ဂိတုမေ (၇) တ္ၚဲရုပ်အသေအဟာန် ပေါဲသဳကၠဳပရေၚ်ဍုၚ်ကွာန် ကောန်ဂကူမန်ဂှ် သီုဒှ်တ္ၚဲ ဍုၚ်ဟံသာဝတဳလီု ပေၚ် (၂၆၁) သၞာံတုဲ နူပေါဲသဳကၠဳပရေၚ်ဍုၚ်ကွာန် ကောန်ဂကူမန်ဏံ မွဲတဆံၚ် ရန်လဝ် သွက်ဂွံဂါံတိုန်အာ ဍုၚ်ပံၚ်ကောံ ဖေဝ်ဒရေဝ် ဒဳမဝ်ကရေဇြဳတေံဏောၚ် ဥက္ကဌ ဗော်ဍုၚ်မန်တၟိ နာဲထဝ်မန် ဟီုမြော်ဏာ နဂလာန်ဘာသာမန်ရ။

“တ္ၚဲဏံ ဂိတုပသာ် (၈) စွေက်ဟီုဂှ် ဒှ်တ္ၚဲဍုၚ်ဟံသာဝတဳ မန်ပိုဲ ကျကမ် ဟုံဗြံရ၊ ပိုဲ ဝိုတ်ထောံ ဟွံဂွံပုဟ်၊ ဍုၚ်မန်ပိုဲ ဒးကျလေၚ်အာ၊ နူပေါဲသဳကၠဳဏံမွဲတဆံၚ် ရန်လဝ် သွက်ဂွံဒက်ပ္တန်အာ ဍုၚ်တၟိ သၞောတ်ဖေဝ်ဒရေဝ်ဏောၚ်၊ ကောန်ဍုၚ်အရၚ် အလုံဖအိုတ်တံလေဝ် ရန်လဝ် သွက်ဂွံဒက်ပ္တန် သၞောတ်ကၟိန်ဍုၚ်ပံၚ်ကောံ ဖေဝ်ဒရေဝ်ကီုရ၊ မွဲလ္ပာ်ဂှ် တ္ၚဲဟံသာဝတဳ လီုဏံ စၟတ်သမ္တီလဝ် ပ္ဍဲဂၠံစိုတ်တုဲ ညံၚ်ဂွံပ္တန်ဍုၚ်တၟိ မာန်ဂှ် ဂစာန်အာဏောၚ်” ဥက္ကဌဇၞော် ဗော်ဍုၚ်မန်တၟိ ဂးရ။

ဥက္ကဌ ဗော်ဍုၚ်မန်တၟိ နာဲထဝ်မန် (MNA)

လိက်စံၚ် တိတ်ကၠုၚ် နူပေါဲသဳကၠဳပရေၚ်ဍုၚ်ကွာန် ကောန်ဂကူမန်ဏံဂှ် ရန်လဝ် သွက်ဂွံပ္တိုန်ထ္ၜး ပ္ဍဲကောံဓရီု ပေန်လုၚ် ၂၁ ဗွဝ်ကၠံ အလန်တတိယတေံတုဲ ကၠောန်ကၠုၚ်လဝ်ရောၚ် သာ်ဝွံ အသေအဟာန် တုဲအာတုဲဂှ် မာံၚ်အံၚ်ထူ ညးအုပ်ကာ ကမ္မတဳကၠောန်ဗဒှ် ပေါဲသဳကၠဳ ဟီုလဴက္လးဏာ ပ္ဍဲပေါဲသောၚ်က္လး လိက်ပရိုၚ်ရ။

“ ထ္ပက်စၟတ်တဲ NCA တုဲအာတုဲ ကၠောန်ပေါဲသဳကၠဳပရေၚ်ဍုၚ်ကွာန် ကောန်ဂကူ၊ ပ္ဍဲပေါဲဏံ တၚ်တုပ်စိုတ်တံကီု၊ တၚ်ဒတဴလိုၚ်တံကီု၊ လညာတ် ဆေၚ်ကဵုမူဝါဒတံကီု၊ သရောပ်ပကောံလဝ်ဖအိုတ်ရ၊ အေပ္ဍဲဏံ တၚ်ဟွံတုပ်ညးသ္ကံ ဂှ်လေဝ်နွံ၊ တၚ်နၚ်တံဏံဂှ် ရန်ကဵု သွက်ဂွံဒက်ပ္တန် ဍုၚ်ပံၚ်ကောံဖေဝ်ဒရေဝ် အနာဂတ်၊ သွက်ပေါဲသဳကၠဳ ပရေၚ်ၜိုဟ်လလမ် နွံ ပ္ဍဲအဆံၚ်ကၟိန်ဍုၚ်တေံဂှ်တုဲ ကၠောန်သ္ပ ပေါဲသဳကၠဳဏံ ဏောၚ်” မာံအံၚ်ထူ ဂးရ။

