ပ္ဍဲကဵုဂိတု November စၟတ်တ္ၚဲ ၉ တေံဂှ် နူကဵုအကံက် Facebook အောၚ်ဘလ (Aung Ba La) – Aung Phyo Wai ဂှ် ချူပတိုန်လဝ်လိက် Post လ္တူ Facebook ပရိုၚ်ပတောံ ပရိုၚ်အလီ စပ်ကဵု ပရိုၚ်ဗော်ညဳသၟဟ်မန် ဇၞးအာလဝ် ပ္ဍဲပွိုၚ်ဍုၚ်ရေဝ် မွဲပိုတ်ရ။

ပ္ဍဲကဵုတွဵုရးဍုၚ်ရေဝ် ဂှ် ဒၞဲါဗော်ညဳသၟဟ်မန် MUP ပ္ဍဲပွိုၚ်ဍုၚ်ရေဝ် တအ် လုပ်ပြိုၚ်လဝ် ပ္ဍဲဒၞဲါပိဒၞဲါဂမၠိုၚ်တအ်ဂှ် ဒှ်ဒၟံၚ်မာဲအလီဏောၚ်၊ ကော်မရှၚ်ပေဲါရုဲမာဲတအ် ကလေၚ်စၟဳစၟတ်ကဵုပၠန်ညိဂှ် နူကဵုအကံက် အောၚ်ဘလ (Aung Ba La) ချူပတိုန်လဝ် ပ္ဍဲကဵု group (မော်လမြိုၚ်ကို ချစ်ကြသူများ) ဂှ်ရ။

မၞိဟ်ရပ်သုၚ်စောဲ အကံက်ဏံဂှ် ယဝ်ဒးကလေၚ်စၟဳစၟတ်ရံၚ်မ္ဂး ချူပတိုန်လဝ် အရေဝ်က္ဍုဟ်ဒမၠေံ နာနာသာ်ကီု၊ ချူပတိုန်လဝ် ပရူဒပ်ပၞာန်ပရေံကီု၊ ပရူဗော် USDP ပရေံကီုဂှ် ချူပတိုန် ဟီုဂရိုဟ်လဝ် နာနာသာ် ဂွံဆဵုကေတ်ရ။

မၞိဟ်ရပ်သုၚ်စောဲဒၟံၚ်အကံက်ဏံဂှ် ဒှ်ညးကဵုမံၚ်ဇြဟတ်ကဵု ဗော် NLD မွဲဏောၚ်ဂှ် ဟီုစဂွံရ၊ မုဟိုတ်ရောဟီုမ္ဂးတှ်ေ သ္ပဟိုတ်နူကဵု ဗော်NLD လုပ်ပြိုၚ်ပ္ဍဲတွဵုရးဍုၚ်ရေဝ်ဂှ် ကျအာ ဗော်ညဳသၟဟ်မန် အတိုၚ်သီု (၅) ဒၞာဲဂှ်တုဲ ကလေၚ်ချူပတိုန်လဝ်ပရိုၚ်ဒဒှ်ဗၠေတ်ဗၠေတ် သာ်ဝွံရ။

ပရိုၚ်ဏံမုဟိုတ်ဒှ်ပရိုၚ်ဗၠေတ်ဗၠေတ်ရော ဟီုမာန်ရောမ္ဂး ပရေၚ်စရၚ်ဇၞးမာဲ ပွိုၚ်ဍုၚ်ရေဝ်ဂှ် နူကဵု မုက်လိက် ဌာန်ပရိုၚ်မန်ကီု၊ ဌာန်ပရိုၚ် (သံလွၚ်တိုၚ်း) ကီု၊ ပ္ဍဲကဵု မုက်လိက် 2020 election info Desk- Mon State တအ်ဂှ် သ္ပဒတန် လဝ် ပ္ဍဲဂိတု November စၟတ်တ္ၚဲ ၉ တေံတုဲဒၟံၚ်ရ။

သ္ပဟိုတ်ကဵု တၚ်ရန်တၟံ ကဵုပူဂဵု-ဂကောံ မၞိဟ်မွဲလ္ပာ်တေံ ရန်တၟံမိက်ဂွံဖျေံဂုန်သိက္ခာ သွက်ပူဂဵု-ဂကောံ မၞိဟ်မွဲလ္ပာ်ဏံတုဲ ပ္ဍဲကာလပေဲါရုဲမာဲဏံဂှ် ဟီုဂး ချူပတိုန် လိက် Post လတူမုက်လိက် social media တံတုဲ ဗက်တြးမံၚ်ပရိုၚ် ဟွံဍာံ ပရိုၚ်ဗၠေတ်တ်တံဂှ် အိုတ်ရ။

ဟိုတ်ဂှ်ရ ပူရိသာဒ်ညးဍုၚ်ကွာန်ဂမၠိုၚ်၊ ဆဵုပရိုၚ် မွဲမွဲပရောမ္ဂး ဍာံကီု ဗၠေတ်ကီု ဒှ်သံယပ္ဍဲစိုတ်မ္ဂး လ္ပပတှ်ေပြဟ် ဏီတုဲ အာလ္ၚတ်ဂၠိုက်ဂၠာဲ တမ်ရိုဟ်ပရိုၚ် ဒၞာဲမဆေၚ်စပ်တံ ဟွံသေၚ်သာ်ဂှ်မ္ဂး ဗက်လ္ၚတ်စမ်ရံၚ် လတူမုက် လိက် ဌာန်ပရိုၚ်တံတုဲမှ ပတှ်ေစှ်ေစိုတ်ညိဂှ် မိက်ဂွံဗတိုက်ဖၟောဝ်ရ။