ဂိတုမေ (၇) ဂှ် ရုပ်ကၠေံအသေအဟာန် ပေါဲသဳကၠဳပရေၚ်ဍုၚ်ကွာန် ကောန်ဂကူမန် ပ္ဍဲရုၚ်ဝေၚ်ဇြဟတ် ဍုၚ်ရေဝ်တုဲ နူကဵုပေါဲဏံ က္လိဂွံစိုက်ထဝ် ပရေၚ်ၜိုဟ်လလမ်ဣရဏောၚ် သာ်ဝွံ ဝန်ဇၞော် ပရေၚ်ကေၚ်ကာ ကေါန်ဂကူပအိုဝ် (နန်းစံဝၚ့်ခိုၚ်) ညးအုပ်ကာ ကမ္မတဳသ္ကိုပ်သ္က ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ တွဵုရးမန် နူဂကောံအလဵုအသဳ တွဵုရးမန် ဂးရ။
“လၟုဟ် ပေါဲသဳကၠဳဇၞော်ဏံ တုဲအာအံၚ်ၚ်ဇၞးဇၞးတုဲဂှ် ပိုဲတံ က္လိဂွံလိက်စံၚ်ဇၞော်ဇၞော်မွဲဣရ၊ ဆ္ဂး ပ္ဍဲစိုတ်အဲ လိက်စံၚ်ဏောၚ်ဂှ် အဲဟွံညာတ်၊ အဲညာတ်ဂှ် က္လိဂွံ စိုက်ထဝ်ဇၞော် မွဲစိုက်ဣရဏောၚ်၊ ဣဏံဂှ် စိုက်ထဝ်ပရေၚ်ၜိုဟ်လလမ်ရအဴ” သာ်ဝွံ နာန်သာန်ဝေအ်ဃာၚ် ဂးရ။
ပ္ဍဲအသေအဟာန်ဏံ လိက်စံၚ် မူသဇိုၚ် ဖေဝ်ဒရေဝ်ဒဳမဝ်ကရေဇြဳ ဂွံနၚ် နူဝိုၚ်သဳကၠဳ ကဏ္ဍဇၞော် (၄) ပရေၚ်ဍုၚ်ကွာန်၊ ပရေၚ်ပိုန်ဂြပ်၊ ပရေၚ်မၞိဟ်၊ ပရေၚ်တိဍာ်ကဵုသယံဇာတဂှ် နာဲဗညာလဴ ဥက္ကဌ ကမ္မတဳကၠောန်ဗဒှ် ပေါဲသဳကၠဳ ပရေၚ်ဍုၚ်ကွာန် ကောန်ဂကူမန် ပအပ်ပြာပ်ကဵုညးအုပ်ကာ ကမ္မတဳသ္ကိုပ်သ္က ပေါဲသဳကၠဳပရေၚ်ဍုၚ်ကွာန် အဆံၚ်ကေါန်ဂကူ တွဵုရးမန်တုဲ ညးအုပ်ကာ နာန်သာန်ဝေအ်ဃာၚ် ဟီုဂးဏာသာ်ဂှ်ရ။
တုဲပၠန် ပ္ဍဲညးကၠုၚ်တိုန်စိုပ် အသေအဟာန်ဏံဂှ်လေဝ် အဆံၚ်မၞိဟ် ဒးတတ်ကၠောံကၠုၚ်ဘဝ ကြံၚ်ၚ်မ္ၚိုဟ်ဟ်လေဝ်ကီု၊ မၞိဟ်အဝဲလ္ဒောဝ် ဂစာန်ပါ်ပါဲဗ္စာရဏာ ဂၠာဲဒၟံၚ်ဂၠံၚ် ဗီုလဵုသ္ဂောံရုန်တိတ် နူအကာဲအရာ ပြသၞာပစ္စုပ္ပန်လၟုဟ်ဏံလေဝ်ကီု၊ တၞောဝ်ဒတောဝ်တၟိ မိန်မအ်လဝ် မှပ် သွပ်လ္ပအ်တုဲ ဂစာန်ကၠောန်အာ သွက်အနာဂတ် ညံၚ်ဂွံခိုဟ်ဏောၚ်ဂှ်လေဝ်ကီု သာ်ဝွံ ဂွံဆဵုကေတ် အဆံၚ်မၞိဟ် ၃ အဇာရဂှ်လေဝ် ညးဆက်ဟီုဏာရ။
