ရာမည ဇာဇၞိက်ညးရေၚ်တၠုၚ်သၞောဝ်မန် ဗီုပံက်ဒၟံၚ်တန်ဗ္တောန်မွဲ(facebook)[/caption]
ရန်ကဵုသ္ဂောံဒှ်အထံက်ကဵုဥပဒေ ကေုာံသ္ဂောံသမၠုၚ်ပ္တိုန်လညာတ်သမ္တီဥပဒေတုဲ ပံက်ကၠုၚ်လဝ် ဂကောံရာမည ဇာဇၞိက်ညးရေၚ်တၠုၚ်သၞောဝ်မန်ဂှ် လၟုဟ်မ္ဂး သွက်ဂွံပ္တိုန်စရၚ် ညံၚ်ဂွံဒှ်ဂကောံ လုပ်ကဵုသၞောဝ်ဂှ် စဳဇန်ဒၟံၚ်ဖိုဟ်ရောၚ် ဂွံတီကေတ်။
ပြဟ်ဟ်ဏံ ဂကောံရာမညဇာဇၞိက် ညးရေၚ်တၠုၚ်သၞောဝ်မန်ဂှ် ပံက်ဂွံလဝ် ပ္ဍဲလ္ဂုၚ် ကဵု မတ်မလီုတုဲ ယဝ်ပ္တိုၚ်စရၚ်ဂကောံလုပ်သၞောဝ်တုဲမ္ဂး ဆေၚ်ကဵုကိစ္စဥပဒေတံတှေ် ကၠောန်ဗၠးဗၠးၜးၜးဂွံဏောၚ် သာ်ဝွံ ဥူအံၚ်သာန်ဥူ နူဂကောံရာမညဇာဇၞိက် ဟီုကဵုဌာန်ပရိုၚ်မန်ရ။
“လၟုဟ် သၞောဝ်ဗီုဒက်ပ္တန် ဂကောံဇာဇၞိက်ပိုဲဂှ် ချူလဝ် ဗွဲယာယဳတုဲဣရ၊ ဂကောံဏံဂှ် ပ္ဍဲလ္ဂုၚ်လေဝ် ပံက်လဝ်နွံ၊ ပ္ဍဲမတ်မလီု တွဵုရးမန်လေဝ် ပံက်လဝ်နွံ။ ၜါဏံပံၚ်တုဲ ညံၚ်ဂွံပ္တိုန်စရၚ် ပ္ဍဲအလဵုအသဳဂှ် ဂိတု ၆ ဏံတှေ် ပိုဲစချဳဏောၚ်” ဥူအံၚ်သာန်ဥူ ဟီုရ။
ဂကောံဝွံ သွက်ဂွံဗိုၚ်ဗက်ကဵုအမှု ကုညးဒးဒုၚ်ပကီုပရာပ်ပ္ဍဲပရေၚ်တြုံဗြဴ၊ ကုညးဒးဒုၚ်ဗွဲအဓမ္မ၊ ကုညးဒးဒုၚ်ဂိက္တာန်၊ ကုညးမလိၚ် (ရှေ႔နေ) ဟွံမာန်တံကီု၊ သွက်ဂွံဗိုၚ်ကဵုအရီုဗၚ် ပ္ဍဲကိစ္စသမၠုၚ်ပ္တိုန် လညာတ်သမ္တီ ဆေၚ်ကဵုပရေၚ်ဥပဒေ သီုကဵုသ္ဂောံကဵုကသပ်တံတုဲ ပံက်လဝ်ဂကောံဏံရ။
“ဂကောံဇာဇၞိက်ပိုဲဏံ ပံက်လဝ်နကဵုကမ္မတဳကမၠောန် ၃ သွာၚ်ရ၊ မွဲဂှ် ဗက်ကဵုအမှုဏောၚ်၊ ကဵုပညာဏောၚ်၊ မွဲပၠန်ဂှ် ရေၚ်တၠုၚ်ကိစ္စဖေဝ်ဒရေဝ် ဆေၚ်ကဵုပရေၚ်အခေါၚ်အဝဵု ကောန်ဍုၚ်အရၚ်တံဏောၚ်။ လၟုဟ် ဍုၚ်ဗၟာပိုဲဏံ အာဒၟံၚ်ပ္ဍဲသၞောတ်ဖေဝ်ဒရေဝ်ဏောၚ်တှေ် ဆေၚ်ကဵုပရေၚ်ဖေဝ်ဒရေဝ်ဂှ်လေဝ် ပိုဲကဵုပညာဏောၚ်၊ ညးဂလိုၚ်ညံၚ်ဂွံတီဂှ် ပရးအာဏောၚ်” သာ်ဝွံ နာဲဝေန်ကျဳ ဇၞော်ဥပဒေတြေံ တွဵုရးမန် (ဒိုအ်ဇူ) ညးက္ဍိုက်ပ်ဂကောံဇာဇၞိက်ဏံ ဟီုရ။
ဆက်တုဲ ပ္ဍဲတွဵုရးကရေၚ်၊ ရးဇၞော် မာန္တလေဝ်၊ ဗဂေါ ကေုာံရးတနၚ်သဳတေံဂှ်လေဝ် သွက်ဂွံပံက်အာ ဂကောံရာမည ဇာဇၞိက်ညးရေၚ်တၠုၚ်သၞောဝ်မန်ဂှ် စဳဇန်လဝ်ကီုရောၚ် ဂွံတီကေတ် နူညးတာလျိုၚ်ဂကောံဏံရ။
0 Comments