၁. သုၚ်စောဲလဝ်လိက်လလောၚ်တြးပ္တောံတုဲ ဖန်ဗဒှ်ဒၟံၚ်ပရိုၚ်ပ္တောံ။
နကဵုလိက်လလောၚ်တြးပ္တောံတုဲ ဖန်ဗဒှ်ဒၟံၚ်ပရိုၚ်ပ္တောံဟီုမ္ဂးဂှ် ဆေၚ်စပ်ကဵုဗော်ပရေၚ်ဍုၚ်ကွာန်တုဲ သုၚ်စောဲလဝ် ယၟုပူဂဵုမွဲမွဲကီု တဆိပ်မွဲမွဲတံကီုဂှ် သွက်မၞိဟ်ဗှ်ဒၟံၚ်တံ ညံၚ်ဂွံဒှ်သၠေဟ်ပၟာဂှ် ဖန်ဗဒှ်ဒၟံၚ်ပရိုၚ်ပ္တောံတံရ။ ပရိုၚ်ပ္တောံဗီုတအ်ဏံတံဂှ် ဌာနဒးဒုၚ်လလောၚ်တြးပတိတ်လဝ်ပ္တောံတအ် ဟွံသေၚ်သာ်ဂှ် ဂကောံညံၚ်ဂွံသဝ်စှ်ေအာတအ်ဂှ် ဗဇဵုတဴဒၟံၚ် အကြာဂကောံမွဲကဵုမွဲ တုဲ က္တဵုဗဒှ်ဒၟံၚ်ဓဝ်သၠေဟ်ပၟာမာန်ရ။
၂. ဒုၚ်သ္ဇိုၚ်ကဵုပရိုၚ်မၞိဟ်ဂမၠိုၚ်တအ် စိုတ်လေပ်စဂၠိုၚ်တအ်ဂှ်တုဲ ကၠောန်ဗဒှ်ပရိုၚ်ပ္တောံ။
ပရိုၚ်ပ္တောံဗီုတအ်ဏံတံဂှ် ဆေၚ်စပ်ကဵုကိစ္စ အန္တရာယ်သဘာဝကဵု ပရေၚ်ထတ်ယုက်တအ်တုဲ သုၚ်စောဲစဂၠိုၚ်အိုတ်ဂှ်တှ်ေ ဗီုပြၚ်ပရိုၚ်ပ္တောံဗီုတအ်ဏံရ။ ဒုၚ်သ္ဇိုၚ်ကဵုပရေၚ်မၞိဟ်ဂမၠိုၚ်တအ် စိုတ်ဒှ်ဓဝိၚ်ကဵု စိုတ်လေပ်စဂၠိုၚ်ဂှ်တုဲ ပရိုၚ်တံရိုဟ်တအ်ဂှ် ပရူနူတမ်ဟွံမွဲမွဲသာ် ဖန်ဗဒှ်ဒၟံၚ်ပရိုၚ်ပ္တောံတအ်ရ။
၃. ဗီုပြၚ်ကုတ်ဒန်လဝ်လိက်ပရိုၚ်တုဲ ကၠောန်ပရိုၚ်ပ္တောံ။
ပရိုၚ်တြးပတိတ်ဒၟံၚ် ပ္ဍဲလိက်အုပ်ဂမၠိုၚ်တအ်ဂှ် ဓရ်ပတှ်ေလ္တူမၞိဟ်ဗှ်ဒၟံၚ်လိက်တအ် ဂွံလဝ်ခိုၚ်ခိုၚ်ကၠိုက်က်တုဲဒၟံၚ်ရ။ ကေတ်အခေါၚ်အရာလ္တူတၚ်နၚ်ဏံတုဲ မၞိဟ်ကၠောန်ဒၟံၚ်ပရိုၚ်ပ္တောံတအ်ဂှ် ဗီုပြၚ်လိက်သ္ကုတ်ပရိုၚ်တအ်ဂှ် ကၠောန်လဝ် နကဵု Photoshop တုဲ တြးဒၟံၚ်ပရိုၚ်ပ္တောံတအ်ဂှ်လေဝ် ဂွံဆဵုဒၟံၚ်ကီုရ။
၄. ပရိုၚ်ဗီုရုပ်ပ္တောံ ဟွံသေၚ်သာ်ဂှ် ဗီုရုပ်ညးတၞဟ်မွဲဂှ် ဆက်စပ်ဒၟံၚ်တုဲ ကၠောန်လဝ်ပ္တောံတအ်ဂှ် ပရိုၚ်ဗၠေတ်ဗၠေတ်။
