ဂိတုဝှ်ပေၚ်မ္ဂး စကၠောန်ဗဒှ် သဘၚ်ကျာ်ဣသိယဵု လၟေၚ်ၚ်သၞာံတုဲ ပ္ဍဲကဵုသၞာံဏံဂှ် ဟိုတ်နူကဵုယဲကပ်ကဝ်ဝေဒ်တုဲ ကၠောန်ဗဒှ်သဘၚ်ကျာ် ဟွံမာန်ဏီဂှ်ရ ညးဒေသတံ ဒှ်ဓဝိၚ်ပရေၚ်ပိုန်ဂြပ် သွက်ဂွံစသုၚ်အာရောၚ် ဂွံတီကေတ်ရ။
ညးဒေသတံဂှ် ဗဒဗဒဲါမံၚ်ကဵုညးကၠုၚ်လ္ၚောဝ်ကျာ် နူကဵုဍုၚ်သၟာၚ်ကဵု ကၟုဲအပ္ဍဲဍုၚ်တံတုဲဟေၚ် ကၠောန်မံၚ်ပရေၚ်ပိုန်ဂြပ်ကီုလေဝ် နူကဵုယဲကပ်ကဝ်ဝေဒ် စကၠောံထၞာန်ကၠုၚ် ဂိတုမာတ်တေံဂှ် ဒးဒေံါဇူထောံလဝ်ကမၠောန်အိုတ်ရ။
“ပရေၚ်သွံရာန် အောန်အာ၊ တုဲတှ်ေ စပ်ကဵုပရေၚ်ပိုန်ဂြပ်လေဝ် ထပက်စှ်ေအာ၊ နူကဵုယဲဂှ် လုပ်ကၠုၚ်တှ်ေ ကမၠောန်ဟွံပြေပြံၚ်ဍာံဍာံရ။ အခိၚ်ကသီုဂှ် သ္ၚဳၜၚ်တုဲ စကၠုၚ်လဝ်ရ။ လၟုဟ်တှ်ေ ကသီုလေဝ် ဟွံသေၚ်၊ မၞိဟ်တံလေဝ် ဂွံစဂွံသုၚ်ဂှ် ဒှ်ကၠုၚ်ခက်ခုဲရ” သာ်ဝွံ မၞိဟ်ဇၞော်က္ဍိုပ်စှ်သ္ၚိ ကွာန်အရာပ်ကပေါဝ် ဥုဌေတာန် ဟီုရ။
သဘၚ်ကျာ်ဣသိယဵုဂှ် နူကဵုဂိတုဝှ်ပေၚ် စဵုကဵုပသာ်ပေၚ် ပွိုၚ် (၇) ဂိတုဂှ် ကၠောန်ကၠုၚ်မံၚ်သဘၚ်ကျာ် အရိုဟ်ဟ်သၞာံရောၚ်။
“ပ္ဍဲကဵုအခိၚ်လၟုဟ်ဂှ် ကမၠောန်စုက်ဂှ်ရ ဒးကၠောန်အာမံၚ်၊ ပရေၚ်စသုၚ်ဍေံတံ ညးလဵုလေဝ် ကေတ်လျိုၚ်ဟွံမာန်ပုဟ်။ ညးလ္ၚဵုဂှ် ပရအ်ကဵုသ္ၚုရိုက်ရ။ နကဵုဂကောံတံလေဝ် တ္ၚဲကၠာဂှ် ပရအ်ကဵုလဝ် သ္ၚုမွဲရိုက်၊ ကၠေၚ်မွဲစေဝ်၊ ခၞံကြုက် (ခေါက်ဆွဲ) ၜါဖာ ပရအ်လဝ်ကဵုနွံမံၚ်လေဝ်” သာ်ဝွံ ဂအုပ်ရုၚ် ဂကွေဳစက်တိုန်ဒဵု ဥုဌေဝေန် ဂးရ။
ကွဳစက်တိုန်ဒဵုတံဂှ် နူကဵုဂိတုမာတ် ၂၁ တေံ ကၟာတ်ထောံလဝ်တုဲ ညးဒဳကွဳစက်၊ ညးဗက်ဍုတ်ကွဳစက် ဗၞတ် (၃၀၀) တၠကဵု ဂကောံသ္ၚိကၟိန်ဗဒဗဒဲါမံၚ်ညးတံလေဝ် ခက်ခုဲအာကဵု ပရေၚ်စသုၚ်မံၚ်စံၚ်အိုတ်ရ။
“ပ္ဍဲကဵုဒေသဏံ ရဲကၠုၚ်လ္ၚောဝ်ကျာ်နွံမှ ပရေၚ်ပိုန်ဂြပ်ပြေပြံၚ်ဏောၚ်။ လၟုဟ်ဂှ် ဂဇအ်စမံၚ်အတိုၚ်ဏံရ။ အကာဲအရာ ပရေၚ်သွံရာန် ခက်ခုဲအာမာဟလိုၚ်ယျ။ ညးလ္ၚဵုဂှ် မုကမၠောန်ကၟိတ်လေဝ် ဟွံမွဲပုဟ်” သာ်ဝွံ ရဲသွံဖျာ မိနဲ ဂးရ။
ကွာန်အရာပ်ကပေါဝ် ဇိုၚ်ဒဵုကျာ်ဣသိယဵုဂှ် သ္ၚိကၟိန်နွံမံၚ် (၁၇၀၀) ပြၚ်တုဲ ဗဒမ်ဆေၚ်ဖျာနွံမံၚ် (၂၀၀) ပြၚ်ကဵု ကွဳစက်တိုန်ဒဵု နွံမံၚ် (၁၆၅) ဖ္ဍိုက်ကဵု ညးယဵုသွံဖျာ ဗၞတ် (၆၀၀) တၠ နွံမံၚ်ရောၚ် ဂွံတီကေတ်ရ။
ပ္ဍဲကဵုအခိၚ်ကာလ သဘၚ်ကျာ်ဣသိယဵု ညးကၠုၚ်လ္ၚောဝ်ကျာ် နူကဵုဒေသနာနာဂှ် မွဲတ္ၚဲမ္ဂး ဗၞတ် (၆၀၀၀) တၠကဵု ရဲဍုၚ်သၟာၚ် ဗၞတ် (၂၀၀) တၠ ကၟုဲကၠုၚ်စိုပ်မံၚ်တုဲ မွဲသၞာံမ္ဂး ဗၞတ် (၃၀) ကိုတ်ပေၚ်မံၚ်ရောၚ် ဂွံတီကေတ် နူကဵုဂေါပကကျာ်ဣသိယဵုတံရ။
0 Comments