ဒုၚ်သဇိုၚ်ကဵု အတိုၚ် မူပၞောန် ဖျေံလဝ် နူကမ္မတဳသဳကၠဳပရေၚ်ၜိုဟ်လလမ်ကၟိန်ဍုၚ်တေံဂှ်တုဲ သဳကၠဳပကောံဂွံလဝ် မူသဇိုၚ်ဖေဝ်ဒရေဝ် ဆေၚ်ကဵုကဏ္ဍဇၞော် ပရေၚ်ဍုၚ်ကွာန်ဂှ် ဂွံလဝ် (၆၇) တၚ်၊ သွက်ကဏ္ဍဇၞော် ပရေၚ်ပိုန်ဂြပ်ဂှ် မူသဇိုၚ်ပရေၚ်ပိုန်ဂြပ်၊ မူသဇိုၚ် ဆေၚ်ကဵုပရေၚ်ဘဏ္ဍာ ကေုာံ မူသဇိုၚ် ဆေၚ်ကဵုပရေၚ်ဖေါအ်ဗြေဝ် ဒေသန္တရ (၈၇) တၚ်၊ ပ္ဍဲကဏ္ဍပရေၚ်မၞိဟ်ဂှ်ပၠန် မူသဇိုၚ် ဆေၚ်ကဵု က္လေၚ်ဖျေံဒၞါဲဝါဲ၊ က္လေၚ်ပ္တန်ပ္တဴဘဝမၞိဟ် ကေုာံကိစ္စဖေါအ်ဗြေဝ် ပရေၚ်မၞိဟ်ဂှ် (၂၅) တၚ်၊ ပ္ဍဲကဏ္ဍဆေၚ်ကဵုတိဍာ် ကေုာံစဵုဒၞါမၚ်မွဲသဘာဝပွဳပွူဂှ်မ္ဂး မူဝါဒ (၅၁) တၚ်ကီု ပကောံဂွံလဝ်တုဲဣရရောၚ် သာ်ဝွံ ဂွံတီကေတ် နူကမ္မတဳ ကၠောန်ဗဒှ်ရ။

ပ္ဍဲပေါဲသဳကၠဳပရေၚ်ဍုၚ်ကွာန် ကောန်ဂကူမန် တ္ၚဲကြဴအိုတ်ဂှ် ညးစၞး နူခမဳသၚ်မန်တံကီု၊ နူဌာနဗဟဵု ပရေၚ်သၟဟ်သၟန် ကောန်ဂကူ ကေုာံပရေၚ်ၜိုဟ်လလမ် NRPC အလဵုအသဳတေံကီု၊ ကမ္မယှေန်ပရေၚ်ၜိုဟ်လလမ်၊ ကမ္မတဳပံၚ်တောဲ မၚ်ရံၚ် အရာဒိုအ်ပန်ပှော်တံကီု၊ ညးတာလျိုၚ်ဂမၠိုၚ် နူကမ္မတဳပံၚ်တောဲ သဳကၠဳပရေၚ်ၜိုဟ်လလမ် ကၟိန်ဍုၚ် UPDJC ကီု၊ သ္ကိုပ်ဝန်ဇၞော် ကေုာံ ဂကောံအလဵုအသဳ တွဵုရးမန်ကီု၊ သ္ကိုပ်ဝန်ဇၞော်ကဵု ဂကောံအလဵုအသဳ ရးတနၚ်သဳကီု၊ ကမ္မတဳသ္ကိုပ်သ္က ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ တွဵုရးမန်ကီု၊ ဂကောံရပ်လွဟ် ကောန်ဍုၚ်အရၚ် တံကီု၊ နူဗော်ပရေၚ်ဍုၚ်ကွာန်တံကီု၊ နူဂကောံမဟာဇန် မန်တံကီု၊ တၠပညာ တီကၠိုဟ်စဳကၠးတံကဵု ညးဘိက်ထေက်တံကီု ပံၚ်ဖအိုတ်မ္ဂး တိုန်စိုပ် (၉၀၀) တၠပြၚ် ဂွံဆဵုကေတ်။

ပ္ဍဲသက္ကရာဇ်ဍုၚ် ၁၁၁၉ ၊ ဂိတုပသာ် (၈) စွေက်တေံ ဥူအံၚ်ဇြေယျ ဗ္တိုက်သီကေတ် ဍုၚ်မန် ဟံသာဝတဳရ၊ သ္ပဟိုတ်ကဵုတ္ၚဲဂှ်တုဲ ကောန်ဂကူမန်တံ စၟတ်သမ္တီကၠုၚ် တ္ၚဲဍုၚ်ဟံသာဝတဳလီုရ။