ဝဏ္ဏမာန်၊ အဝ်ဂါတ် ၂၈၊ ၂၀၂၀
အလဵုအသဳတုဲကၠုၚ်ၜါအဆက် ပွိုၚ် (၁၀) သၞာံဂှ် စပ်ကဵုပရေၚ်ပလေဝ် သ္ဇိုၚ်သၞောဝ်ဥပဒေ (၂၀၀၈) ကီု၊ ပရေၚ်ၜိုဟ်လလမ်အလုံဍုၚ်ကီု သၞောတ်ဗော်မွဲဓဝ်ဇၞးမာဲတုဲ ဒက်ပ္တန်အလဵုအသဳဂှ် ကၠောန်ရေၚ်တၠုၚ်ကဵုဟွံမာန်ရရောၚ်။ ဗော်ကောန်ဍုၚ်အရၚ်တံဇၞးမာဲတုဲ ဒက်ပတန်အလဵုအသဳပံၚ်ကောံ (ညွန်းပေါၚ်းအစိုးရ) မာန်မှ သီုၜါတၚ်ဂှ် သှ်ကလးအာမာန်ရောၚ် ဖက်ဆောညးအုပ်ကာ လၟိဟ် (၁) ဗော်ညဳသၟဟ်မန် နာဲလျးတၟး ဟီုရ။
‘ဂွံပလေဝ်အာ သၞောဝ် (၂၀၀၈) ဏံမာန်၊ ဓဝ်ၜိုဟ်လလမ် ဆိုအ်ဗမံၚ်တ္ၚဲဏံဂှ်လေဝ် ဂွံဆက်အာမာန်ဂှ် အာဂတနူဏံ အလဵုအသဳပံၚ်ကောံမံက်မွဲမှ ဂွံပလေဝ်သၞောဝ် (၂၀၀၈) မာန်ဏောၚ်၊ ဒက်ပ္တန်ပရေၚ်ၜိုဟ်လလမ်မာန်ဏောၚ်၊ ပရေၚ်ဍုၚ်ကွာန်ဍုၚ်ပိုဲ ဂွံပြံၚ်သၠာဲထောံ သၞောတ်မာန်ဂှ်တှေ် ပ္ဍဲပေဲါရုဲမာဲ (၂၀၂၀) ဏံ အလဵုအသဳပံၚ်ကောံမွဲ ညံၚ်ဂွံမံက်ဂှ် ကောန်ဍုၚ်အရၚ်တံသီုဖအိုတ် ဒးဂစာန်ရောၚ်’ နာဲလျးတၟး ဟီုရ။
ကၟိန်ဍုၚ်ဗၟာ ဆိုအ်ဗမံၚ်တ္ၚဲဏံဂှ် အဓိက ပရေၚ်ၜိုဟ်လလမ်ဍုၚ်ကဵု ပရေၚ်ပလေဝ် သ္ဇိုၚ်သၞောဝ်ဥပဒေ (၂၀၀၈) တုဲ ဗော်ဇၞးမာဲဗော်ဇြဟတ်ဇၞော် သၞောတ်မွဲဗော်ဓဝ် ဒက်ပတန်အလဵုအသဳဂှ် ဂွံဆဵုကၠုၚ်ခန်လ္ၚတ် ပေဲါရုဲမာဲ (၂) အဆက် ပွိုၚ် (၁၀) သၞာံရတုဲ သၞောတ်ဗော်မွဲဓဝ် တိုန်ဒှ်အလဵုအသဳမ္ဂး လတူဟီုလဝ်ၜါတၚ် ဂွံဖန်ပလေဝ်အာဂှ် ဒှ်ဆိုအ်ဗလၟိုန်ရောၚ် နာဲလျးတၟး ထံက်ဟီုရ။
‘ၜါတၚ် (သၞောဝ် ၂၀၀၈-ၜိုဟ်လလမ်) ဏံ ဂွံပလေဝ်အာမာန်ဂှ် တုဲကၠုၚ် (၁၀) သၞာံဏံ မွဲတၚ်လေဝ် ပလေဝ်ကဵုဟွံမာန်ပုဟ်၊ မုဒှ်ပလေဝ်ဟွံမာန် ယဝ်ရဒးဟီုဂၠေံဂၠေံတှေ် ပ္ဍဲကဵုပေဲါရုဲမာဲမွဲမွဲ ဗော်ဇၞော်ဇၞော်မွဲဂှ် ဇၞးအာကဝက်ပြၚ်တုဲတှေ် ဗော်မွဲဗော်ဟေၚ် မွဲဂကူဟေၚ် ဒက်ပ္တန်အလဵုအသဳမာန်ကီုလေဝ် ဒက်ပ္တန်ဓဝ်ၜိုဟ်လလမ်ဟွံမာန်၊ ပလေဝ်သၞောဝ် (၂၀၀၈) ဟွံမာန်ပုဟ်ဂှ် သက်သဳဍေံ ထ္ၜးလဝ်တုဲမံၚ်ယျ၊ ဂွံပလေဝ်အာ သၞောဝ် (၂၀၀၈) ဏံမာန်၊ ဓဝ်ၜိုဟ်လလမ် ဆိုအ်ဗမံၚ်တ္ၚဲဏံဂှ်လေဝ် ဂွံဆက်အာမာန်ဂှ် အာဂတနူဏံ ဗော်ကောန်ဍုၚ်အရၚ်တံ ဇၞးမာဲတုဲ အလဵုအသဳပံၚ်ကောံမံက်မွဲမှ ပလေဝ်အာမာန်ရောၚ်’ သ္ဂးရ။
နကဵုသၞောတ်ပေဲါရုဲမာဲ ကၟိန်ဍုၚ်ဗၟာတ္ၚဲဏံဝွံ ကၠတ်ထဝ်ညးဍုၚ်ကွာန်ကဵု ကၠတ်ထဝ်ကောန်ဂကူ ၜါသွာၚ်ဂှ်ပံၚ်တုဲ လၟိဟ်ညးစၞးဇၞးမာဲ ကဝက်ပြၚ်မ္ဂး ဗော်ဇၞးမာဲ လၟိဟ်ညးစၞးကဝက်ပြၚ်ဂှ် ဒက်ပ္တန်အလဵုအသဳရ။
သွာၚ်ကၠတ်ထဝ်ညးဍုၚ်ကွာန်ဂှ် ဒုၚ်သ္ဇိုၚ်ကဵု မွဲပွိုၚ်ဍုၚ် (၁) တၠဂှ် ဖအိုတ် ညးစၞး (၃၃၀) တၠ၊ ပ္ဍဲဂှ် နူဒပ်ပၞာန်ပါလုပ် (25%) ဂှ် (၁၁၀) တၠ ပံၚ် (၄၄၀) တၠ။ သွာၚ်ကၠတ်ထဝ်ကောန်ဂကူဂှ် ဒုၚ်သ္ဇိုၚ် ရး-တွဵုရး မွဲမွဲမ္ဂး (၁၂) တၠ ဖအိုတ် ညးစၞး (၁၆၈) တၠကဵု သွာၚ်ဒပ်ပၞာန် (25%) (၅၆) တၠ ပံၚ် (ညးစၞးဒုၚ်ရုဲမာဲ-ဒပ်ပၞာန်) (၂၂၄) တၠ၊ ကၠတ်ထဝ်ၜါသွာၚ်ပံၚ်တုဲ လၟိဟ်ညးစၞး (၆၆၄) ဂှ် ဗော်ဇြဟတ်ဇၞော်မွဲဗော် ဇၞးမာဲလၟိဟ်ညးစၞးကဝက်ပြၚ် လၟိဟ် (၃၃၃) ဒၞာဲ-တၠမ္ဂး ဒက်ပ္တန်အလဵုအသဳမာန်ရ။
ပေဲါရုဲမာဲ (၂၀၂၀) ဏံဝွံ ဗော်ဇြဟတ်ဇၞော် (USDP, NLD) မွဲမွဲဗော်ဂှ် အကာဲအရာသ္ဂောံဇၞးမာဲ ဗွဲမပိုတ်သ္ကုတ် ဗီုပေဲါရုဲမာဲတုဲကၠုၚ် (၂၀၁၀-၂၀၁၅) စဵုကဵုပံက်အလဵုအသဳမာန်ဂှ် ဒှ်ဟွံမာန်တုဲ ဒးပံၚ်ကောံကဵု ဇြဟတ်ဗော်ဂလိုၚ်/ ဒးပံၚ်တောဲကဵု ဗော်ကောန်ဍုၚ်အရၚ်ဂမၠိုၚ်တုဲ သ္ဒးဒက်ပတန် အလဵုအသဳပံၚ်ကောံ (ညွန်းပေါၚ်းအစိုးရ) ရောၚ် သၟာပရေၚ်ဍုၚ်ကွာန်လ္ၚဵုကီု၊ ဗော်ကောန်ဍုၚ်အရၚ်ဂမၠိုၚ်တံကီု သ္ၚဳဂၠိပ်လဝ်ရ။
