ဝိုၚ်သဳကၠဳ ကဏ္ဍပရေၚ်ကွာန် ပ္ဍဲကောံဓရီုပေန်လုၚ် ၂၁ ဗွဝ်ကၠံ အလန်ဒုတိယ (Internews)
ဒပ်ပၞာန် ကဵု ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ NCA တုဲတံ ပ္ညဳဒၟံၚ်ဟွံဂွံ ကိစ္စမအရေဝ် “ပါ်တိတ်ဟွံဂွံ” ဂှ် သ္ဘၚ်သဳကၠဳၜိုဟ်လလမ်ကၟိန်ဍုၚ်-ကောံဓရီုပေန်လုၚ် ၂၁ ဗွဝ်ကၠံ အလန်တတိယတုဲမှ ဆက်သဳကၠဳပၠန်ဏောၚ်ဂှ် တုပ်လဝ်စိုတ်ရောၚ် က္ဍိုပ်သ္ကိုပ်ကေါန်ဍုၚ်အရၚ်တံဂးရ။
“ကိစ္စ ပါ်တိတ်ဟွံဂွံ ဏံ ယဝ်သဳကၠဳ ကၠာတတိယပေန်လုၚ်ဏံမ္ဂး တုဲဒှ်ပိုတ်အာမာန်ဟွံသေၚ်တုဲ ကောံဓရီုပေန်လုၚ်တတိယတေံ တုဲမှ ဆက်သဳကၠဳပၠန်ဏောၚ်ဂှ် ပကောံဂွံလဝ်လညာတ်ရ” သာ်ဝွံ ဃောန်မျေအ်ထောန် ဥက္ကဌ ဗော်ဗၠးၜးကောန်ဂကူပအိုဝ် PNLO ဂးရ။
က္ဍိုပ်လိက်သဳကၠဳလောဲလောဲဂွံ မပ္တံ ကိစ္စကောန်ဍုၚ်၊ ဂကောံဇမၞော်ဂဗုတ် (ခုံရုံး) ဥပဒေဖေဝ်ဖရေဝ်၊ အခေါၚ်အဝဵုကောန်ဍုၚ်အရၚ် တံဂှ် သဳကၠဳအာ ပ္ဍဲကောံဓရီုပေန်လုၚ် ၂၁ ဗွဝ်ကၠံ အလန်တတိယဂှ်ဏောၚ် ဥက္ကဌ PNLO ဂးရ။
ဆက်ဟီုပၠန်ဂှ် “လညာတ်ပိုဲဂှ် မိက်ဂွံပါ်တိတ်တှေ် အခေါၚ်ပါ်တိတ်နွံဟီုဂှ် ဟွံကေတ်ရ ပါဲထောံဣရ။ ဆ္ဂး သှေ်ဒၟံၚ် အခေါၚ်ဖန်ဖက်ကမ်ကုသိုလ်ဇကုဇကုဂှ်ကီု၊ ကၟိန်ဍုၚ်ပံၚ်ကောံဇေတ်တ်ကီု၊ ဍုၚ်ဒဳမဝ်ကရေဇြဳ ဍာံဍာံပြပြကီု ပိုဲမိက်ဂွံဂွံပေၚ်ၚ်ဏောၚ်” ဂးရ။
တုဲပၠန် ဂကောံရပ်လွဟ်ကောန်ဍုၚ်အရၚ် ထ္ပက်စၟတ်တဲ NCA တုဲတံကီု၊ ဂကောံဟဂွံထ္ပက်ဏီ ဗွဲမဂၠိုၚ်တံကီု နူသၞာံ ၂၀၁၅ တေံရ ညံၚ်ဟဂွံအာတ်မိက် အခေါၚ်ပါ်တိတ်ဂှ် စွံလဝ်မူဝါဒတုဲဒၟံၚ်ကီုရဂှ်လေဝ် ဂွံတီကေတ် နူဒံက်တာသလာၚ်လျာန်မုၚ် ဒုဥက္ကဌ မုက်ဒပ်ကောန်ဂကူချေၚ် CNF ကီုရ။
ကောံဓရီုပေန်လုၚ် ၂၁ ဗွဝ်ကၠံ အလန်ဒုတိယ တုဲကၠုၚ်တေံ ပ္ဍဲဝိုၚ်သဳကၠဳ ကဏ္ဍပရေၚ်ဍုၚ်ကွာန်ဂှ် စပ်ကဵုတၚ်မ္ဂး“အပိုၚ်အခြာတိဍာ်ဖအိုတ် အပ္ဍဲကၟိန်ဍုၚ်ဂှ် အခါလဵုမွဲ ပါ်တိတ် နူကၟိန်ဍုၚ် ဟွံဂွံရောၚ်” ဂှ်တုဲ သွာၚ်ဒပ်ပၞာန်ဂှ်မွဲလ္ပာ် သွာၚ်ကောန်ဍုၚ်အရၚ်တံဂှ်မွဲလ္ပာ် သဳကၠဳစာန်စး ပ္တိုန်ခၠေဝ်ကၠုၚ်ညးသ္ကံ ဟွံပြေပြံၚ်ဂှ် ဂွံဆဵုကေတ်။
ဂလာန်မ္ဂး “ပါ်တိတ်ဟွံဂွံ” ဟီုဂှ် နူပေါဲသဳကၠဳပရေၚ်ဍုၚ်ကွာန် ကောန်ဂကူပအိုဝ်၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဒေသ (ဒေသတွဵုရးသေံ)၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဒေသ (ဒေသရးတနၚ်သဳ)၊ ပေါဲသဳကၠဳပရေၚ်ဍုၚ်ကွာန် အဆံၚ်ကောန်ဂကူ အလိုက်ဒေသ (ဒေသရးဗဂေါ) တေံဏောၚ် ပၠောပ်လဝ်ဂလာန် သာ်ဝွံ ညးလ္ၚတ်ကၠုၚ် အကာဲအရာ ပရေၚ်ၜိုဟ်လလမ် ဍုၚ်ဗၟာတံ ဂးရ။
ကောံဓရီုပေန်လုၚ် ၂၁ ဗွဝ်ကၠံ အလန်တတိယဂှ် စနူဂိတုဂျောန် ၃၀ ကၠောန်သ္ပအာ ပွိုၚ် ၅ တ္ၚဲရောၚ် ရန်လဝ်ဗွဲအပြောံတုဲကီုလေဝ် သ္ပဒ္တန်ပ္ဍဲကောံဓရီု UPDJC (ကမ္မတဳပံၚ်တောဲ သဳကၠဳပရေၚ်ၜိုဟ်လလမ် ကၟိန်ဍုၚ်) ခြာဟွံလအ်ဏံတုဲမှ လလောၚ်ကဵုဗဗွဲသၞောဝ်ပၠန်ဏောၚ်ဂှ် ဂွံတီကေတ် နူက္ဍိုပ်သ္ကိုပ် ကောန်ဍုၚ်အရၚ်တံကီုရ။
