အသိၚ်ကၠောံထၞာန် ယဲကဝ်ဝေဒ်ဂှ် သၠုၚ်တိုန်မံၚ်ကီုလေဝ် ပရေၚ်ယိုက်ပလံၚ်ကပေါတ်တံ ညံၚ်ဂွံသ္ကုတ်အာဂှ် ကွဳစက်ဖ္ဍိုက်ကပေါတ် (ကုန်ကား) တံဟေၚ် ကဵုအခေါၚ်တတ်တုဲ မၞိဟ်တတ်အာတံဂှ် မၞိဟ်မွဲတၠမ္ဂး ကံက်ကေတ်သြန် ၜါလက်ဒ္ကေဝ် စၟဳစၟတ်ကဵုမံၚ်စၟယဲရောၚ် ဂွံတီကေတ်ရ။

ပ္ဍဲကဵုဂၠံၚ်လုပ်တိတ်တွဵုရးဍုၚ်မန် ပွိုၚ်ဍုၚ်ကျာ်ထဝ် က္ဍိုပ်ဒဒန်ၜဳသတိုၚ် ဒၞာဲစၟဳစၟတ်ဒၟံၚ်စၟယဲကဝ်ဝေဒ်ဂှ် နကဵု COVID-19 Antigen Test စၟဳစၟတ်ကဵုမံၚ် ရဲဒဳကွဳစက်၊ ရဲဗက်သ္ကံကွဳစက်တံရောၚ် ညးတာလျိုၚ်ဌာနပရေၚ်ထတ်ယုက်တံ ဟီုရ။

“ကိုပ်ကၠာဂှ် စၟဳစၟတ်ကဵုမံၚ် Free ရ။ တၚ်စၞောန်လေဝ် မုဟွံပါကၠုၚ်ပုဟ်။ ဂွံကၟာတ်ထောံ ကွဳစက်ဖ္ဍိုက်ကပေါတ်တံပၠန်လေဝ် ခက်ခုဲဂှ် ဍေံဇၞော်ကၠုၚ်ဏောၚ်။ တ္ၚဲပထမဂှ် ပိုဲစၟဳစၟတ်ကဵုမးမးတုဲ ကမၠောန်ဍေံတံ ကဵုဍေံတံဆက်ကၠောန်အာမာန်ဂှ် ဗလးကဵုအာရ။ ဆဂး လက္ကရဴဏံ ဒၞာဲလ္ၚဵုဂှ် ဗက်မံၚ်သြန်၊ ဒၞာဲလ္ၚဵုဟွံဗက်သြန် ဖေက်ဒှ်ဗီုဂှ်တုဲ ပိုဲတံဒုၚ်ဂိုၚ်ကေတ်ထောံအမိၚ် နူကဵုအလဵုအသဳကၟိန်ဍုၚ်တုဲ နူကဵုဌာနဝန်ဇၞော်ဂှ် အလုံမွဲကၟိန်ဍုၚ် ဂွံဒှ်မွဲသၞောတ်ဂှ် ကံက်ဗက်ထောံ ညးမွဲတှ်ေ ၜါလက်ဒ္ကေဝ်ရ” သာ်ဝွံ နူကဵုဌာနက္ဍိုက်ပ် ပရေၚ်ထတ်ယုက်တွဵုရး ဒု-သ္ကိုပ်စၞောန်ပ္ညုၚ် ဒံက်တာဝတ်မှုၚ် ဂးရ။

လၟုဟ်ဝွံ ပ္ဍဲကဵုသၞေဟ်ကၚ်စၟဳစၟတ်ဂှ် က္ဍိုပ်ဒဒန်ၜဳသတိုၚ်ဂှ် စၟဳစၟတ်ကဵုဒၟံၚ်စၟယဲကဝ်ဝေဒ် သွက်ရဲဒဳကွဳစက်ဖ္ဍိုက်ကပေါတ်တံဂှ် ဆဵုညာတ်အာစၟယဲ မၞိဟ် (၁၆) တၠတုဲရ။

မွဲသာ်ပၠန်ဂှ် ပ္ဍဲကဵုသၞေဟ်ကၚ် ပါၚ်ဂၠံၚ်လုပ်ဍုၚ်ရေဝ် ဂတမုက်ကွာန်ကလအ်ဂှ်လေဝ် ဆဵုဂဗလဝ် မၞိဟ်ယဲစၟကဝ်ဝေဒ် (၄) တၠတုဲမံၚ်ကီုရ။

ပ္ဍဲကဵုတွဵုရးဍုၚ်မန် ပွိုၚ်ဍုၚ်သဓီု က္ဍိုပ်ဒဒန်ဒုၚ်သမိဂှ်လေဝ် ပံက်လဝ် ဌာနစၟဳစၟတ်ယဲကဝ်ဝေဒ်တုဲ သွက်ရဲဒဳကွဳစက်တံ စၟဳစၟတ်ကဵုမံၚ်ကီုရောၚ် ဂွံတီကေတ်ရ။