Category: ဂဥုဲၜူမာဲ

ဌာန်ပရိုၚ်မန်၊ ဂိတုဂျာန္နဝါရဳ ၂၆၊ ၂၀၂၁

သၞာံ (၂၀၂၁)၊ ဂိတုဂျာန္နဝါရဳ စၟတ်တ္ၚဲ (၂၃) အခိၚ်ဗ္တံဂှ် ရပ်ဂွံဂဥုဲၜူမာဲ နူသၟတ်အာယုက်ဟွံပေၚ်ၜါတၠ (သၟဝ်၁၈သၞာံ) ပ္ဍဲပွိုၚ်ဍုၚ်ဇြပ်ဗု ကွာန်ဝၚ်ရာဲဂှ် နွံဒၟံၚ်ရောၚ် ဂွံတီကေဝ်လဝ် နူရုၚ်ဗၠာဲသၟိၚ် လ္တူဍုၚ်ဇြပ်ဗုရ။

“အခိၚ်ပိုယ်တအ် ဂေတ်မံၚ်ကၚ် ဗက်ဂၠဲါမံၚ် ပရိုၚ်ဂဥုဲၜူမာဲဂှ် စၟဳစၟတ်ရံၚ် ကွဳလို်န်ဓာတ်သၟတ်ၜါတၠတုဲ ရပ်ဂွံဂဥုဲၜူမာဲ (၄၈) မရ။ အတိုၚ်သၞောဝ်ဂှ် ပိုယ်တအ် ပံက်လဝ်ဂဗုတ်ရ” သာ်ဝွံ ဒုဂအုပ်ဗၠာဲသၟိၚ်ဍုၚ်ဇြပ်ဗု ဂျဝ်နာၚ် ဟီုရ။

အခိၚ်ဗၠာဲသၟိၚ်ဂမၠိုၚ်တအ် ဂေတ်ဒၟံၚ်ကၚ် ပ္ဍဲပွဳပွူဒဒန်ဝၚ်ရာဲဂှ်ဝွံ နူဇရေၚ်သၟတ်အာယုက် (၁၇) သၞာံကဵု (၁၆) သၞာံ ဒၟံၚ်အရာပ်ဟံသာဝတဳ ဍုၚ်ဇြပ်ဗုဂှ် ရပ်ဂွံဂဥုဲၜူမာဲ (၄၈) မရောၚ် ဂွံတီကေတ်ရ။

ဂအုပ်ဘာတန်သၠုၚ်ဍုၚ်ဇြပ်ဗု ဒေံါဇူမွဲတၠဂှ် “ပရေၚ်ရပ်စပ်ဂဥုဲၜူမာဲဏံဂှ် ဒှ်ပရေၚ်စဵုဒၞာပိုယ်မၞိဟ်တအ် နူဘဲအန္တရာယ်ဂဥုဲၜူမာဲရ၊ ကမၠောန်ဒးဒးမွဲရ၊ ကောန်ဍုၚ်ကွာန်တအ်လေဝ် ဒးပံၚ်ကၠောန်အာမွဲစွံထေက်ရ၊ နူကဵုအန္တရာယ်ဂဥုဲၜူမာဲဏံဂှ် ဗၠာဲသၟိၚ်ကဵု ကောန်ဍုၚ်ကွာန်တအ် တံၚ်တဲညးသ္ကအ်တုဲ ပံၚ်ကၠောန်အာတှေ် ခိုဟ်ဏောၚ်” သာ်ဝွံ ညးဟီုရ။

လ္တူသၟတ်တြုံဍောတ်ၜါတၠဏံဂှ် ဗၠာဲသၟိၚ်လ္တူဍုၚ်ဇြပ်ဗုတအ် ပံက်လဝ်ဂဗုတ် နကဵုၝောံပိုဒ် ၁၉(က)/၂၂ ဂဥုဲပြံၚ်သၠာဲစိုတ် မယ(ပ)၈/၂၀၂၁ နွံဒၟံၚ်ရောၚ် ဂွံတီကေတ်ရ။

