ပ္ဍဲကဵုအခိၚ်ကာလယဲကပ်ကဝ်ဝေဒ် ကတဵုဒှ်မံၚ်ဏံ ဘာတက္ကသိုလ်ကီု ဘာဗ္တောန်လိက်နာနာတံ ကၟာတ်လဝ် အခိၚ်လအ်လအာဂှ်ရ သၟတ်ဝုတ်၊ ကွးဘာတံ ဗ္တောန်ဇိၚ်စက် ဂၠိုၚ်တိုန်မံၚ်ရောၚ် ဂွံတီကေတ်ရ။
လၟေၚ်ၚ်သၞာံဂှ် ပ္ဍဲကဵုအခိၚ်ဥတုက္ညၚ် မွဲချိုန်ခဏဂှ်ဟေၚ် မၞိဟ်ဗ္တောန်ဇိၚ်စက် ဂၠိုၚ်တိုန်လေပ်ကီုလေဝ် လၟုဟ်ဝွံ သၟတ်ဝုတ်တံကီု ကွးဘာတက္ကသိုလ်တံလေဝ် ကၠုၚ်ဗ္တောန်မံၚ်ရောၚ် အ္စာဇိၚ်စက် မိတု ဟီုလဴထ္ၜးရ။
“ပ္ဍဲကဵုသ္ၚိပိုဲဂှ် မၞိဟ်ကၠုၚ်ဗ္တောန်စက် နွံမံၚ် (၁၀) တၠတှ်ေ ကွးဘာဂှ် ပါမံၚ်ၜိုတ် (၇) တၠလေဝ်။ လ္ၚဵုဂှ် သွဟ်လဝ် (၈) တန် (၉) တန်တံတှ်ေ အခိၚ်ဖါသဝ်တ္ၚဲဂှ် အာတိုန်ကျူယှေန်လေဝ် နွံမံၚ်ရ။ ကွးဘာလ္ၚဵု အာတိုန်မံၚ်တန်ဗ္တောန် တၞဟ်ဟ်တံလေဝ် နွံမံၚ်ကီုလေဝ်” သာ်ဝွံ မိတု ဂးရ။
ပ္ဍဲကဵုအခိၚ်ကၟာတ်မံၚ်ဘာဏံဂှ် ကွတ်ဗ္တောန်သွက်ဂွံဂယျိုၚ်အာလမျီုတံကဵု ကွတ်ပညာဇကုဝါသနာနွံတံ ကတ်ဗ္တောန်အာထေက်ရောၚ် ကွးဘာတက္ကသိုလ် သၞာံတတိယ ရဲဍုၚ်ဇြပ်ဗု မိၚုဝါဝါလေန် ဂးရ။
“အစကၠာဂှ် ညံၚ်ကဵုပံက်ဘာညံၚ်ၚ်တှ်ေ မုလေဝ် ဟွံဒှ်ကၠောန်ပုဟ်။ လၟုဟ်ဂှ် ချိၚ်လဝ်ဗ္တောန်စက်ရ။ တန်ဗ္တောန်ထပက်ယာတ်တောဝ်သဵု (သိုးမွေး) တံလေဝ် ကေၚ်တိုန်မံၚ်ရ။ မုဒှ်ဒှ် ဇကုလေပ်လဝ်တှ်ေ ခိုဟ်ဖအိုတ်ရ” သာ်ဝွံ မိၚုဝါဝါလေန် ဟီုရ။
ဘာတက္ကသိုလ် နာနာတံဂှ် အခိၚ်ယဲကပ်ကဝ်ဝေဒ်လပှ်ပထမ လုပ်ကၠုၚ်လဝ်ဍုၚ်ဗၟာ ဂိတုမာတ်တေံ ကၟာတ်လဝ်ဘာ စဵုကဵုလၟုဟ်ကီု ကွးဘာတန်သ္ဇိုၚ်တံလေဝ် နူကဵုဂိတုဂျူလာၚ် ၂၁ ဂှ် ပံက်ဂွံလဝ်မွဲဂိတုပြၚ်တုဲ ပ္ဍဲကဵုဂိတုအဝ်ဂါတ် (၂၇) ဂှ် ကၟာတ်ထောံစဵုကဵုလၟုဟ်ရောၚ် ဂွံတီကေတ်ရ။
0 Comments