ဝဏ္ဏမာန်၊ မေ ၃၀၊ ၂၀၂၀

ပူဂဵုဒုၚ်ရုဲစှ် ညးစၞးအလံၚ်အမာတ် ပ္ဍဲပေဲါရုဲမာဲ ၂၀၂၀ ဏံဂှ် ဒးဍိုက်ပေၚ်ကဵု သမာဓိ ပိသာ်ရောၚ် သဘာပတိ ဂကောံ ပံၚ်ကောံပရေၚ်ဂကူမန် (MAU) တြေံ ဟီုထံက်ထ္ၜးရ။
“အဓိက ပိုဲရုဲညးစၞးအလံၚ်အမာတ်ဏောၚ်တှေ် ပိုဲဒးသ္ပစၞးညးဍုၚ်ကွာန်တံဏောၚ်၊ ယဝ်ရဟီုကဵုဘာသာပိုဲတှေ် သဳလ၊ သမာဓိ၊ ပညာ ဒးဍိုက်ပေၚ်ဏောၚ်၊ အဓိကဂှ် ဍေံနွံ ၃ သာ်ဏံရ” သာ်ဏံ နာဲဗညာဂ္ဇံ ဟီုရ။
ပေဲါရုဲမာဲအလန်တတိယဏံဂှ် နူကဵုကမ္မယှေန်ပေဲါရုဲမာဲကၟိန်ဍုၚ်တံ ဟီုဓမံက်လဝ် အတိုၚ်ပေဲါရုဲမာဲကၠောန်လဝ်အခိၚ် တုဲတုဲကၠုၚ်တေံရ ကၠောန်အာရောၚ် သ္ဂးရ။
“ဒးဟီုကဵုစရာဲဍာ်ဒကေဝ် ကဆံၚ်ပညာတှေ် ပူဂဵုလုပ်ဒုၚ်ရုဲစှ် အလံၚ်အမာတ်မွဲမွဲဂှ် ဒးဂွံလဝ် တဆိပ်ဒဳဂရဳ မွဲမွဲသာ် တုဲမှ လုပ်ဒုၚ်ရုဲစှ်ထေက်ရောၚ်၊ ကာလဂှ်မှ ပရေၚ်ပတိုန်ထ္ၜးကီု ပရေၚ်ချပ်စၚ်ခြၚ် သ္ၚဳဂၠိပ်ပါ်ပဲါကီု ဍေံစှေ်ကဵုသၞောတ် ဏောၚ်” သာ်ဏံ ညးဆက်ဟီုရ။
ညးစၞးအမာတ် ဇၞးလဝ်ပေဲါရုဲမာဲ ကာလအလန်ပထမတေံကီု၊ ကာလအလန်ဒုတိယ တုဲကၠုၚ်ဏံဂှ်ကီု ညးစၞးအမာတ် လ္ၚဵုဂှ် ဟိုတ်နူစရာဲဍာ်ဒကေဝ် ဟွံပေၚ်တုဲ ၜိုတ်ဆတိုန်ဝေၚ်ကောံဓရီုကၠတ်ထဝ်ဓဝ်ဂှ်လေဝ် နာဲဗညာဂ္ဇံ ဟီုထံက်ထ္ၜး ဏာ ညးစၞးလ္ၚဵုလ္ၚဵုရ။
ပရေၚ်ရုဲစှ် ညးစၞးအလံၚ်အမာတ် ပ္ဍဲအကြာဒေသပွိုၚ်ဍုၚ်ဂမၠိုၚ်ဂှ် နူကၠာအကာဲအရာယဲကပ် ဟွံကတဵုဒှ်ဏီတေံရ ဟီုဂးပြုပြေၚ်ဒၟံၚ်နွံတုဲ ပွိုၚ်ဍုၚ်လ္ၚဵု ပြေပြံၚ်လေဝ်နွံ၊ ပွိုၚ်ဍုၚ်လ္ၚဵု အဃောပညဳပညပ်ဒၟံၚ်လေဝ် နွံရ။
ဗွဲကြဴဏံ အကာဲအရာ ပရေၚ်ယဲကပ်လေဝ် ကတဵုဒှ်တုဲ ပရေၚ်ရုဲစှ်ညးစၞးအလံၚ်အမာတ် ပ္ဍဲဒေသအကြာပွိုၚ်ဍုၚ်တံ ဂှ် ဒးဒေံါဇူလဝ် ကရောံကဵုစၞောန်ပၟိၚ် နူဌာနပရေၚ်ထတ်ယုက်တံ ပကောံမၞိဟ်ဟွံဂွံဂှ်ကီုရ။
ဆဂးဂှ် နူကဵုကမ္မယှေန်ပေဲါရုဲမာဲကၟိန်ဍုၚ်တံ ဟီုဓမံက်ကၠုၚ် စပ်ကဵုသ္ဂောံကၠောန်ပေဲါရုဲမာဲ အကြာဂိတုနဝ်ဝေမ်ဗာ ဂှ်ရောၚ်တုဲ လၟေၚ်ကမၠောန်ပရေၚ်ရုဲစှ် ညးစၞးအလံၚ်အမာတ် အကြာဒေသပွိုၚ်ဍုၚ်တံလေဝ် ကလေၚ်ဗြုကၠုၚ်မွဲဝါ ပၠန်ရ။
နကဵုဗော်ညဳသၟဟ်မန်ဂှ် တုဲကၠုၚ်ဂိတုဂျာန္နဝါရဳ ၁၂ ဂှ် ဂကောံဥက္ကဌ ၊ ဂကောံညးအုပ်ကာ ကေုာံ ကေၚ်ကာလ္ၚဵုတံ ပံၚ်လၟိဟ် (၁၆) တၠ ဒက်ပတန်ဏာ ကမ္မတဳရုဲစှ် အလံၚ်အမာတ် သွက်ပေဲါရုဲမာဲ ၂၀၂၀ ဂှ်တုဲ ဖန်ဓမံက်ဒၟံၚ် လၟေၚ် ကမၠောန် ပရေၚ်ရုဲစှ် ညးစၞးအလံၚ်အမာတ်တံရ။