တုပ်တဴသာ်ဝွံကီု ပ္ဍဲသၞာံ (၂၀၂၁)၊ ဂိတုဂျာန္နဝါရဳ စၟတ်တ္ၚဲ (၂၃) အခိၚ်တ္ၚဲသဝ်ဂှ် ရပ်ဂွံဂဥုဲၜူမာဲ (၉၆) မ၊ ဇရေၚ်မၞိဟ်တြုံမွဲတၠ ဒၟံၚ်အရာပ်(ထိန်ကုန်း)၊ ပ္ဍဲအရာပ်ၝောံဍုၚ် (၄) ဍုၚ်မုဟ်ဍုၚ်ဂှ်ကီု၊ ဂိတုဂျာန္နဝါရဳ စၟတ်တ္ၚဲ (၁၉) အခိၚ်ၜိုတ်လဒေါဝ်တ္ၚဲဂှ်ဝွံ နူကဵုဇရေၚ်သၟတ်တြုံမွဲတၠ ဒဳကၠုၚ်ကွဳလိုန်ဓာတ် ပ္ဍဲလ္တူဂၠံၚ်ကွဳစက် ၜါသွာၚ်-ကြေဝ်ဏာ ပွိုၚ်ဍုၚ်ကျာ်မြဟ် ပ္ဍဲကဵုပါၚ်ကွာန်ခဒုၚ်ဟစေပ်ဂှ် ရပ်ဂွံဂဥုဲၜူမာဲ မလိက် WY ဂှ် (၂၇၅) မကဵု ICE (၀.၄) ဂရာန် နွံဒၟံၚ်ရောၚ် ဓမံက်ထ္ၜးလဝ် ပ္ဍဲပရိုၚ်တုဲရ။

ဌာန်ပရိုၚ်မန်၊ ဂိတုဂျာန္နဝါရဳ ၂၄၊ ၂၀၂၁

ပ္ဍဲသၞာံ (၂၀၂၁)၊ ဂိတုဂျာန္နဝါရဳ စၟတ်တ္ၚဲ (၂၃) အခိၚ်တ္ၚဲသဝ်ဂှ်ဝွံ ပ္ဍဲကဵုဇရေၚ်မၞိဟ်တြုံမွဲတၠ အဃောကွာ်ကၠုၚ် အပ္ဍဲကၠအ်ထ္ၜိုတ်အလဵုအသဳ၊ အရာပ်(ထိန်ကုန်း)၊ ၝောံဍုၚ် (၄) ဍုၚ်မုဟ်ဍုၚ်ဂှ် ရပ်ဂွံဂဥုဲၜူမာဲ နွံဒၟံၚ်ရောၚ် သ္ကိုပ်ဗၠာဲသၟိၚ်ၝောံဍုၚ်မုဟ်ဍုၚ် အံၚ်မျိုဝ်ထောန် ဟီုရ။
“နကဵုပိုယ်တအ်ဏောၚ်တှေ် ပရိုၚ်ဂဥုဲၜူမာဲတအ်ဂှ် ဗက်ဒုၚ်မံၚ်သၟူ ဗက်ဂၠိုက်ဂၠဲါမံၚ်ရ၊ ဂဗုတ်ဏံဂှ် ဒပ်ပိုယ်ဂွံပရိုၚ်တုဲ အခိၚ်ဂေတ်မံၚ်ကၚ်ဂှ် ရပ်ဂွံရ၊ ရပ်ဂွံ ၉၆ မ၊ ပိုယ်တအ် ဆက်ရပ်စပ်အာပၠန်ဏောၚ်” သာ်ဝွံ ညးဆက်ဟီုလဝ်ရ။
အဃောဂကောံဒပ်ဗၠာဲသၟိၚ်တအ် ဂေတ်ကၚ် အရာပ် (ထိန်ကုန်း) ဂှ် ဂျဝ်ဇြေန်ဒူ အာယုက် (၃၂) သၞာံ ကွာ်ကၠုၚ်နူကၠအ်ထ္ၜိုတ်တုဲ အခိၚ်စၟဳစၟတ်ရံၚ်ဂှ် ရပ်ဂွံဂဥုဲၜူမာဲ နကဵုမလိက် WY ပါ အရံၚ်သာ်ပ္ကဴ (၉၆) မရောၚ် ဂွံတီကေတ်လဝ်ရ။
“ပရေၚ်ရပ်စပ်ဂှ် ဂၠိုၚ်တိုန်(ကၠေတ်တိုန်)ရ၊ မိပ်စိုတ်၊ ရပ်ဂွံဂၠိုၚ်ၚ်ခ္ဍၚ် ခိုဟ်ခ္ဍၚ်ရ၊ ဟိုတ်နူကဵု ဂဥုဲၜူမာဲတုဲ အနာဂတ်သၟတ်တအ်လေဝ် ဂၠံၚ်ဍာန်ကၠေံကၠုၚ်မံၚ်ယျ၊ အဓိက ဒၚ်ဇၞော်ဇၞော်တအ် ညံၚ်ဂွံရပ်စပ် ဓမံက်ပ္တိတ်ဂၠိုၚ်ၚ်မာန်ညိဂှ် မိက်ဂွံဟီုရ” သာ်ဝွံ ကိုဝ်လောန်မံၚ် ကောန်ဍုၚ်မုဟ်ဍုၚ်ဂှ် ဟီုရ။
ဆေၚ်စပ်ကဵုပရူဒဒှ်ဏံတုဲ ဂျဝ်ဇြေန်ဒူဂှ် ဒးဒုၚ်ပံက်လဝ်ဂဗုတ် ပ္ဍဲရုၚ်ဗၠာဲသၟိၚ်လ္တူဍုၚ်မုဟ်ဍုၚ် နကဵုဂဗုတ် မယ(ပ) ၆/၂၀၂၁ ဂဥုဲပြံၚ်သၠာဲစိုတ် နကဵုၝောံပိုဒ် ၁၉(က) ဂှ်ရောၚ် ဂွံတီကေတ်လဝ်ရ။

