သ္ကိုပ်ဝန်ဇၞော်ကေုာံဂကောံအလဵုအသဳ တွဵုရးမန် အာဆဵုကဵုညးဍုၚ်ကွာန် ဒှ်ဒဒိုက်ဘဲဍာ်ဇၞော် (ရုၚ်အလဵုအသဳတွဵုရးမန်)

ဂိတုဂျောန် ၁၇ ဂှ် ဟိုတ်နူကျာထတ် ဗြဲဂူရိုပ်ဆက်ဂှ်ရ ပ္ဍဲတွဵုရးမန် ဒေသဗွဲမဂၠိုၚ် ဍာ်ဇၞော်တုဲ သ္ၚိၜိုတ် ၃၅၀၀ ပြၚ် ဒးဘဲဍာ် သာ်ဝွံ ဂွံတီကေတ် နူလိက်လလောၚ် အလဵုအသဳ တွဵုရးမန်ရ။

ပ္ဍဲပွိုၚ်ဍုၚ်မတ်မလီုဂှ် သ္ၚိ (၂၁၀၁) သ္ၚိ၊ ပွိုၚ်ဍုၚ်မုဟ်ဍုၚ် (၃၂၀) သ္ၚိ၊ ပွိုၚ်ဍုၚ်ဇြပ်ဗု (၇) သ္ၚိ၊ ပွိုၚ်ဍုၚ်ရေဝ် (၁၃၇၀) သ္ၚိ ဒးဘဲဍာ်ဇၞော်တုဲ မၞိဟ်ညံၚ်ဂွံဗၠးဘဲဂှ် ဒးလုပ်ဗ္ဒး ပ္ဍဲဗ္ဒိုပ်ဟံၚ်ပြာ် မပံက်ပ္တန်လဝ် ပ္ဍဲဘာလကျာ်၊ ဘာဗ္တောန်လိက်၊ ဇြပ်သ္ဘၚ်ဓဝ်ကေုာံရုၚ်ဝေၚ်ဇြဟတ်တံရောၚ် ဂွံတီကေတ်။

“တ္ၚဲဏံ(ဂျောန် ၁၈) ဍာ်က္လေၚ်စှေ်အာ ဒၞါဲလ္ၚဵု ဍာ်နွံ ၂/၃ ပေဓဝ်ရ၊ ကွဳစက်တံလေဝ် အာကၠုၚ်ဂွံဣရ၊ အကာဲအရာ နူဏေံတေံတှေ် ဒးပံက်စွံလဝ် ဗ္ဒိုပ်ဟံၚ်ပြာ် ၃-၄ ဗ္ဒိုပ်၊ လၟုဟ်ဍာ်စှေ်အာဣရတှေ် ဌာန်ညးတှေ် ညးစဴအာအိုတ်ဣရ” သာ်ဝွံ ဥူမျေအ်တာန်ဝေန် သ္ကိုပ်စၞောန်ပ္ညုၚ် အလဵုအသဳ တွဵုရးမန် ဂးရ။

သွက်ညးပါဲဘဲဍာ် လုပ်ဗ္ဒပ္ဍဲဗ္ဒိုပ်ဟံၚ်ပြာ်တံဂှ်လေဝ် နူဌာနမဆေၚ်စပ်တံ ရီုဗၚ်ရၚ်တၠုၚ်ကဵု မပ္တံ ပွမမၚ်မွဲရံၚ်စံၚ်ပရေၚ်ထတ်ယုက်၊ပရေၚ်စသုၚ်မံၚ်စံၚ်တံကီုတုဲ ဝန်ဇၞော် နူကၟိန်ဍုၚ်တေံလေဝ် သွက်မၞိဟ်မွဲမွဲတၠ ကဵုအထံက်ပၚ်သြန် ၂၁၀၀ ဒကေဝ်ကီု ဂွံတီကေတ်။

အဃောဗြဲဂူရိုပ်ဆက်ဂှ် ဍာ်နူကၞောဝ်ၜဳတေံလေဝ် စှေ်ကၠုၚ် ဍာ်ၜဳဇၞော်လေဝ် ကၟိုဟ်တိုန်ကၠုၚ်ကီုတုဲ အပ္ဍဲပွိုၚ်မွဲနာဍဳဓဝ် စိုပ်ကၠုၚ်အဆံၚ်ဍာ်ဇၞော် သ္ၚိဌာန် ဂၠံၚ်ဍာန်ဗၠိုက်ရောၚ် သာ်ဝွံ နာဲဟုတ် တၠကမၠောန်ၜဵု ကွာန်ပ္ၚ ပွိုၚ်ဍုၚ်ဇြပ်ဗု ဂးရ။

“ဗြဲဇၞော်ဗီုဏံ ကေၚ်ဒှ်ကၠုၚ်ဒၟံၚ်ကီုရ၊ ဆ္ဂး ဍာ်တိုန်ကၠုၚ်ဗီုဏံဂှ် မွဲလှေ်လေဝ် ဟွံကေၚ်ဒှ်၊ သၞာံ ၁၉၉၀ တေံ ကေၚ်ဒှ်ကၠုၚ်ဗီုဏံကီုလေဝ် ဟွံစိုပ်အဆံၚ်ဏံ၊ လၟုဟ် ဍာ်သၠုၚ်တိုန် လ္တူဍာန်ကွဳပၟတ် ၜိုတ် ၂ ဟတ်” နာဲဟုတ် ဂးရ။

ပ္ဍဲပွိုၚ်ဍုၚ် တ္ကံခၟိုၚ်၊ မုဟ်ဍုၚ်၊ ဇြပ်ဗု၊ ရေဝ်၊ ပံၚ် ကေုာံ ကျာ်မြဟ်တံဂှ် ဂၠံၚ်ဍာန်ကွဳစက်တံ ဍာ်က္လိုပ်အာ၊ တိလာ်၊ ဖဴၜဵုတံလေဝ်လီု၊ တိုၚ်ပၟတ်တံလေဝ် ဒေါံ ကဝ်စှေ်၊ သ္ၚိဌာန်တံလေဝ် တၞီဍာ်ကီုတုဲ အတိုၚ်အလဵုအသဳတွဵုရမန် တၟော်ဆလဝ်ဂှ်မ္ဂး ၚုဟ်ဟုံဗြံအာ နွံၜိုတ် (၆၄၀၀) ကိုဋ်ဒကေဝ်ရောၚ် ဂးရ။

သၟာၚ်နူဂှ်ပၠန် သွက်ဂွံရီုဗၚ်ရၚ်တၠုၚ်ပရေၚ်ညး ဒးဘဲဍာ်ဇၞော် ပ္ဍဲတွဵုရးမန်ဂှ်လေဝ် အလဵုအသဳကၟိန်ဍုၚ် ထံက်ပၚ်လဝ် ဂၠုၚ်စက်ဝှာဲဗာ ၁၂ မ (မွဲမ နွံၚုဟ်မး ၂၁ ကိုဋ်ဒကေဝ်)ကီု ဂွံတီလဝ် နူအလဵုအသဳ တွဵုရးမန်ရ။