မိလတိုပ်ဗု၊ အံက်တဝ်ဗာ ၁၀၊ ၂၀၂၀
ပဟိုတ်နူကဵုအသိၚ်ယဲကပ် Covid 19 တုဲ ဌာနပရေၚ်ပညာကောန်ဂကူမန်တံ စဓမံက်အာရုပ်ရဴ ကမၠောန် ပွမကသေအ်ကၟဝ် ပရေၚ်ပါလုပ်နဒဒှ်ကောန်ဂကောံ ‘ဂကောံညးဆာန်ကၟိန် ပရေၚ်ပညာကောန်ဂကူမန် လ္တူလပှ်ကျာ’ ရောၚ် ဒုလျိုၚ်ဌာနပညာ(ဗဟဵု) မိကြက်နန် ဟီုထ္ၜးသာ်ဏံရ။
‘အကာဲအရာကမၠောန်ပိုဲဏံဂှ်တှေ် ဒးပကောံမၞိဟ်၊ ဒးပသောၚ်က္လးဏောၚ်၊ ဒးစှေ်သဳကၠဳဏောၚ်၊ ဆဂး ဟိုတ်နူ ယဲကပ်ဏံတုဲ ပိုဲဓမံက်အာရုပ်ရဴ တြးဏာတၞးလိက်(Form) လ္တူ(Online)လပှ်ကျာကၠာ၊ ဂကောံပိုဲဏံဂှ် ပိုဲဂွိုအ် ဒက်လဝ်ဏီပုဟ်၊ အခိၚ်လဵုစဒက်ရောဂှ်လေဝ် ပိုဲဂိုွအ်ဖျေံလဝ်ဏီပုဟ်၊ လၟုဟ်မှ ပိုဲဂွံလလောၚ်တြး လဝ်တၞးလိက်ဏံဂှ်တှေ် တုဲပၠန် တၞးလိက်ဏံဂှ်လေဝ် မၞိဟ်ဆဒှ် ဗပေၚ်လေပ်ဖအိုတ်ဟွံသေၚ်၊ ရဲဗပေၚ်ဟွံလေပ်ဂှ်လေဝ် အရၚ်ညးတံ နဲလဵုဒးဗပေၚ် ဠညးတၞဟ်တံ စိုတ်လုပ်စ ညးတံမှာန်ကၠုၚ် ညးတံ ဒက်ဏောၚ်ဟီုတှေ် ဠအခိၚ်ဂှ်မှ ပိုဲစဒက်အာဂကောံဏံဏောၚ်’ သာ်ဏံ ဒုလျိုၚ်ဌာနပညာ (ဗဟဵု) မိကြက်နန် ဟီုရ။
ဂကောံညးဆာန်ကၟိန် ပရေၚ်ပညာကောန်ဂကူမန်ဝွံ အပ္ဍဲပွိုၚ် (၃) သၞာံမ္ဂး လၟိဟ်ကောန်ဂကောံ (၁) ကိုဋ္ဋ်တၠ ညံၚ်သ္ဂောံပေၚ် ရန်တၟံလဝ်တုဲ ဝတ်တာလျိုၚ်ကောန်ဂကောံတံဝွံ ဇၟာပ်ပ်ဂိတု မွဲဂိတုမ္ဂး သြန် (၁၀၀၀) မွဲလ္ၚီဒကေဝ် ဒးစုတ်ပကောံအာရောၚ် ဖျေံလဝ်အစဳဇန်နွံရ။
‘ဗီုပြၚ်ဒက်ဂကောံပိုဲဂှ်တှေ် သွက်ဂွံစဓမံက်ရုပ်ရဴကမၠောန်ကီု ဂွံကောပ်ကာဲစရၚ်သြန်ကီုဂှ် နူဂကောံကမ္မတဳ ပရေၚ်ပညာပိုဲရ ရုဲကေတ်မၞိဟ် (၅) တၠတုဲ ပိုဲဒက်အာ ဂကောံတၞဟ်ခြာမွဲဏောၚ်၊ သွက်ဂွံဆက်စၠောံကုတၠဒါန်ကီု ပကောံစရၚ်သြန်ကဵု ဗေန် (ဘဏ်) ကီုဂှ် ခါန်ကၞက်အာ ညးဒုၚ်ကာ ပ္ဍဲရုၚ်ဍုၚ်မတ်မလီုမွဲဏောၚ်၊ တုဲပၠန် သွက်ဂွံဆဝ်မ္ၚုဟ် ကုတၠဒါန် ဂွံပလံၚ်စၠောံသြန် ကုညးဒုၚ်ကာရုၚ်ဂှ်လေဝ် ရုဲစှ်အာ ညးမဆာန်ကၟိန် ပရေၚ်ပညာဂကူပိုဲ မွဲကွာန်တှေ် မၞိဟ် (၃) တၠ ကဵုအာတာလျိုၚ်ဏောၚ်’ သာ်ဏံ အာစာၝောံမိကြက်နန် ဆက်ဟီုပၠန်ရ။
သြန်ဂကောံ ‘ဂကောံညးဆာန်ကၟိန် ပရေၚ်ပညာကောန်ဂကူမန်’ ဏံဝွံ ညးတၠဒါန် လၟိဟ် (၃၀၀၀၀) တၠ စုတ် ပကောံအာ ပေၚ်ပွိုၚ်မွဲသၞာံမ္ဂး စရပ်စပ်အာအိက်သြန်တံဂှ်တုဲ ထံက်ပၚ်အာကုအ္စာဘာ ဘာကောန်ဂကူ မန်တံရောၚ် ဂွံတီကေတ်လဝ်ရ။
ပရေၚ်ပညာကောန်ဂကူမန်ဝွံ လၟေၚ်ကမၠောန်ပရေၚ်ပညာ သ္ဂောံဗ္ဂေတ်ဒၟံၚ်စက်ယန် ပရေၚ်ပညာဂှ် ဒးပတှေ် ဒၟံၚ် ဇြဟတ်ဘဏ္ဍာနူညးတၠဒါန်၊ နူမိမညးဍုၚ်ကွာန်ဂကူမန် ပ္ဍဲဍုၚ်မ္ၚးဍုၚ်တုဲ လဆောဝ်မ္ဂး သြန်ဒါန်တံ ထပိုတ်ကၠုၚ်မ္ဂး သွက်ဒးဒှ်အခက်ခုဲနွံဂှ်ရ ပရေၚ်ပညာ သ္ဂောံတန်တဴအာဍာ်ဇမၠိၚ်မာန်ဂှ် မ္ဒးချပ်ဇန်ပတိုန် ‘ဂကောံညးဆာန်ကၟိန် ပရေၚ်ပညာကောန်ဂကူမန်’ ဝွံရောၚ် ညးတာလျိုၚ်တံ သ္ဂးရ။