ဌာန်ပရိုၚ်မန်၊ ဂျာန္နဝါရဳ ၂၃၊ ၂၀၂၁

သၞာံ (၂၀၂၁)၊ ဂိတုဂျာန္နဝါရဳ စၟတ်တ္ၚဲ (၂၃) အခိၚ်ဗဂါပ်ဂယးဂှ်ဝွံ အဃောစၟဳစၟတ် ကွဳစက်ၜါမ ပ္ဍဲဍုၚ်မတ်မလီု လ္ပါ်ဂၠံၚ်ဇိုၚ်ၜဳဂှ် ရပ်ဂွံဂဥုဲၜူမာဲ နကဵုမလိက် WY ပါ (၆) ကိုဋ်မပြၚ် နွံဒၟံၚ်ရောၚ် ဂွံတီကေတ်လဝ် နူကဵုရုၚ်ဗၠာဲသၟိၚ် လ္တူဍုၚ်မတ်မလီုရ။
“ရပ်ဂှ်တှေ် ဒပ်(ဂကောံ)တွဵုရးတအ် ရပ်လဝ်ရ၊ ရပ်ဂွံ မၞိဟ်ပန်တၠကဵု ကွဳစက်ၜါဖ္ဍိုက်၊ လၟိဟ်ဂဥုဲၜူမာဲ (၆) ကိုဋ်မပြၚ်ရ။ ရပ်စပ်အာ အတိုၚ်သၞောဝ်ရောၚ်” သာ်ဝွံ သ္ကိုပ်ဗၠာဲသၟိၚ် ၝောံဍုၚ်မတ်မလီု ညောအ်လှာၚ် ဟီုရ။
အံၚ်ထောန်ဝေန် (က) တာကဝ် အာယုက် (၄၀) သၞာံ ဒၟံၚ်ဍုၚ်(တောၚ်ကြီး) ဒဳကၠုၚ်လဝ် နကဵုဂကူကွဳစက် Hilux Surf ဂှ်ကဵု အာမၚ် အာယုက် (၂၈) သၞာံ ဒၟံၚ်ဍုၚ်(တောၚ်ကြီး) ဗက်ကၠုၚ်မွဲကရောံတုဲ အံၚ်ဝေန် အာယုက် (၂၁) သၞာံ ဒၟံၚ်ဍုၚ်လာယှိုဝ် ဒဳကၠုၚ်လဝ်ကွဳစက် နကဵုဂကူ TOYOTA HILUX VIGO ဂှ် မိသဵုသဵုခိုၚ် ဇာတိဍုၚ်ရေဝ်ဂှ်လေဝ် ဍိုက်ဗက်ကၠုၚ်လဝ် မွဲကရောံကီုတုဲ ဂကောံဒပ်ဗတိုက်သရိုဟ် ဂဥုဲၜူမာဲ တွဵုရးကဵု ဂကောံဒပ်ဂဥုဲၜူမာဲ စၟတ်(၃၈) တအ် အခိၚ်စၟဳစၟတ်ဂၠိုက်ဂၠဲါဂှ်မ္ဂး ရပ်ဂွံဂဥုဲၜူမာဲ လၟိဟ် (၆၀၄၅၀၀) မ ပ္ဍဲကဵုအရာပ် (စစ်ကဲကုန်း)၊ ဂၠံၚ်ဇိုၚ်ၜဳ၊ ကြပ်ဒၞဲါသွံရာန်ဒၟံၚ် ကွဳစက်ဂှ်ရောၚ် ဂွံတီကေတ်လဝ်ရ။