မာံၚ်အံၚ်ထူ နူကမ္မတဳ ကၠောန်ဗဒှ် ပေါဲသဳကၠဳပရေၚ်ဍုၚ်ကွာန် ကောန်ဂကူမန် လေဝ် “ကဏ္ဍပရေၚ်ဍုၚ်ကွာန်ဂှ် ပကောံဂွံ ၆၇ တၚ်၊ ကဏ္ဍပရေၚ်ပိုန်ဂြပ်ဂှ် ပကောံဂွံ ၈၇ တၚ်၊ ပ္ဍဲကဏ္ဍပရေၚ်မၞိဟ်ဂှ် ဂွံလဝ် ၂၅ တၚ်၊ ပ္ဍဲကဏ္ဍပရေၚ်တိဍာ်ဂှ် ဂွံလဝ် ၅၁ တၚ်” သာ်ဝွံ အသေအဟာန်တုဲ ဟီုသောၚ်က္လးဏာ ပ္ဍဲပေါဲသောၚ်က္လးလိက်ပရိုၚ်ရ။
တၚ်နၚ် မူသဇိုၚ် ဖေဝ်ဒရေဝ် ဒဳမဝ်ကရေဇြဳ ပကောံဂွံလဝ် လၟုဟ်ဏံဂှ် တၠပညာ ကၠိုဟ်ခၠၚ်ဝေါဟာရ ဥပဒေ၊ဝေါဟာရ ဆေၚ်ကဵုကဏ္ဍတံဂှ်ကီု၊ ဂကောံကဵုအထံက်အရီုနဲကဲတံဂှ်ကီု ဆက်သ္ၚဳဂၠိပ် သ္ပအာဒ္တန်ပၠန်ဏောၚ် မာံအံၚ်ထူ ဂးရ။
“သွက်ပိုဲ အခိၚ်ဂွံပလေဝ်စ အောန်မံၚ်ကီုလေဝ် ဒၟါနူညးစၞး ကဵု ညးဗိုၚ်ရီုထံက်တံ ဂစာန်သဳကၠဳကၠုၚ်ဂှ်ရ ပေါဲသဳကၠဳပရေၚ်ဍုၚ်ကွာန် ကောန်ဂကူမန်ဏံ အံၚ်ဇၞးအာ တၟံကၠံပေၚ်ၚ်ရောၚ် မိက်ဂွံဟီု” သာ်ဝွံ မာံအံၚ်ထူ ဂး။
ဗီုဂှ်ကီု ကောန်ဂကူမန်ပိုဲ သ္ဂောံဂွံ အခေါၚ်ဒဳမဝ်ကရေဇြဳ၊ အခေါၚ်တုပ်သၟဟ် ပ္ဍဲအရာပရေၚ်ဂကူ၊ အခေါၚ်ဖန်က် ကမ်ကုသိုလ်ဇကုဂှ် ဒက်ပ္တန်အာ သၞောတ်ကၟိန်ဍုၚ်ပံၚ်ကောံ ဖေဝ်ဒရေဝ် နကဵုဂၠံၚ်ပရေၚ်ဍုၚ်ကွာန်ဏောၚ် သာ်ဝွံ နာဲအံၚ်မ္ၚဵု နွံကဵုအခေါၚ်ဟီုဂး နူဗော်ဍုၚ်မန်တၟိ ဆက်သောၚ်က္လးဏာ ပ္ဍဲပေါဲသောၚ်က္လး လိက်ပရိုၚ်ဂှ်ကီုရ။
ပ္ဍဲပေါဲသဳကၠဳ ပရေၚ်ဍုၚ်ကွာန် ကောန်ဂကူမန် ကၠောန်ကၠုၚ် နူဂိတုမေ ၅ ဒဵုကဵု ရ ဂှ် ညးစၞး နူဗော်ဍုၚ်မန်တၟိ NMSP ၊ ဗော်ကောန်ဂကူမန် MNP ၊ ဗော်ဒဳမဝ်ကရေဇြဳ အလုံရးမန် AMDP ၊ ခမဳသၚ်မန်၊ ဂကောံမဟာဇန်မန် CSOs ၊ ညးစၞးမန် နူဍုၚ်သေံ ကေုာံညးဘိက်ထေက်တံ သီုဖအိုတ် ၜိုတ် ၅၀၀ တၠ တိုန်စိုပ်သဳကၠဳလဝ်တုဲ ပ္ဍဲတ္ၚဲပံက် ကၟာတ် အသေအဟာန်ဂှ် ညးစၞး နူအလဵုအသဳ၊ဒပ်ပၞာန်၊ ကၠတ်ထဝ်တံကီု၊ နူဂကောံ ရပ်လွဟ်ကောန်ဍုၚ်အရၚ်တံကီု၊ ညးဂၠေၚ်သဇိုၚ်ဝန် အလဵုအသဳ နူဌာနနာနာတံကီု ပံၚ်ဖအိုတ်မ္ဂး ညးစၞးတိုန်စိုပ် ၉၀၀ တၠပြၚ် ဂွံဆဵုကေတ်။