သၟဟ်သၟန်၊ ဂိတုမာတ် ၆၊ သၞာံ ၂၀၂၀
ပ္ဍဲကဵုပေဲါရုဲမာဲ ၂၀၂၀ ဏံ ညးစၞးအလံၚ်အမာတ်ဂကူမန် ဂွံဂလိုၚ်တိုန်မာန်ကီု ညးစၞးအလံၚ်မာတ်မၞိဟ်ဗြဴတံ ညံၚ်ဂွံဇၞးမာဲမာန်ဂှ် ဒးကဵုဇြဟတ်ထေက်ရောၚ် ဥက္ကဋ္ဌဂကောံညးဗြဴမန် မိကောန်ဆာန်နန် ဟီုဂးလဝ် ပ္ဍဲတ္ၚဲညးဗြဴမန်ရ။
တ္ၚဲညးဗြဴမန် မရနုက်ကဵု (၁၆) ဝါဂှ် ဂကောံညးဗြဴမန်ပံၚ်တောဲတံ ကၠောန်ဗဒှ်လဝ် ပ္ဍဲကဵုဍုၚ်မတ်မလီုတုဲ ပ္ဍဲကဵုဂလာန် ဥက္ကဋ္ဌကၠောန်ဗဒှ်ဂှ် ညးဟီုဂးလဝ် သာ်ဝွံရ။
“ပ္ဍဲကဵုသၞာံ ၂၀၂၀ ဏံ ပရေၚ်ရုဲမာဲ ပ္ဍဲဍုၚ်ပိုဲ နွံမံၚ်ဏောၚ်။ နကဵုကောန်ဂကူမန်ပိုဲ သီုဖအိုတ် ညံၚ်ဂွံကဵုမာဲကဵု ညးစၞးကောန်ဂကူမန်ပိုဲကီု ဗွဲတၟေၚ် သွက်ဂွံကဵုမာဲ ညးစၞးမၞိဟ်ဗြဴတံကီု ပ္ဍဲကဵုမၞိဟ်ဒုၚ်ရုဲဂှ်လေဝ် ညးစၞးမၞိဟ်ဗြဴတံ ညံၚ်ဂွံပါလုပ်ဂၠိုၚ်ၚ်မာန်ဂှ် နကဵုညးဗြဴမန်ပံၚ်တောဲတံ ပိုဲတံ ဖတိုက်ဖအောဝ်ဏာရ” သာ်ဏံ မိကောန်ဆာန်နန် ဂးရ။
စပ်ကဵုပရေၚ်ပါ်ခြာလဝ် လ္တူညးဗြဴတံ နွံဒၟံၚ်မ္ဂး နကဵုသၞောဝ်ကၟိန်ဍုၚ် ဒးပလေဝ်လဝ်၊ ဒးချူလဝ် ချိုတ်တ်ပၠိုတ်တ်နွံမှ ပရေၚ်မၞိဟ်ဗြဴတံ ဂွံပါလုပ်ဂှ် ဒှ်ကၠုၚ်ဇြဟတ်မာန်ဏောၚ် ညးဆက်ဟီုရ။
ပ္ဍဲကဵုအခန်ကၞာတ္ၚဲညးဗြဴမန်ဂှ် ဥက္ကဋ္ဌကၠတ်ထဝ်တွဵုရး ဒဝ်တေန်အိကီု ညးချဳဓရာၚ်ကတိုၚ်ကၟဟ် သွာၚ်ညးဗြဴတံကီု ညးစၞးဗော်တံကီု နူကဵုဂကောံမဟာဇန်တံကီု တိုန်စိုပ်လဝ်ရောၚ် ဂွံတီကေတ်ရ။
အရာရုန်ဂစာန် အခေါၚ်တုပ်သၟဟ် အကြာညးဗြဴကဵု ညးတြုံဂှ် ညးဗြဴတံဟေၚ် ဒးအာက္ဍိုပ်ရောၚ် သာ်ဝွံ ပ္ဍဲကဵုလိက်သဝဏ် ဗော်ညဳသၟဟ်မန် ပလံၚ်ဗစိုပ်လဝ်ကဵု တ္ၚဲညးဗြဴမန်ဂှ် ဓမံက်ထ္ၜးလဝ်ကီုရ။
ပ္ဍဲကဵုဗွိုၚ်ကောန်ဂကူမန်ဂှ် မၞိဟ်ဗြဴတံ ပါလုပ်ပ္ဍဲကဵုပရေၚ်အာက္ဍိုပ် အောန်မံၚ်ဏီကီု ပ္ဍဲကဵုဗော်ညဳသၟဟ်မန်လေဝ် ပၞောဝ်ကဵုကေၚ်ကာဗဟဵု ၆၁ တၠဂှ် မၞိဟ်ဗြဴပါလုပ် (၈) တၠတုဲ ဒှ်မံၚ် ၁၃ က္ဍိုပ်ကၠံကီု ပ္ဍဲကဵုကမ္မတဳဗဟဵု (၃၁) တၠဂှ် မၞိဟ်ဗြဴပါလုပ်ၜါတၠကီုလေဝ် အဆံၚ်ကေၚ်ကာဗဟဵုဂှ် မွဲတၠလေဝ် ဟွံမွဲဏီရောၚ် ဂးရ။
ဂိတုဖဝ်ရဂိုန် ၁၂ မံက် တ္ၚဲဨကရာဇ်ဗြဴမန် မိစဴဗု ကတဵုဒှ်လဝ်မၞိဟ်ဂှ် စၟတ်သမ္တီကၠုၚ်လဝ် တ္ၚဲညးဗြဴမန်တုဲ ကၠောန်ဗဒှ်ကၠုၚ်မံၚ် အသေအဟာန် လၟေၚ်ၚ်သၞာံကီု ဂွံတီကေတ်ရ။
