မာံပိုန်၊ မေ ၂၈၊ သၞာံ ၂၀၂၀
နူစသၞာံဗ္တောန်ပညာ ၂၀၁၇-၂၀၁၈ ဒဵုစိုပ်ပွိုၚ်သၞာံဏအ်ဂှ် နကဵုမဒါန်ကောန်ဂကူမန် နူတရဴအအာတအ် ဂွံဘိုၚ်ပါလုပ်သိုၚ်ခၞံလဝ် ဘာကောန်ဂကူမန် မၞုံဒေသလှာဒကှ် ခရိုၚ်မတ်မလီု ဗော်ဍုၚ်မန်တၟိ ဗၞတ် (၉) ဘာနွံဏောၚ် ဂွံတီကေတ်ရ။
အပ္ဍဲဂှ်မ္ဂး ဘာကောန်ဂကူမန်အဆံၚ်တန်မူလ မၞုံဒၟံၚ်ပ္ဍဲကွာန်ဝေသာလဳပလိုတ်၊ ကွာန်ဖဴခပဵု၊ ကွာန်ကအ်အၚ်ထဝ်၊ ကွာန်ဝၚ်ဂွိ၊ ကွာန်ကြုၚ်ကၠအ်သတ်၊ ကွာန်အုံခတောန်၊ ကွာန်ကအ်ကြုက်၊ ကွာန်ကၠအ်ဗြာတ်တအ် ပါလုပ်တုဲ သွက်ဘာတန်သၠုၚ်ကောန်ဂကူမန်ဝၚ်သ္ပဝ်လေဝ် နူကဵုတရဴအအာတအ် ဂွံဘိုၚ်ရီုဗၚ်ထံက်ပၚ်လဝ် မသြန်ဒါန်ကောန်ဂကူမန်နွံရ။
တၠဂုဏ်အဇ္ဇ တရဴအအာဂှ် “ပ္ဍဲကဵုဘာတန်မူလကောန်ဂကူမန် ပိုဲဂွံဘိုၚ်သိုၚ်လဝ် (၈) မဂှ်တှေ် သိုၚ်တုဲဒှ်အာ ဗွဲမချိုတ်ပၠိုတ်ဂှ် (၂) မ ကွာန်ဝေသာလဳပလိုတ်ကဵု ကွာန်ဖဴခပဵု၊ သှေ်မံၚ် (၆) မဂှ်တှေ် လ္ၚဵုဂှ် သိုၚ်ကြပ်တုဲအာ နွံမံၚ်ဏောၚ်။ လ္ၚဵုဂှ် ဂွံလဝ်ကဝက်ကဝုဲ နွံမံၚ်ဏောၚ်။ ဆဂး ဘာတအ်ဂှ် မံၚ်ဂွံအာသီု (၆) မရဏောၚ်” သာ်ဝွံ ဟီုမြော်ရ။
ပ္ဍဲအရာက္လေၚ်သိုၚ်ခၞံ၊ ပလေဝ်ဘာကောန်ဂကူမန် ဒေသလှာဒကှ် ဗၞတ် (၉) ဘာတအ်ဂှ်ဝွံ အပံၚ်မသြန်ဒါန် ၜိုတ် မွဲလ္ၚီမွဲကၠံ (၁၁၀၀) ကိုဋ်ဂှ် နူကဵုတရဴအအာ မဒါန်ကောန်ဂကူမန်တအ် ဂွံဘိုၚ်ပါလုပ်ရီုဗၚ်ထံက်ပၚ်လဝ်နွံတုဲ ပ္ဍဲကဵုဂှ်မ္ဂး မသြန်ဒါန် နူကဵုဂကောံပုညကာရဳ (ထံက်ပၚ်ပရေၚ်ပညာကောန်ဂကူမန်) ဖျေံသ္ဇိုၚ်ဍုၚ်ဂျပါန်တအ် ပါလုပ်မံၚ်တိုၚ်ခဳရောၚ် တၠဂုဏ်အဇ္ဇ ဆက်လဴထ္ၜးလဝ်ရ။
အစဳဇန်သိုၚ်ခၞံဘာကောန်ဂကူမန်ဏအ်ဝွံ နကဵုအလဵုဇကု ကွာန်ညးကဵုညးတအ် သိုၚ်ဗဒှ်တုဲ နူကဵုတရဴအအာ တန်တဴကဵုဂွံဇြဟတ်သြန် နူမဒါန်ကောန်ဂကူမန် ပ္ဍဲဍုၚ်၊ မ္ၚးဍုၚ် အောန် / ဂၠိုၚ်ဂှ်တုဲ ဘိုၚ်ရေၚ်တၠုၚ် ထံက်ပၚ်ရီုဗၚ်ကဵုလဝ်ရောၚ် ဂွံတီကေတ်ရ။
ပ္ဍဲကဵုဘာမသိုၚ်ခၞံမံၚ် ဟွံတုဲဒှ်ဏီတအ်ဂှ် ဟိုတ်နူဒှ်အခက်အခုဲကဵု ပရေၚ်သြန်ဂအုံတုဲ ဒးဒေံါဇူလဝ်ဂှ် ဂွံဆဵုကေတ်ရ။
ကမ္မတဳသိုၚ်ခၞံဘာတန်မူလကောန်ဂကူမန် ကွာန်ဝၚ်ဂွိ နာဲသ္ဍဴဉာဏ်ဂှ် “သွက်ဂွံဆက်သိုၚ်ဒတုဲထောံဂှ် ပြဟ်ဟ်ဏအ် ခက်ခုဲကဵုသြန်ရ။ မုပရောတှေ် ကွာန်ဏအ်ဂှ် လၟိဟ်သ္ၚိအောန်မံၚ်၊ ညးတအ်လဝ် ဂိုတ်လဝ်တၟာဂလိုၚ်ရ။ သွက်ၚုဟ်ခရိတ်အ္စာပရန် (အ္စာသိုၚ်ခၞံဘာ) လေဝ် ညးတအ် ကဵုဟွံမာန်ဏီပုဟ်။ ညးတအ် ဂွံဆက်သိုၚ်ပၠန်ဂှ်တှေ် ခက်မံၚ်ကဵုသြန်နွံညိ၊ ပြဟ်ဟ်ဏအ်တှေ် ဒးဒေံါဇူလဝ်ၜိုတ်ဏအ်ကၠာလေဝ်” သာ်ဝွံ လဴထ္ၜးရ။
ဘာတန်မူလကောန်ဂကူမန် ကွာန်ဝၚ်ဂွိဝွံ နကဵုဇြဟတ်ကောန်ကွာန်ညးတအ်ကဵုညးတအ် သိုၚ်ခၞံလဝ်တုဲ နူကဵုတရဴအအာတအ် ဂွံဘိုၚ်ထံက်ပၚ်လဝ် လၟိဟ်မသြန်ဒါန် အကြာ ၆၀ ကိုဋ်ဒ္ကေဝ်နွံကီုရ။
ပ္ဍဲကဵုဒေသလှာဒကှ် ခရိုၚ်မတ်မလီု ဗော်ဍုၚ်မန်တၟိဂှ် သၟာၚ်နူဘာပံၚ်နှဴတုဲ ဘာကောန်ဂကူမန်သက်က်ဂှ် ၜိုတ် (၁၆) ဘာ နွံမံၚ်ဏောၚ် ဂွံတီကေတ်ရ။
