ကံကုသိုလ်ဂကူပိုဲ ပိုဲတံအခေါၚ်ဖန်က်ဟွံမွဲဏီမ္ဂး ဗော်ပရေၚ်ဍုၚ်ကွာန်မန် လုပ်ပေါဲရုဲမာဲဂှ် မွဲဗော်ဟေၚ်ရ နွံထေက်ဏောၚ် သာ်ဝွံ တ္ၚဲဂိတုမေ ၁၂ ဂှ် ကၠောန်သ္ပ ကောံဓရီုဇၞော်ပရေၚ်ဍုၚ်ကွာန်မန် အလန်ဒုတိယ ပ္ဍဲလွဳမာန်သာသနာ ၂၅၀၀ ဍုၚ်မတ်မလီုတုဲ နာဲဟံသာဒုဥက္ကဌဗော်ဍုၚ်မန်တၟိ နူဂကောံသဘာပတိဂှ် ဟီုဂးဏာ ပ္ဍဲဂလာန်ပံက်ကောံဓရီုရ။

“ဗော်မန်ဒှ်မွဲမှလေဝ် ဓဝ်ညဳသာနွံဏောၚ်၊ ညဳသာမှ ကံကုသိုလ်ဂကူဇကု ဇကုဖန်ဖက်ကေတ်ဂွံဏောၚ်၊ ဒှ်သာ်ဂှ်ရ ဇြဟတ်ပိုဲပြးဒၟံၚ်တံ ဂွံက္လေၚ်ပကောံမာန်ပၠန်ဂှ် ပဋိပက္ခ ပရေၚ်ပူဂဵုဒှ်ဒှ် ပရေၚ်ဂကောံမွဲကဵုမွဲဒှ်ဒှ် နွံကၠုၚ်နူအတိက်တေံဂှ် ဇိုတ် ဝိုတ်ထောံဍေံတုဲ ပံက်ကဵုတရၚ် (လ္ပကၟာတ်လဝ်တရၚ်) ပရေၚ်ပံၚ်ကောံညိ မိက်ဂွံဆဝ်မ္ၚုဟ် ဖ္တိုက်ဖၟောဝ်ဏာ” နာဲဟံသာ ဂး။

အဃောကၠောန်ဒၟံၚ်ကောံဓရီုဇၞော် ပရေၚ်ဍုၚ်ကွာန်မန် (MNA)

ဗော်ကောန်ဂကူမန် MNP ကဵု ဗော်ဒဳမဝ်ကရေဇြဳအလုံရးမန် AMDP တံၜါဗော် ညံၚ်ဂွံဒှ်ပံၚ်ဂှ် ဗော်ဍုၚ်မန်တၟိ NMSP ဂစာန်ဓရိုဟ်မံၚ်ဖိုဟ်တုဲ ဒဵု ၂၀၁၈ အိုတ် ဟွံဒှ်ပံၚ်ရၚ်သ္ကံဏီမ္ဂး ဂၠာဲအာနဲကဲတၟိပၠန်ဏောၚ် နာဲဟံသာ ဂးရ။

“သွက်ဗော်ၜါ သ္ဂောံပံၚ်ဂှ် ဒဵုလၟုဟ်ပိုဲဂစာန်မံၚ်ဖိုဟ်ရ၊ ဂကောံရေၚ်တၠုၚ်ကေၚ်ကာဗဟဵုဗော်ပိုဲ ဖျေံလဝ်သ္ဂုတ်သွာတ်ဂှ် ဒဵုကဵု ၂၀၁၈ အိုတ်တေံ ဗော်ၜါဏံ ဟွံဒှ်ပံၚ်ဏီမ္ဂး ပိုဲဂၠာဲနဲတၞဟ်မွဲနဲပၠန်ဏောၚ်၊ အဓိပါဲဂှ် ကာလပိုဲထောံပသှေ်လဝ် ညးတံတှေ် ထောံလဝ်ဏောၚ်” နာဲဟံသာ ဂး။
တုဲပၠန် ပ္ဍဲသတ္တဟခြာဟွံလအ်ဏံ ဗော်ဍုၚ်မန်တၟိ သ္ပကောံဓရီုကမ္မတဳဗဟဵုတုဲမ္ဂး က္လေၚ်ထပ်ဆဵုကဵုဗော်ၜါဂှ်တုဲ ဆက်ဂစာန်အာ သွက်ဓဝ်ညဳသာ ဗော်ပရေၚ်ဍုၚ်ကွာန်မန်ပၠန်ရောၚ် ဂးရ။

