ဝဏ္ဏမာန်၊ ဂျောန် ၈၊ ၂၀၂၀
သ္ပအဓိကကဵု စရာဲဍာ်ဒကေဝ် (၄) တၚ်တုဲ ရုဲစှ်အာ ညးစၞးအလံၚ်အမာတ်ရောၚ် ပ္ဍဲကဵုကောံဓရီုကေၚ်ကာဗဟဵု ဂိတုဂျောန် (၇)၊ ကၠောန်ဗဒှ်လဝ် ပ္ဍဲၝောံခန်ပိုၚ်ခေတ်၊ ဍုၚ်မတ်မလီုဂှ် သ္ပဏာဒတန်ရ။
စရာဲဍာ်ဒကေဝ် ဗော်ညဳသၟဟ်မန်ဂှ် “ဒးဒှ်ကောန်ဗော်ရောၚ်၊ ဒးဒှ်မၞိဟ်နူကဵုကမ္မတဳပွိုၚ်ဍုၚ်တံ ပတိုန်စရၚ်ကဵုဗဟဵု ဒးဒှ်ရောၚ်၊ ဒးဒှ်ညးဒေသနူပွိုၚ်ဍုၚ်ဂှ်-ဒးဒှ်ဌာန်တိုပ်သုက်ဇကု ပ္ဍဲပွိုၚ်ဍုၚ်ဂှ်ရောၚ်၊ ဒးကၠိုဟ်လဝ် စပ်ကဵုပရေၚ်သၞောဝ် ဥပဒေတုဲတှေ် စပ်ကဵုပရေၚ်သဳကၠဳ ပတိုန်ဂလာန်တံဂှ် စရာဲဍာ်ဒကေဝ်ဒးပေၚ် အဵု (၄) သာ်ဏံ တၚ်အဓိကလေဝ်” သာ်ဏံ နာဲလျးတၟး ဖက်ဆောညးအုပ်ကာ လၟိဟ် (၁) ဗော်ညဳသၟဟ်မန် ဟီုရ။
စပ်ကဵုမဟာဗျူဟာပေဲါရုဲမာဲကီု၊ စရာဲဍာ်ဒကေဝ် ညးစၞးအလံၚ်အမာတ် နူကဵုကေၚ်ကာတံ ချုဓဇက်လဝ်ဂှ် ဂိတုတုဲ ကၠုၚ်ဏံ တြးလဝ်ကဵု ကမ္မတဳဗဟဵုတံ နကဵုအန်လာၚ် သွက်ဂွံသ္ၚဳဂၠိပ်ရ။
“မဟာဗျူဟာပေဲါရုဲမာဲကီု၊ စပ်ကဵုပရေၚ်ရုဲစှ် ညးစၞးအလံၚ်အမာတ် စရာဲဍာ်ဒကေဝ်ဂှ်ကီု သ္ပဏာဒတန်တုဲလေဝ်၊ ဟွံ လံတှေ် စှေ်ဆဵုဂဗ သောၚ်ကလးအာကဵု ကမ္မတဳပွိုၚ်ဍုၚ်တံတုဲ ဖန်ဇန်အာ ပရေၚ်ရုဲစှ်ညးစၞးတံဏောၚ်” နာဲလျးတၟး ဆက်ဟီုရ။
စရာဲဍာ်ဒကေဝ် ပရေၚ်ရုဲစှ် ညးစၞးအလံၚ်အမာတ်ဂှ် သီုဖအိုတ်ဓဇက်လဝ် (၁၉) တၚ်ရ။ ပ္ဍဲကဵု (၁၉) တၚ်ဂှ် တၚ်အဓိကဂှ် နွံမံၚ် (၄) တၚ်ရ။
ပ္ဍဲကဵုပရေၚ်ရုဲစှ် ညးစၞးအလံၚ်အမာတ် ပွိုၚ်ဍုၚ်ဂမၠိုၚ်ဂှ် ကမ္မတဳပွိုၚ်ဍုၚ်သ္ၚဳဂၠိပ်ရုဲစှ်၊ ဗဟဵုသ္ၚဳဂၠိပ်ရုဲစှ် ပါ်လဝ်ၜါကဆံၚ်နွံရ။ နူကဵုကမ္မတဳပွိုၚ်ဍုၚ်ဂမၠိုၚ်ဂှ် ဂိတုဂျူလာၚ် (၁၅) စွံလက္ကရဴအိုတ်တုဲ စရၚ်မၞိဟ်လုပ်ဒုၚ်ရုဲနူပွိုၚ်ဍုၚ်တံ ကလေၚ်ပတိုန်ကဵုဗဟဵုတုဲ နူဗဟဵုဂှ် ဂိတုဂျူလာၚ် (၃၁) စွံလက္ကရဴအိုတ်တုဲ ရုဲစှ်သ္ပအာဒတန်ရောၚ် ဂွံတီကေတ်ရ။