ကောန်ဍုၚ်မတ်မလီု နာဲမျေအ်သဵုဂှ် “ဟိုတ်နူကဵု ဗၠာဲသၟိၚ်တအ် ရပ်ဂွံဗွဲမဂတာပ်အခိၚ်ဂှ်ရ သွက်တွဵုရးတှေ် ခိုဟ်ကွေံကွေံရ၊ မိပ်လေဝ် မိပ်စိုတ်၊ ယဝ်ခါရ ဗွဲမဂတာပ်အခိၚ်ဂှ် တာဒၞါဟွံမာန်ပုဟ်တှေ် အလုံတွဵုရးမွဲဂှ် ပြးတိတ်အာဏောၚ်ဟီုတှေ် ဒးဒှ်ဓဝိၚ်ကွေံကွေံရ၊ ဆဂး ပ္ဍဲကဵုရပ်ဂွံလဝ်ဂှ် နူကဵုကောန်ဍုၚ်ရေဝ် ပါမွဲတၠဏောၚ်တှေ် သွက်တွဵုရးဍုၚ်မန်ဂှ် ဒှ်ဓဝိၚ်ကီုရ” သာ်ဝွံ ဂးရ။
စပ်ကဵုပရူဒဒှ်ဏံတုဲ လ္တူမၞိဟ်ပန်တၠဂှ် ပံက်လဝ်ဂဗုတ် ပ္ဍဲရုၚ်ဗၠာဲသၟိၚ် လ္တူဍုၚ်မတ်မလီု နကဵုဂဗုတ် မယ(ပ)/၃/၂၀၂၁ ဂဥုဲပြံၚ်သၠာဲစိုတ် နကဵုၝောံပိုဒ် ၁၉(က)/၂၀(က)၂၁ နွံဒၟံၚ်ရောၚ် ဂွံတီကေတ်လဝ်ရ။
ဂဗုတ်သာ်ဏံဂှ်ဝွံ လောန်ကၠုၚ်သၞာံ (၂၀၂၀) ဂိတုဒဳဇြေမ်ဗာ စၟတ်တ္ၚဲ (၂၈) ပ္ဍဲဂတမုက်ဆေၚ်ကၠေၚ်အပါဆာန် ကွာန်မှိၚ်ကနိၚ်၊ ပွိုၚ်ဍုၚ်မုဟ်ဍုၚ်ဂှ် ရပ်ဂွံဂဥုဲၜူမာဲ မွဲကိုဋ်မပြၚ် နူမၞိဟ်ထပှ်တၠ သီုကွဳစက်ၜါဖ္ဍိုက်ကဵု လွဟ်ပိဇကိုအ် ကေုာံ ပ္ဍဲဂိတုဂျာန္နဝါရဳ စၟတ်တ္ၚဲ (၁) လ္တူဍုၚ်မတ်မလီုဂှ်လေဝ် ရပ်ဂွံဂဥုဲၜူမာဲ ၜိုတ်မွဲကိုဋ်မ နူမၞိဟ်ပန်တၠ သီုကဵုကွဳစက်ၜါဖ္ဍိုက် နွံဒၟံၚ်ရောၚ် ဓမံက်ထ္ၜးလဝ် ပ္ဍဲပရိုၚ်တုဲတုဲရ။

