ဟိုတ်နူကဵုယဲကပ် Covid-19 ဏံ ပရေၚ်ပိုန်ဂြပ်ညးဍုၚ်ကွာန်တံ ကြေပ်ဂြတ်ကၠုၚ်မံၚ်တုဲ နူကဵုဂိတုအဝ်ဂါတ် (၁) ဏံ စဵုဂိတုဒဳဇြေမ်ဗာအိုတ်တေံ ကဵုအခေါၚ်စကာပၟတ် သွက် (၁၅၀) ယူနေတ်ဂှ် မသက္ကုၚုဟ်မးဂှ် အလဵုအသဳသၠးကဵုရောၚ် ဌာနဝန်ဇၞော် ဓာတ်လလဳကေုာံအစောန်ဇြဟတ် လလောၚ်တြးလဝ် ပ္ဍဲကဵုဂိတုအဝ်ဂါတ် ၁၈ ဂှ်ရောၚ်။
ကိုပ်ကၠာတေံဂှ် ၜိုတ်ဂိတုဂျူလာၚ် ကဝက်ဂိတုဟေၚ် ကဵုကၠုၚ်လဝ်အခေါၚ်တုဲ ကွာန်လ္ၚဵု၊ ဒေသလ္ၚဵုတံဂှ် ကဵုလဝ်တၞးလိက်စရိတ်ပၟတ်တုဲမံၚ်တံဂှ် ယှအ်ကဵုလဝ်အကွက် (၇၅) ယူနေတ်ဓဝ်ရောၚ် ဂွံတီကေတ်ရ။
“ကၠာဟွံဂွံဗှ်မဳတာဂှ် ပိုဲသၟာန်ဏာလဝ် ရုၚ်ပၟတ်ပွိုၚ်ဍုၚ်တေံဂှ် ဂိတုဏံ ယှအ်ကဵု (၁၅၀) ယူနေတ်တှ်ေ ပိုဲဖျေံထောံဗီု၊ တုဲတှ်ေ ပ္ဍဲကဵုဂိတုဂျူလာၚ် ၂၃ ဂှ် လိက်စိုပ်ကၠုၚ် ယှအ်ကဵု (၇၅) ယူနေတ်ရ။ ပိုဲဖျေံဗီုတၟိပၠန်တုဲ ပိုဲပလံၚ်လဝ်တၞးလိက်စရိတ်ပၟတ်တုဲယျ။ နူဗ္တမ်ဂှ် ပရိုၚ်တိုန်ကၠုၚ် (၁၅၀) ယူနေတ်တှ်ေ ဒးကလေၚ်သောၚ်တၟိ ဖအိုတ်ရ” သာ်ဝွံ ညးအုပ်ကာ ကမ္မတဳပၟတ်တၟး ကွာန်နာၚ်သၠုၚ် နာဲအံၚ်တာန်ထောန် ဟီုရ။
အတိုၚ်ညးတံလလောၚ်တြးလဝ်မ္ဂး မဳတာစကာပ္ဍဲသ္ၚိတံဂှ် စဵုကဵု (၁၅၀) ယူနေတ်ဂှ် ဟွံဒးကဵုစရိတ်တုဲ စနူကဵု (၁၅၁) ယူနေတ်ဂှ် အတိုၚ်ဗ္ၜတ်ညးတံဟေၚ် တော်တၟော်ကံက်အာပၠန်ဂှ်ဂှ် မွဲသ္ၚိမ္ဂး စဵုကဵု (၁၁၅၅၀) ဒ္ကေဝ်ဂှ် သက်သာအာမာန်ရောၚ်။
နူကဵုဂိတုမေတေံ ဌာနဝန်ဇၞော်ဓာတ်လလဳဂှ် လဆောဝ်မ္ဂး အကွက်မွဲဂိတု၊ လဆောဝ်မ္ဂး အကွက် (၁၅) တ္ၚဲမွဲဝါ လလောၚ်တြးကၠုၚ်မံၚ်တုဲ ကဵုကၠုၚ်လဝ်စရိတ်ပၟတ်မးမး မွဲဂိတုမ္ဂး စဵုကဵု (၁၅၀) ယူနေတ်ဂှ် ကေၚ်နွံကၠုၚ်လဝ်ရောၚ် ဂွံတီကေတ်ရ။
