ပ္ဍဲကွာန်ပလိုၚ်သီ၊ ဂူဂတဵု၊ ဒူရာ လ္ပာ်ဒေသဖာလိန်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ ကရောၚ်ပၞာန်ဒပ်ကမ္မယှေန်ပၞာန်တံ လုပ်စိုပ်ဒၟံၚ်ဂှ်ရ ညးဒေသတံ ဒှ်ဂဝိၚ်ကဵု ပေဲါဗ္တိုက်ကတဵုဒှ်ကၠုၚ်ရောၚ် ဂွံတီကေတ် နူတမ်ရိုဟ်ပရိုၚ်အပ္ဍဲဒေသတံရ။
ကောန်သ္ဂံၚ်ဒပ်ကမ္မယှေန်ပၞာန် မၞုံဇြဟတ်လၟိဟ်ကဵုကၠံတံဂှ်ဝွံ ဂိတုမာတ် (၄) နူတနေံဏံ အခိၚ်နူဂယးပြဟ် ၜိုတ် (၅) နာဍဳဂှ် နကဵုကွဳစက်ပၞာန် (၅) ဖ္ဍိုက် ထ္ပက်လုပ်ကၠုၚ် ကရောၚ်ပၞာန် လ္ပာ်ကွာန်ဒူရာရ။
ကရောၚ်ပၞာန် ဒပ်ကမ္မယှေန်ပၞာန်တံဂှ်ဝွံ ကေတ်ဒၞာဲ တရးလဝ်ဒပ် ပ္ဍဲဇြပ်လုပ်တိတ်ကွာန်တုဲ ပ္ဍဲဂၠံၚ်လုပ်တိတ်ကွာန်ကီု၊ ဂၠံၚ်ဆက်စၠောံကွာန်တံကီုဂှ် ထိၚ်ဒဝ်လဝ်ရောၚ် ဂးရ။
ညးဗြဴဒေသမွဲတၠဂှ် “ဂိတုမာတ် (၄) နူတနေံဏံ အခိၚ်ဍေံတံ နွံမံၚ်ပ္ဍဲကွာန်ဂှ် အလဵု ဟွံဂံၚ်အာရ။ ဖေက်ဒၟံၚ်သီုညးဖအိုတ်ရ။ ပ္ဍဲကွာန်ဂှ်လေဝ် အကြာတဏံ မိၚ်ရမျာၚ်လွဟ်၊ ရမျာၚ်မခတိုဟ်ကီု သီုကရောၚ်ပၞာန်လုပ်ကၠုၚ်၊ အေဒှ်မံၚ်ဗီုဂှ်ရ။ အကာဲအရာ ဟွံညိၚ်ဝတ်ပုဟ်” သာ်ဝွံ ညးဟီုရ။
ကရောၚ်ပၞာန် ဒပ်ကမ္မယှေန်ပၞာန် ကေတ်လဝ်ဒၞာဲ ပ္ဍဲဂၠံၚ်လုပ်တိတ်ကွာန်တံဂှ် ကၠောန်သ္ပဒၟံၚ် ပရေၚ်စၟဳစၟတ်သၟာန်သၟုက်ဒၟံၚ် ညးအာကၠုၚ်ဂမၠိုၚ်ရဂှ်လေဝ် ညးစုက်လုက်ကဵု မၞိဟ်ဆဵုဂဗ နမတ်မွဲတၠဂှ် ဟီုရ။
“ “အမေ” တံဂှ် ခွါတ်ထ္ၜိုတ်တုဲ စဴကၠုၚ်နူကၠအ်ပြဟ်မံၚ်ဂှ်ရ ဆဵုဂဗကဵု ဍေံတံ။ မုကၠောန်မံၚ်ရော၊ ကၠုၚ်နူလဵုရော၊ ကဵုပံက်ဗုၚ်ကွဳလိုန်ဓာတ်ရ။ ရံၚ်မံၚ်မၞိဟ် နကဵုဗီုပြၚ်ဒှ်သံသယ” သာ်ဝွံ ညးဟီုရ။
လ္ပာ်ဒေသဖာလိန်ဂှ်ဝွံ ဟိုတ်နူပရိုၚ် ဒပ်ပံၚ်ကောံပၠန်ဂတးတံ ချဳဓရာၚ်မံၚ်ဂှ်ရ ဒပ်ကမ္မယှေန်ပၞာန်တံ ထ္ပက်ကၠုၚ်ကရောၚ်ပၞာန် ဗီုလၟုဟ်ဏံရောၚ် ညးဒေသတံ ဟီုရ။
အခိၚ်လၟုဟ်ဏံ ကရောၚ်ပၞာန် ဒပ်ကမ္မယှေန်ပၞာန်တံဂှ်ဝွံ နူကဵုဖျေံလဝ်ဒပ် ဗဒဲါပွဳဗွိုၚ်ကွာန်တံဂှ် တိတ်အာလ္ပာ်ဂြိုပ်တေံရဂှ်လေဝ် ညးဒေသတံ ဟီုရ။
လ္ပာ်ဒေသဖာလိန်ဂှ်ဝွံ အကြာဒပ်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတး ချဳဓရာၚ်အပ္ဍဲဒေသတံ ကတဵုဒှ်မံၚ်ပေဲါဗ္တိုက် မွဲနှေံမွဲနှေံဂှ်ရ လုပ်စိုပ်ထ္ပက်ကၠုၚ်ကရောၚ်ပၞာန် လၟုဟ်ဏံဂှ် ညးဒေသတံ ဒှ်ဂဝိၚ်ကဵု ပေဲါဗ္တိုက်သ္ကာတ်မြဟ်ကၠုၚ်ရ။