မၞိဟ်ဗွဲမဂၠိုၚ်တအ်ဂှ် ပရိုၚ်နကဵုလိက်သၟးမပါဒၟံၚ်တအ် ဗှ်လဝ်တုဲတှ်ေ လောဲလောဲသွာသွာဟွံပတှ်ေလဝ် ကီုလေဝ် ယဝ်ခါရ ပရိုၚ်ဗီုရုပ်တအ်ပါကၠုၚ်တှ်ေ လိက်တအ်လေဝ်ကိတ်ညဳဒၟံၚ်ကီုတှ်ေ ပရိုၚ်ဒးဒးဏောၚ် ပတှ်ေစှ်ေစိုတ်အိုတ်ရ။
၅. ပရိုၚ်ဗဳဒဳယိုဝ်ပ္တောံ ဟွံသေၚ်သာ်ဂှ် ဗဳဒဳယိုဝ်တၞဟ်တၞဟ်တအ် အတိုၚ်နွံပၟိက်ကုတ်ဆက်ကေတ် ကၠာဲလဝ် ဘာသာတုဲ ကၠောန်ဗဒှ်လဝ်တအ်ဂှ် ပရိုၚ်ပ္တောံ။
ပရိုၚ်ဗဳဒဳယိုဝ်ပ္တောံဗီုတအ်ဏံတအ်ဂှ် ပတိုန်လဝ်နကဵုဘာသာဍုၚ်သၟာၚ်တုဲ အတိုၚ်နွံပၟိက် ကၠာဲလဝ်ဘာသာ (ဂကူဇကု) ပၠုပ်လဝ်ရမျာၚ်လက္ကရဴတုဲ ပရိုၚ်ပ္တောံဗီုတအ်ဏံ ကၠောန်သ္ပစလေပ်ရ။
ပွဗီုဏံဂှ် ပ္ဍဲမန်ပိုဲလေဝ် ကာလအခိၚ်ဗော်ပရေၚ်ဍုၚ်ကွာန် ပြးဇးဒၟံၚ်ၜါဗော်-ပိဗော်တေံဂှ် ပူဂဵုစီုသကီုကွတ်ပညာ ကုတ်ဆက် video လ္ၚဵု ကုတ်ဆက်လဝ် video ပရေၚ်ဇာတ်ဍုၚ်သၟာၚ်တုဲ ဟီုပၠုပ်စုတ်လဝ်ရမျှာၚ်အရေဝ် ဘာသာမန် နကဵုဂလာန်ဖျေံကဝု၊ အရေဝ်ဗျုတ်ဗ္ဒေက်လဝ် ပူဂဵု-ဗော် နွံသ္ဂောံဆဵုကေတ်ရ။
နူကဵုပတိုန်လဝ်လတူမုက်လိက် facebook မွဲမွဲတုဲ တြးစိုပ်ကၠုၚ်ဂတမုက် ပ္ဍဲမုက်လိက်ညးဂမၠိုၚ်ရ။ နူဂှ်မွဲအဆံၚ်ဂှ် ဗီုညးကဵုညး ထပ်တြးဖျေံဝေၚ်သိက္ခာ (ဖျေံဝေၚ်ကဝု) ညးသ္ကံကီု၊ သၟဝ်ဂှ်ပၠန် ချူဓမံက်ဝေၚ် Comment ပွမဖျေံသိက္ခာ (ဖျေံကဝု) အိုတ်ဂှ်လေဝ် ဂွံဆဵုကေတ်ရ။
၆. ဌာန်ပရိုၚ်လုပ်ပ္ဍဲသၞောဝ်ဂမၠိုၚ်တအ် ဂကောံတအ်ဂှ် သုၚ်စောဲလဝ် ယၟုမၞိဟ်ပူဂဵုမြဟ်မြဟ်တအ် ဗီုရုပ်ညးတအ်တုဲ ဗီုပြၚ်တုပ်ညံၚ်ဂွံဗၠေတ်မှာရဴ မာန်ဂှ် ဖန်ဗဒှ်လဝ်လ္တူမုက်လိက်တအ်တုဲ တြးဒၟံၚ်ပရိုၚ်ဗၠေတ်ဗၠေတ်။
ဗီုပြၚ်ပတုပ် ပ္ဍဲမုက်လိက်ပရိုၚ်ဂမၠိုၚ် ဌာန်ပရိုၚ်လုပ်ပ္ဍဲသၞောဝ်ဂမၠိုၚ်၊ ဂကောံဂမၠိုၚ်၊ သုၚ်စောဲလဝ် ယၟုပူဂဵုမြဟ်မြဟ်တအ်ကီု ဗီုရုပ်ညးတအ်ကီုတုဲ ပ္တောံလဝ်ညံၚ်ကဵုမုက်လိက်လုပ်ဒၟံၚ်ပွိုၚ်ပ္ဍဲသၞောဝ် Facebook Page တအ်ဂှ် တြးပတိတ်ဒၟံၚ်ပရိုၚ်ဗၠေတ်ဗၠေတ်တအ်လေပ်ရ။
Page ပ္တောံဗီုတအ်ဏံတအ်ဂှ် ပ္တောံလဝ်ဌာန်ပရိုၚ်မွဲတုဲ တြးဒၟံၚ်ဗီုတအ်ဏံဂှ် မၞိဟ်ဗှ်လိက်တအ်လေဝ် ထေၚ်ခယျကၠုၚ် မဳဒဳယာလုပ်ကဵုသၞောဝ်မွဲတုဲ ပတှ်ေစဗွဲမလောဲသွာ ဒှ်လေပ်ရ။
ပရေၚ်ကၠောန်လဝ် video ပတောံ (ကၠောန်ပတုပ်လဝ်) ဒဒှ်ပရေၚ်ပရောမွဲမွဲ (ဝါ) ပွမကမၠောန်ဖျေံဂုန်သိက္ခာ (ဂလာန်ဖျေံကဝု) တံဏံဂှ် ပ္ဍဲအကြာမၞိဟ်ဂမၠိုၚ်တံဂှ် စိုပ်အာလတူမုက်လိက်မၞိဟ်ဂမၠိုၚ်သုၚ်စောဲ Social media တုဲ မၞိဟ်ဂမၠိုၚ်တံ တ္ၚအ်ထပ်တြး ဏာမွဲအဆံၚ်ပၠန်ရ။
တြးဏာဗီုဏံဂှ် ယဝ်သဒှ်ပရိုၚ်-ပရေၚ်ပရော ဂလာန်ပွမဖျေံဂုန်သိက္ခာ (ဖျေံကဝု) ဂလာန်ရုန်မဵုသ္ကဵုသၟာ်တံ ဒှ်မ္ဂး မၞိဟ်လ္ၚဵုထေၚ်ခယျကေတ် ပရေၚ်ဒဒှ်ဍာံတုဲ ထပ်တြးဏာမွဲအဆံၚ်တုဲ မွဲအဆံၚ် ကၞောတ်တဲ စဵုကဵု ဒှ်သၞဝဲ၊ ဇအိုန်ဇရက္ဍုဟ်မၠေံကၠုၚ်သ္ကံလေဝ် ဒှ်လေပ်ရ။
ဟိုတ်ဂှ်ရ ပရိုၚ်-ဂလာန်-ပရေၚ်ပရော အိုတ်သီု ပတိုန်ထ္ၜးလဝ် လတူမုက်လိက် Social media နာနာတံဂှ် လ္ပပတှ်ေပြဟ်ညိ၊ ဇၟာပ်ဆဵုဗီု-ဇၟာပ်ဆဵုပရိုၚ်-ဇၟပ်ဆဵု ပရေၚ်ပရော ဒဒှ်မွဲမွဲမ္ဂး လ္ၚတ်ဂၠိုက်ဂၠာဲကေတ် ပရိုၚ်တၚ်နၚ် နူတမ်ဍေံ၊ ဌာန်ပရိုၚ် (ဝါ) မုက်လိက် မဆေၚ်စပ်ကဵုပရိုၚ်ဍေံဂှ် ဟွံသေၚ်သာ်ဂှ်မ္ဂး သၟာန်လ္ၚတ်ဂၠိုက်ဂၠာဲ လတူဒဒှ် ပရိုၚ်ဂှ်ညိ။
ပူရိသာဒ်ရဲဗှ်လိက်ပရိုၚ်တံ ဇၟာပ်ဆဵုပရိုၚ်ဂှ် လ္ပဒုၚ်တဲပြဟ်၊ လ္ပပတှ်ေစှ်ေစိုတ်ပြဟ်တုဲ အတိုၚ်ဟီုဓမံက်လဝ် လတူပရိုၚ်ဏံ ဒဒှ်ဍာံမံၚ်ရဟာ၊ ပရိုၚ်ဒးဒးဟာ ပရိုၚ်ဗၠေတ်ဗၠေတ်ဟာဂှ် ချပ်စၚ်ခြာပါ်ပဲါကဵုအးတုဲ လတူပရိုၚ်-ပရောဒှ်ဒှ်ဂှ် ထပ်တြးဏာ ထေက်ဟွံထေက် ချပ်စၚ်ခြၚ်တုဲ ဖျေံသ္ဂုတ်သွာတ်လတူပရိုၚ်တံဂှ်ညိဂှ် မိက်ဂွံဗတိုက်ဖၟောဝ်ဏာရ။
Video Link >>https://www.facebook.com/watch/?v=727684234621805
