ဌာန်ပရိုၚ်မန်၊ ဂိတုဂျာန္နဝါရဳ ၁၆၊ ၂၀၂၁

ပ္ဍဲသၞာံ (၂၀၂၁) ဂိတုဂျာန္နဝါရဳ၊ စၟတ်တ္ၚဲ (၁၅)၊ ၜိုတ်အခိၚ်သဝ်တ္ၚဲဂှ် ရပ်ဂွံဂဥုဲၜူမာဲ ပ္ဍဲသ္ၚိမွဲမ၊ မၞုံပ္ဍဲကွာန်သာယာ၊ ဂအုံကွာန်တၞံကၞေၚ်ဂှ်ရောၚ် ဂွံတီကေတ်လဝ် နူကဵုရုၚ်ဗၠာဲသၟိၚ် တိဍာ်ဍုၚ်လမိုၚ်ရ။
“ဂွံပရိုၚ်တုဲ အခိၚ်လုပ်ဂၠဲါ ပ္ဍဲသ္ၚိဂှ်တှေ် ရပ်ဂွံ ဂဥုဲၜူမာဲ (၆၅) မ ကဵု သီုမၞိဟ် (၂) တၠရ။ အတိုၚ်သၞောဝ်ဂှ် ပိုယ်တအ် ပံက်လဝ်ဂဗုတ်ရ” သာ်ဝွံ သ္ကိုပ်ဗၠာဲသၟိၚ်တိဍာ်လမိုၚ် ညာဏ်လေန် ဟီုရ။
ပ္ဍဲသ္ၚိ မိၝောံ အာယုက် (၅၅) သၞာံ ပ္ဍဲကွာန်သာယာဂှ်ဝွံ ဗၠာဲသၟိၚ်တံ ရပ်ဂွံဂဥုဲမာဲ (၆၅) မ ပ္ဍဲဇရေၚ်ဗဵုဗဵု (က) ဂျဝ်ဗဵုဗဵုထောန် အာယုက် (၃၉) သၞာံ ဒၟံၚ်ကွာန်တၟံကၞေၚ် ကရောံတၠသ္ၚိဂှ်ရောၚ် ဂွံတီကေတ်လဝ်ရ။
မၞိဟ်ဇၞော်အရာပ်အံၚ်မၚ်္ဂလာ နာဲဗမေန်ဟီုလဝ်ဂှ် “မၞိဟ်တြးမံၚ်ဂဥုဲဇေတ်တ် တံရိုဟ်ဒေၚ်ဇၞော်ဇၞော်တအ်ဂှ် မိက်ဂွံကဵုရပ်၊ အခိၚ်ကၠာတေံတှေ် မၞိဟ်လှုဲနွံဂၠိုၚ်ၚ်မှ ရာန်သုၚ်စောဲမာန်၊ အခိၚ်လၟုဟ်ဟီုတှေ် နကဵုလှုဲ (၃၊ ၄) လ္ၚီဂှ် ရာန်သုၚ်စောဲမာန်မံၚ်ယျ၊ လၟုဟ်ဟီုဂှ် တၞးဘိၚ်ဂှ်တှေ် ဒှ်မံၚ်အခိုက်ကၞာမွဲယျ၊ ဇြိုၚ်စိုတ်ကွေံကွေံရ” သာ်ဝွံ ဂးရ။
ဆေၚ်စပ်ကဵုပရေၚ်ဒဒှ်ဏံတုဲ ကုမၞိဟ်ၜါတၠ ရပ်လဝ်ဂှ် ရုၚ်ဗၠာဲသၟိၚ်တိဍာ်လမိုၚ်တအ် ပံက်လဝ်ဂဗုတ် နကဵုၝောံပိုဒ် မယ(ပ)၃/၂၀၂၁ ကေုာံ စပ်ကဵုဂဥုဲၜူမာဲပြံၚ်သၠာဲစိုတ် ၝောံပိုဒ် ၁၉(က)/၂၁ ဂှ်ရောၚ် ဂွံတီကေတ်လဝ်ရ။