ဌာန်ပရိုၚ်မန်၊ ဂိတုဂျာန္နဝါရဳ ၂၁၊ ၂၀၂၁

ပ္ဍဲကဵုသၟတ်တြုံၜါတၠ ဒဳကၠုၚ်ကွဳလိုန်ဓာတ် လ္တူဂၠံက်ကွဳစက် ဂလာဂေါန်ဒေၚ် – အၜေတ် (ခလယ်တံခွန်တိုၚ် – အဘစ်ကားလမ်း) မဆက်စၠောံလဝ် ပွိုၚ်ဍုၚ်မုဟ်ဍုၚ် ကေုာံ ပွိုၚ်ဍုၚ်လှာဒကှ်၊ ပ္ဍဲဂိတုဂျာန္နဝါရဳ (၂၁)၊ သၞာံ (၂၀၂၁)၊ အခိၚ်သဝ်တ္ၚဲဂှ် ရပ်ဂွံဂဥုဲၜူမာဲဂမၠိုၚ်ရောၚ် ဂွံတီကေတ် နူကဵုရုၚ်ဗၠာဲသၟိၚ် တိဍာ်ကၟာဝက်ရ။
“အခိၚ်စၟဳစၟတ်ကွဳလိုန်ဓာတ်ဂှ်တှေ် နူကဵုသၟတ်တြုံဍောတ်ဍောတ်ၜါတၠဂှ် ရပ်ဂွံဂဥုဲၜူမာဲ (၂၁၅) မရ၊ ဍေံတအ်ဂှ် ကောန်ဍုၚ်ဇြပ်ဗုရ၊ နကဵုပိုယ်တအ်တှေ် ပရိုၚ်ဂဥုဲၜူမာဲၜိုတ်ဂွံမာန်ဂှ် ဗက်ထံၚ်ပရိုၚ်တုဲ ဗက်ရပ်အာဏောၚ်” သာ်ဝွံ သ္ကိုပ်ရုၚ်ဗၠာဲသၟိၚ်ကၟာဝက် ဂျဝ်မျေအ်နာၚ် ဟီုရ။
ပ္ဍဲကဵုအာလူ အာယုက် (၁၈) သၞာံ၊ အလေန် အာယုက် (၂၂) သၞာံ ဒၟံၚ်အရာပ်ဖံၚ်စိၚ်၊ ဍုၚ်ဇြပ်ဗုဂှ်ဝွံ အခိၚ်ဗၠာဲသၟိၚ်တအ် စၟဳစၟတ်ရံၚ်ဂှ် ဂၠဲါဆဵုစုတ် ဂဥုဲၜူမာဲ နကဵုမလိက် WY ပါ (၂၁၅) မတုဲ ဗၠာဲသၟိၚ်တအ် ရပ်စပ်ထိၚ်ဒဝ်လဝ်ရောၚ် ဂွံတီကေတ်ရ။
ဗွဲတၟေၚ်မ္ဂး ဂၠံၚ်ကွဳစက် ဂလာတဂေါန်ဒေၚ် – အၜေတ် မဆက်စၠောံလဝ် တွဵုရးဍုၚ်မန်ကဵု တွဵုရးကရေၚ်ဂှ်ဝွံ ဒှ်ဂၠံၚ်အဓိက ဆက်စၠောံဖ္ဍိုက်ဒၟံၚ် ဂဥုဲၜူမာဲဂမၠိုၚ်တုဲ တၞးဘိၚ်ကီု ဂဥုဲၜူမာဲ WY တအ်ကီု ရပ်ဂွံမံၚ် မွဲနှေံမွဲနှေံရ။
ညးအုပ်ဓုပ် အရာပ်ဖံၚ်စိၚ် နာဲအာဲမန်ဂှ် “ဂဥုဲၜူမာဲဂှ် သုၚ်စောဲဏောၚ် သွံရာန်ဏောၚ်တှေ် ဒးဒုၚ်ရပ်ဏောၚ်ဟီုဂှ် ဇၟာပ်မိမတအ်၊ ဇၟာပ်မၞိဟ်သုၚ်စောဲတအ် တီမံၚ်ဖအိုတ်ရ၊ နကဵုမိမတအ်လေဝ် ကောန်ဇကုတအ်ဂှ် ဒးထိၚ်ထေက်ရ၊ ပ္ဍဲကဵုအရာပ်ပိုယ်ဂှ်တှေ် ဇၟာပ်ဟီုတွံဂှ် ဟီုစုတ်မံၚ် ပရူဂဥုဲၜူမာဲတွဵုရ၊ ယဝ်ရ ဒးဒုၚ်ရပ်ကဵု ဂဗုတ်ဂဥုဲၜူမာဲဏောၚ်တှေ် လ္ပကၠုၚ်အာတ်အရီုဗၚ်ညိ၊ ဟွံဗက်ကဵုပုဟ်၊ ညံၚ်ဂွံထိၚ်ဒဝ် ကောန်ဇာတ်ဇကုဇကုဂှ် ဟီုမံၚ်တွဵုရ” သာ်ဝွံ ညးဟီုရ။
အာလူကဵု အလေန် ညးမဒုၚ်ရပ်စပ်လဝ် (၂) တၠဂှ် နူကဵုရုၚ်ဗၠာဲသၟိၚ် တိဍာ်ကၟာဝက်တံ ပံက်လဝ်ဂဗုတ် နကဵုၝောံပိုဒ် ၁၉ (က)/၂၁ ဂဥုဲၜူမာဲပြံၚ်လှာဲစိုတ် မယ(ပ)၅/၂၀၂၁ ဂှ်ရောၚ် ဂွံတီကေတ်လဝ်ရ။
တုပ်သာ်ဂှ်ကီု ပ္ဍဲကဵုကွာန်ကၠအ်သတ်၊ ပွိုၚ်ဍုၚ်မုဟ်ဍုၚ်ဂှ်လေဝ် ရပ်ဂွံတၞးဘိၚ် (၆) ရိုက်ဇၞော်ပဳနာန်ကီု၊ နူဇရေၚ်သၟတ်ဍောတ်ဍောတ် (၃) တၠဂှ် ဂဥုဲၜူမာဲ (၃၇၀၀) မကီု ပ္ဍဲကဵုဂိတုဏံ ရပ်စပ်ဂွံလဝ် နွံဒၟံၚ်ရ။

