ပ္ဍဲကဵု စၟတ်တ္ၚဲ ၁၅ ဂိတုဒဳဇြေမ်ဗာဂှ် နူကဵုအကံက် ကဵုလဝ်ယၟု “သီရိ” ဂှ် ချူပတိုန်တြးပတိတ်မံၚ် ပရိုၚ် ဗၠေတ်တ် မွဲပိုတ်ဂှ် သ္ဂောံဆဵုကေတ်ရ။
ပ္ဍဲကဵုပရိုၚ်ဂှ် “ဒပ်ပၞာန်တအ် ဒက်ပတန်လဝ် အလဵုအသဳမၚ်သ္ၚိ (အိမ်စောၚ့်အစိုးရ) ယျဏောၚ်” သာ်ဝွံ ချူပတိုန် လဝ်ရ။ ပရိုၚ်ဝွံ ဒဒှ်ရ ဒပ်ပၞာန် (အလဵုအသဳ) တံ ဒပတန်လဝ် အလဵုအသဳမၚ်သ္ၚိ ဟီုဂှ် ပ္ဍဲကဵုမုက်လိက် ဒပ်ပၞာန်ဂှ် လေဝ် ဟီုဂးလဝ်ဟွံမွဲရောၚ်၊ အကံက် “သီရိ” ဏံဂှ် ဒှ်ဒၟံၚ်အကံက်ယၟုဒမၠုက် (ဓလုက်) ပ္တောံမွဲတုဲ ဗက်ချူပ္တိုန်ဒၟံၚ် ပရိုၚ်ပ္တောံကီု၊ ပရိုၚ်ပရူပရာဒပ်ပၞာန်ပရေံကီုဂှ် နူကဵုကဏ္ဍ “ဒး – ဟွံဒး တုဲ ချပ်” ပိုယ်တအ် ဂၠိုက်ဂၠဲါ စၟဳစၟတ်လဝ်ရ။
ပရိုၚ်ဝွံ မုဟိုတ် ဒှ်ပရိုၚ်ဟွံဍာံ၊ ပရိုၚ်ဗၠေတ်ဗၠေတ်မွဲပိုတ်ရောၚ် ဟီုမာန်ဂှ် –
• နူကဵုမုက်လိက် facebook Page – website ဒပ်ပၞာန် (အလဵုအသဳ) ကီု၊ မုက်လိက်ပရိုၚ် နူရုၚ်သမ္မတကီု၊ မုက်လိက်ဌာနဝန် ဇၞော်နာနာကီု လလောၚ်ချူဓမံက်ထ္ၜးလဝ်ဟွံမွဲကီု။
• ဒဒှ်ရ ဒပ်ပၞာန် (အလဵုအသဳ) တံ ဒက်ပတန်ဒၟံၚ် အလဵုအသဳမၚ်သ္ၚိ (အိမ်စောၚ့်အစိုးရ) ရရောၚ်ဂှ် ဌာန်ပရိုၚ် အလဵုလေဝ် ချူဓမံက်ထ္ၜးလဝ်ဟွံမွဲကီု။
ဒုၚ်သ္ဇိုၚ်လတူတၚ်နၚ်လတူတေံတုဲ ပရိုၚ်ဝွံ ဒှ်ပရိုၚ်ဟွံဍာံပြ၊ ဒှ်ပရိုၚ်ဗၠေတ်ဗၠေတ်မွဲရောၚ်ဂှ် စှ်ေစိုတ်သ္ပဒတန်မာန်ရ။
ပရိုၚ်ပတောံ၊ ပရိုၚ်ဗၠေတ်ဗၠေတ်၊ ပရိုၚ်လီ-ပရိုၚ်ဠာန် ဂမၠိုၚ်ဝွံ နူကၠာပေဲါရုဲမာဲတေံကီု၊ ပေဲါရုဲမာဲတုဲဂှ်ကီု ဂကောံလ္ၚဵု-ပူ ဂဵုလ္ၚဵု သိုၚ်ခၞံဖန်ဗဒှ်လဝ် မုက်လိက် facebook Page ကီု၊ ဒက်ပတန်လဝ် မုက်လိက် website ဗီုပြၚ်ဌာန်ပရိုၚ်တုဲ ချူပတိုန်ဒၟံၚ် စပ်ကဵုပရိုၚ်ဟွံဍာံပြ၊ ပရိုၚ်ဗၠေတ်ဗၠေတ်တံဂှ် အိုတ်ရ။
ပူရိသာဒ် ဗဵုကလၚ်-ဗှ်ဒၟံၚ်မုက်လိက်ပရိုၚ်၊ ဌာန်ပရိုၚ်နာနာတံလေဝ် ဇၟာပ်ဆဵု မုက်လိက် facebook Page,website တံ ချူပတိုန် လဝ်တၚ် နၚ် ပရိုၚ်ဂှ် တမ်ရိုဟ်ပရိုၚ်ကၠုၚ်နူအလဵု၊ မုက်လိက်ဂှ် မုက်လိက်ဂကူအလဵု၊ မုက်လိက်မုမု အခါတ်အကာဲကၠာတုဲ၊ လတူ တၚ်နၚ်ပရိုၚ်ဂှ် ပရိုၚ်ဍာံပြ (ဝါ) ပရိုၚ်ဗၠေတ်ဗၠေတ်မွဲရောၚ် ဖျေံစိုတ်ညိဂှ် မိက်ဂွံဗ္တိုက် ဖၟောဝ်ရ။
