တ္ၚဲဏံ အလဵုအသဳကီု ဒပ်ပၞာန်ဗၟာကီု ဟီုဂးဒၟံၚ် ပရူကၟိန်ဍုၚ်ဖေဝ်ဒရေဝ်ရ။ ဆဂး နတဲနဇိုၚ် မုလေဝ် ညးတံ ဟွံဓမံက်ရုပ်ရဴရောၚ်။ အဃောပေဲါသဳကၠဳတက်ကျာ ပ္ဍဲကဵုပေန်လုၚ်တေံလေဝ် ၜိုန်ရ ဂကောံရပ်လွဟ်ကောန်ဍုၚ် အရၚ်တံကီု ဗော်ပရေၚ်ဍုၚ်ကွာန်ကောန်ဍုၚ်အရၚ်တံ ပတိုန်ထ္ၜးကၠုၚ် သွက်ဂွံချူသၞောတ်ဝ်ဒက်ပတန်ဍုၚ်တွဵုရးညးကဵုညး ဒးနွံရောၚ်။ ဆဂး လ္ပာ်အလဵုအသဳကီု ဒပ်ပၞာန်ကီု ဟွံတုပ်စိုတ်ရ။ ဆဂး တ္ၚဲဏံ ယဝ်ရ ဟီုမံၚ်ပရူကၟိန်ဍုၚ်ပံၚ်ကောံ (ဝါ) ကၟိန်ဍုၚ်ဖေဝ်ဒရေဝ်ရောၚ်ဟီုမ္ဂး အခေါၚ်အရာကောန်ဍုၚ်အရၚ် (ဝါ) သွက်ဂွံပါ်ပရအ်အဝဵု ကုကောန်ဍုၚ်အရၚ်တံဂှ် ပၟိက်ဇၞော်ကွေံရောၚ်။ ဟိုတ်ဂှ်ရ ဇၟာပ်ပ်ကောန်ဍုၚ်အရၚ်တံ ကံကုသဵုညးတံ ညးတံ ဂွံဖန်က်ကေတ်မာန်ဟီုဂှ် အပ္ဍဲကဵုညးတံ သၞောတ်ဝ်ဒက်ပတန်တွဵုရး ညးတံကဵု ညးတံ ဒးနွံဟေၚ်ရောၚ်။
နူကဵုအခိၚ်ကၠာဟွံဂွံတက်ကျာ ပရေၚ်ၜိုဟ်လလမ်တေံရ ဂကောံပံၚ်ကောံပရေၚ်ဂကူမန် (MAU) ဂှ် ကေၚ်ချပ်ချူလဝ် သၞောတ်ဝ်ဍုၚ်မန်ရာမညကီုရ။ ဂကောံပံၚ်ကောံဂှ် ညးစၞးနူကဵုဗော်ဍုၚ်မန်တၟိ၊ မန်ဍုၚ်သအာၚ်၊ မန်ဍုၚ်သေံကဵု ဒေသပယျဵု ကေုာံ မန်အပ္ဍဲဍုၚ်မန်တံ ပံၚ်ကောံညးသကအ်တုဲ ချူဓဇက်လဝ်နွံရောၚ်။ အခိၚ်တေံမ္ဂး ကောန်ဂကူကောန်ဍုၚ်အရၚ်တံ ပံၚ်ကောံညးသကအ်တုဲ ကေၚ်ချူလဝ် သၞောတ်ဝ်ဒက်ပတန်ဍုၚ်ဖေဝ်ဒရေဝ် မူအပြောံ (ဖက်ဒရယ်ပြည်ထောၚ်စု ဖွဲ႕စည်းပုံခြေခံဥပဒေမူကြမ်း) ကီုရ။ ဇၟာပ်ကောန်ဍုၚ်အရၚ်တံ ချူကၠုၚ်သၞောတ်ဝ်ဒက်ပတန် တွဵုရးညးကဵုညး နွံရ။ MAU လေဝ် ဂွံအခေါၚ်ချူဓဇက်ကၠုၚ် နူကဵုသက္ကရာဇ် (၂၀၀၃) စဵုကဵု (၂၀၀၈) တုဲ သၞောတ်ဝ်ဒက်ပတန်ဍုၚ်မန်ရာမညဂှ် မံက်ကၠုၚ်မွဲကၞပ်ရ။ ဟိုတ်နူကဵု သၞောတ်ဝ်ဒက်ပတန်ဍုၚ်မန်ရာမည နွံကၠုၚ်ကီု လက္ကရဴဏံ ပေဲါသဳကၠဳပရေၚ်ဍုၚ်ကွာန် အလုံဂကူမန် မံက်ဂတဝ်ကၠုၚ်ကီုတုဲ ဂၠံၚ်တရဴပရေၚ်ဗၠးၜးဂကူပိုဲတံ ကၠးမးကၠုၚ်ရ။ တ္ၚဲဏံ ဂကူမန်ပိုဲ သွက်ဂွံက္လေၚ်ချူ သၟောတ်ဝ်ဒက်ပတန်ဍုၚ်မန်ရာမညဂှ် ပၟိက်ဇၞော်တဴ ဗွဲမလောန်ရောၚ်။ တာလျိုၚ်ချူဓဇက်သၞောတ်ဝ်ဂှ် ဍေံစိုပ်ကၠုၚ် လတူပၞးပိုဲတံ မွဲဝါပၠန်ရ။ ကမၠောန်ချူသၞောတ်ဝ်ဒက်ပတန်ဍုၚ်မန်ဂှ် ဒှ်တာလျိုၚ်ပိုဲတံတုဲ ပိုဲတံ ဟွံဒးမၚ်အခိၚ်ရ။ ပိုဲတံ ပကောံပကေဝ်ညးသကအ်တုဲ ချူဂွံဒၟံၚ်ရောၚ်။
ယဝ်ရ ချူသၞောတ်ဝ်ဒက်ပတန်ဍုၚ်မန်ရာမညမ္ဂး သၞောတ်ဝ် ချူလဝ်တြေံတေံဂှ် ဒးက္လေၚ်နိဿဲပေၚ်ၚ်ရောၚ်။ ဇြဟတ်သွက်ဂွံဒးချူသၞောတ်ဝ်ဍုၚ်မန်ဂှ် ဒးဒှ်ဇြဟတ် ပရေၚ်ဂကူ ပရေၚ်ဍုၚ်ကွာန် မတန်တဴဒၟံၚ် အပ္ဍဲဍုၚ်ဝွံရောၚ်။ အခိၚ်တေံ အဃောဂကောံ MAU ချူဓဇက်မံၚ် သၞောတ်ဝ်ဍုၚ်မန်ဂှ် ဇြဟတ်ပရေၚ်ဍုၚ်ကွာန်မန် လ္ပာ်မ္ၚးရ ဂၠိုၚ်ရောၚ်။ ဟိုတ်ဂှ်ရ အခိၚ်ဏံတှေ် ဇြဟတ်ပရေၚ်ဍုၚ်ကွာန် အပ္ဍဲဍုၚ်ဏံ ထေက်ကဵုဒးရေၚ်တၠုၚ် ကၠောန်ၜိုတ်အာ သၞောတ်ဝ်ဒက်ပတန်ဍုၚ်မန်ဝွံရောၚ်။ သၞောဝာ်ဝ်ဍုၚ်မန်ဂှ် ညးဍုၚ်ကွာန် နွံတန်တဴဒၟံၚ် အပ္ဍဲဍုၚ်မန်ဟေၚ် အခေါၚ်ဒုၚ်စသိုၚ်နွံရောၚ်။ ဟိုတ်ဂှ်ရ ညးဍုၚ်ကွာန်အပ္ဍဲဍုၚ်ဏံဟေၚ် ဒးကဵုဆန္ဒဇကု နနဲသာ်လဵု ဇကု ဒက်ပတန်အာ ဍုၚ်မန်ရောၚ်။ မွဲသာ်ပၠန် သၞောတ်ဝ်ဥပဒေ ဒက်ပတန်ဍုၚ်မန်ဂှ် ချူတုဲမ္ဂး သွက်ဂွံသောၚ်ကလးကဵု ညးဍုၚ်ကွာန် ကောန်ဂကူမန်တံဂှ်လေဝ် ပၟိက်ဇၞော်ရ။ ညးဍုၚ်ကွာန်တံ ကၠိုဟ်ခၠၚ် ဒုၚ်တဲရောၚ်မ္ဂး သၞောတ်ဝ်ဝွံ ဒှ်ဒတန်ရောၚ်။ တုဲပၠန် သၞောတ်ဝ်ဍုၚ်မန်ဏံဂှ် အဆံၚ်ဍေံညံၚ်ဂွံစိုပ်ကီု၊ ညံၚ်ဂွံဗ္ဂပ်စုတ် ပ္ဍဲကဵုသၞောတ်ဝ်ကၟိန်ဍုၚ်ဖေဝ်ဒရေဝ်ဂှ်လေဝ် ပၟိက်ဇၞော်တုဲ ဒစဵုဒစး ညးသကအ် ဟွံဂွံရောၚ်။ သရုပ်ဝွံ အရာချူသၞောတ်ဝ်ဒက်ပတန်ဍုၚ်မန်ဂှ် ဒှ်အခေါၚ်အရာဂကူမန်တံပေၚ်ၚ်တုဲ ညးမအာက္ဍိုပ်ဂကူတံ ဟွံဒးမၚ်အခိၚ်မွဲသာ် ချူဓဇက်ကေတ်ဂွံရောၚ် ပတိုန်ထ္ၜးဏာရ။