကောံတုဲ ဒှ်အာ မွဲဗော်ကီုလေဝ် ဗော်တၟိဏံဂှ် သ္ပစၞးကု အလုံဂကူရောၚ် ဟီုစဟွံဂွံဏီ။ မွဲအခိၚ်တေံ အဃော ကောန်ဗော် (၂) ဗော်ဏံ ကဵုမံၚ်ဒြဟတ်ဒရိုဟ် ဗော်ဂွံပံၚ်ဂှ် ကောန်ဗော်ညးတံ ဒးဒုၚ်ပတိတ် (ဝါ) ဒးဒေံါဇူတံ နွံတဴတၟာဂလိုၚ်ရောၚ်။ ယဝ်ရ ဗော်ၜါဗော်ဏံ ဒှ်ပံၚ်ရောၚ် ဟီုတှေ် ဒြဟတ်ညးတံ ပြးတိတ်မံၚ်ဂမၠိုၚ် ထေက်ကဵုဒးသီဗ္ၜောဝ်ရောၚ်။ ဒုဟ်ကလိလောန်တံဂှ် နကဵုစေတၞာဗော်ၜါ မိက်ဂွံကဵုပံၚ်တုဲဟေၚ် ကလိလောန်လဝ်ဒှ်တုဲ ထေက်ကဵု ဒးသၠးဒုဟ်ညးသကအ် ဒးက္လေၚ်သီဗ္ၜောဝ်အာထေက်ရောၚ်။
မ္ၚးနူကဵု ဒြဟတ်ကောန်ဗော် ဗော်ၜါဝွံတုဲ သၟတ်မန် ညးဗြဴမန် ညံၚ်ပၟိက်နွံ မိက်ဂွံလုပ်ကၠောန် ပရေၚ်ဍုၚ်ကွာန် နွံတဴ ဗွဲမဂၠိုၚ်ရောၚ်။ ဒတောဝ်တၞောဝ်ကၠောန်ပရေၚ်ဍုၚ်ကွာန်တံလေဝ် နွံတဴ ဗွဲမဂၠိုၚ်ဏီတုဲ နကဵုဗော်ပရေၚ်ဍုၚ်ကွာန်တံ ထေက်ကဵု ဒးကဵုဒၞာဲ ဒးသီဗ္ၜောဝ်ထေက်ရောၚ်။ မိက်ဂွံဟီုဂှ် ဒတောဝ်တၞောဝ်ပရေၚ်ဍုၚ်ကွာန်တၟိဂှ် ပိုဲဒးလွဳၜံၚ်ပတိတ်နူကဵု ဗွိုၚ်ညးဍုၚ်ကွာန် မဟာဇန်ပိုဲတံရောၚ်။
ဆဂး ဗော်သ္ပစၞးကဵုဂကူမန် သ္ဂောံဒှ်ဂှ် ဒးဒုၚ်အသမ်ညးဍုၚ်ကွာန်မန်ရောၚ်။ အတိုၚ်ညးဍုၚ်ကွာန် မန်တံ မဟာဇန်မန်တံ နွံပၟိက် စပ်ကဵု ပရေၚ်ဒက်ပတန်ဗော်ရောၚ်။ ပရေၚ်ဒက်ပတန်ဗော်ဏံ ဂွံသ္ပစၞးကဵု ဂကူမန်ဟီုမ္ဂး ဒးဒုၚ်စမ်ၜတ်ကဵု ညးဍုၚ်ကွာန်တံရောၚ်။ ဟိုတ်ဂှ်ရ ဗော်ၜါဗော်ဏံ ပံၚ်တောဲညးသကအ်တုဲမ္ဂး သွက်ဂွံသီဗ္ၜောဝ်ဒြဟတ်မ္ၚး သွက်ဂွံဆဵုဂဗ ကဝ်မယှေန် (၂၁) တၠ ဒက်ပတန်လဝ် နူကဵုကောံဓရီုဇၞော်ပရေၚ်ဍုၚ်ကွာန်ဂကူမန်ဂှ် ပၟိက်ဇၞော်ကွေံရောၚ် ပတိုန်ထ္ၜးဏာရအဴ။
0 Comments