ပ္ဍဲကောံဓရီုဇၞော် ပရေၚ်ဍုၚ်ကွာန်မန် နွံကဵုအစဳဇန် ကၠောန်သ္ပပွိုၚ် ၃ တ္ၚဲဏံ သွက်ဂွံသ္ၚဳဂၠိပ် သ္ပဒ္တန်ကဵု သဇိုၚ် သၞောဝ်ဒက်ပ္တန် ဗော်သ္ပစၞး ကောန်ဂကူမန် (မူအပြောံ) ကေုာံ သွက်ဂွံဓမံက်ပ္တိုန် ပရေၚ်ကမၠောန် ဗော်သ္ပစၞးကောန်ဂကူမန်ဂှ် သဳကၠဳဖျေံအာသ္ဂုတ်သွာတ်ရောၚ် မိသုတဇဝ် ညးအုပ်ကာ ကမ္မတဳကၠောန်ဗဒှ် ကောံဓရီုဂှ် ဂးရ။

“ပ္ဍဲကောန်ဂကူမန်ပိုဲ ဒးနွံမွဲဗော်ဓဝ်ရဏောၚ်၊အေမွဲဗော်ဂှ်လေဝ် ညံၚ်ဂွံဒှ် ဗော်သ္ပစၞးဂကူမန်ဂှ် ဍေံဆေၚ်ကဵု မှာဇန် ညးဍုၚ်ကွာန်မန်တံ တၟာဂလိုၚ်ပၠန်ရ၊ ပရူပရာ လညာတ်ဇကု မိက်ဂွံကဵုက္ဍိုပ်သ္ကိုပ်ဇကုတီမ္ဂး နူဏံမွဲတဆံၚ်ကဵုမာန်ဏောၚ်၊ ဒှ်သာ်ဂှ်ရ ကၠုၚ်တိုန်ကောံဓရီုဇၞော်ဏံအိုတ်ညိ ဘိက်ပၟိၚ်ဏာ” သာ်ဝွံ မိသုတဇဝ် ဆက်ဟီုရ။

ပ္ဍဲကောံဓရီုဇၞော် တ္ၚဲပထမဂှ် ကျာ်ဇၞော်အ္စာတၠမန် မဒှ်အဓိကာရတံကီု၊ ညးစၞးဗော်ဍုၚ်မန်တၟိ မွဲကရောံကဵု နာဲဟံသာ ဒုဥက္ကဌဗဟဵုကီု၊ အ္စာသဝ်ဟံၚ်ဍုၚ် (ဝန်ဇၞော် ထိၚ်ဒဝ် သယံဇာတ ကေုာံသဘာဝပွဳပွူ) ကီု၊ဗွိုၚ်ပရေၚ်ဍုၚ်ကွာန်မန်ကီု၊ဗွိုၚ်ဂကောံလိက်ပတ်ယေန်သၞာၚ်မန်ကီု၊ ဗွိုၚ်ဂကောံမှာဇန်မန် CSO ကီု၊ ဗွိုၚ်သၟတ်မန်ကီု သီုညးဘိက်ထေက်တံကီု သီုဖအိုတ် ညးတိုန်စိုပ် နွံ ၆၀၀ တၠပြၚ်ရောၚ် ဂွံဆဵုကေတ်။