ဂိတုဝှ် (၁၃) မံက်၊ အံက်တဝ်ဗာ (၁၁) ဂှ် ကမ္မတဳကၠောန်ဗဒှ် တ္ၚဲသၟတ်မန် အလန်အဋ္ဌမတံ
ကၠာန်သ္ပကောံဓရီု ပ္ဍဲကဵုဘာဝိဝေကာဥတ္တမာရာမ၊ ကွာန်ကအ်ကြိက် ပွိုၚ်ဍုၚ်ကျာ်မြဟ်ဂှ်တုဲ
သဳကၠဳသ္ပဏာဒတန် ကြက်ဂလာန် ဆဝ်မ္ၚုဟ်ဂှ်ရ။
“ပ္ဍဲကဵုတ္ၚဲသၟတ်မန်ဏံဂှ် ပိုဲတံကဵုဖျုန်ကဵုပဲါရုဲမာဲ (၂၀၂၀) ဏံရလေဝ် ကြက်ဂလာန်
ပ္ဍဲပလောံဂှ်တှေ် ‘သၟတ်မန် တ္ၚဲဏံ (၂၀၂၀)တံ’ ကဵု ခရက်လဝ် ဇိုၚ်ခ္ဍာ်၊ အဓိကဂှ်တှေ်
ဂွံဒှ်ပရေၚ်ဆဝ်မ္ၚုဟ်ရလေဝ်’ သာ်ဏံ ညးအုပ်ကာ ကမ္မတဳကၠောန်ဗဒှ် တ္ၚဲသၟတ်မန် အလန်အဋ္ဌမ
တၠဂုဏ်သုခဒဳပ ဟီုမြော်ထ္ၜးရ။ ပ္ဍဲကဵုကောံဓရီု ကမ္မတဳကၠောန်ဗဒှ် တ္ၚဲသၟတ်မန် အလန်အဋ္ဌမဂှ် သဳကၠဳလးဖျေံဏာ
ပရေၚ်ကမၠောန် သွက်ဂွံပံက် သာပ်ကမ္မတဳ ကဏ္ဍနာနာသာ်ကီုတုဲ ပါ်ပရအ်ဏာတာလျိုၚ်
စပ်ကဵုပရေၚ်ဂၠာဲသြန်ဘဏ္ဍာကီု၊ သွက်ဒဳဇြာၚ်စၚ် ကုာံ ဒဳဇြာၚ်ပလောံကီုရ။ “တ္ၚဲသၟတ်မန်ဏံဂှ်ဍံကြပ်မံၚ်ကဵု (၂၀၂၀)တံလေဝ်၊ ဟိုတ်ဂှ်ရ (၂၀၂၀)တံတှေ်
ပိုဲဒးကဵုဇြဟတ်ကဵု ညးစၞးမန် ပိုဲ ဂွံဇၞးဂၠိုၚ်ဂၠိုၚ်ဂှ်တှေ် ပိုဲဆဝ်မ္ၚုဟ်အာဏောၚ် အဓိက
ကြက်အရေဝ်ဗီုဂှ်ရ’ သာ်ဝွံ တၠဂုဏ်သုခဒဳပ ဆက်ဟီုမြော်ရ။ တ္ၚဲသၟတ်မန်ဂှ် သ္ပအစာံကဵု က္ဍိုပ်သ္ကိုပ်သၟတ်တံကၠာန်ကၠုၚ်လဝ်ကာံဓရီုသၟတ်မန် ပ္ဍဲကျာ်သုက်
ဍုၚ်မတ်မလီု ကာလသၞာံခရေတ် (၁၉၄၆) ဂိတုဒဳဇြေမ်ဗာ (၂၈) ဂှ်တုဲ သၟတ်မန်တ္ၚဲဏံတံ
သဳကၠဳသ္ပကၠုၚ်ဒတန် စပ်ကဵု တ္ၚဲသၟတ်မန်ဂှ် ပ္ဍဲကဵုပေဲါသၠာဲဂတးလညာတ်သၟတ်မန်
အလန်တတိယ ပ္ဍဲကွာန်ဝါဗိုၚ် ပွိုၚ်ဍုၚ်ရေဝ်သၠုၚ်ကျာဂှ်ရ။ တ္ၚဲသၟတ်မန် အလန်အဋ္ဌမ ဂှ် သွက်ဂွံကၠောန်အာ ပ္ဍဲကဵုဒဵုခရီု ပွိုၚ်ဍုၚ်ကျာ်မြဟ်နွံတုဲ လၟုဟ်မ္ဂး
ဂကောံသၟတ်မန် ပွိုၚ် ဍုၚ်ကျာ်မြဟ်ကုာံ ခမဳသၚ်မန် ပွိုၚ်ဍုၚ်ကျာ်မြဟ်ကဵု ဌာန်ကောံသၟတ်မန်တံ
ပံၚ်ကောံသဳကၠဳ စဓမံက်ဒၟံၚ်ရုပ်ရဴ လၟၚ်ကမၠောန် ကဏ္ဍနာနာနွံရ။ တ္ၚဲသၟတ်မန် အလန်ပထမဂှ်ကၠာန်ပ္ဍဲဒဵုထောၚ် ပွိုၚ်ဍုၚ်လှာဒကှ်၊ အလန်ဒုတိယဂှ်
ပ္ဍဲကွာန်တၟံကၞေၚ် ပွိုၚ်ဍုၚ်ရေဝ် သၟဝ်ကျာ၊ အလန်တတိယဂှ် ပ္ဍဲကွာန်သၞေဟ်ဗဒဝ် ပွိုၚ်ဍုၚ်မုဟ်ဍုၚ်၊ အလန်စတုတ္ထဂှ် ပ္ဍဲကံဗိန် ပွိုၚ်ဍုၚ်ကံကြိက်၊ အလန်ပဥ္စမဂှ်ကၠာန်ပ္ဍဲကွာန်ဝါခရူ ပွိုၚ်ဍုၚ်ဇြပ်ဗု၊ အလန်ဆဌမဂှ်ကၠာန်ပ္ဍဲကွာန်ကၟာမဵု ပွိုၚ်ဍုၚ်ၜါသွာၚ်၊ အလန် သတ္တမဂှ်ကၠာန်ပ္ဍဲကွာန်သာံလှေဝ် ပွိုၚ်ဍုၚ်ဘာအၚ်ရ။