ဌာန်ပရိုၚ်မန် (ဂိတုဂျာန္နဝါရဳ ၂၀၊ ၂၀၂၁)

ပ္ဍဲသၞာံ (၂၀၂၁) ဂိတုဂျာန္နဝါရဳ စၟတ်တ္ၚဲ (၁၉)၊ အခိၚ်လဒေါဝ်တ္ၚဲဂှ်ဝွံ ဇရေၚ်သၟတ်တြုံ ဒဳကၠုၚ်ကွဳလိုန် ဓာတ်မွဲတၠ လ္တူဂၠံၚ်ကွဳစက် ၜါသွာၚ်-ကြေဝ်ဏာ ပွိုၚ်ဍုၚ်ကျာ်မြဟ် ပ္ဍဲကဵုပါၚ်ကွာန်ခဒုၚ်ဂစေပ်ဂှ် ရပ်ဂွံဂဥုဲၜူမာဲ မလိက် WY (၂၇၅) မကဵု ICE (၀.၄) ဂရာန် နွံဒၟံၚ်ရောၚ် ဂွံတီကေတ်လဝ် နူရုၚ်ဗၠာဲသၟိၚ် ၝောံဍုၚ်ကျာ်မြဟ်ရ။
သ္ကိုပ်ဗၠာဲသၟိၚ် ၝောံဍုၚ်ကျာ်မြဟ် ဂျဝ်ဝေန်နာၚ်ဂှ် “ရပ်ဂှ်တှေ် နူကဵုဒပ်ခရိုၚ်တအ် ဂွံလဝ်ပရိုၚ်တုဲ ရပ်ဟဂှ်ရ၊ အဲလေဝ် စိုပ်ကၠုၚ်ရုၚ်ဏံဂှ် ဟွံလအ်ဏီပုဟ်၊ နကဵုအဲတှေ် ဆေၚ်စပ်ကဵု ပရိုၚ်ဂဥုဲၜူမာဲတအ်ဂှ် ဗက်ပကောံ တုဲ ဂ္စါန်ရပ်အာဏောၚ်၊ ဂဥုဲၜူမာဲဏံဂှ် အလုံမွဲဂကူ ကၠေံကၠက်အာမာန်ဏောၚ်၊ လ္ပါ်လဵုရံၚ်ရံၚ် သွက်မၞိဟ်မွဲ မှလေဝ် ဂုဏ်ဖဵုဟွံမွဲပုဟ်၊ ပရိုၚ်ၜိုတ်ဂွံဂှ် ဓမံက်ထ္ၜးတုဲ ရပ်အာဏောၚ်” သာ်ဝွံ ဟီုဂးလဝ်ရ။
ပ္ဍဲကဵုနေထက်လေန် အာယုက် (၂၂) သၞာံ၊ ဒၟံၚ်ကွာန် (ဝါးပျံကုန်း)၊ အရာပ် (ဖပေါၚ်းကွက်သစ်)၊ အဃောဒဳကၠုၚ်ကွဳလိုန်ဓာတ်ဂှ် ဗၠာဲသၟိၚ်တံ စၟဳစၟတ်ရပ်ဂွံဂဥုဲၜူမာဲဂှ်ရ ပံက်လဝ်ဂဗုတ် ပ္ဍဲဗ္ဒိုပ်ဗၠာဲသၟိၚ် ၝောံဍုၚ်ကျာ်မြဟ် နကဵုၝောံပိုဒ် ၁၉(က) ဆေၚ်စပ်ကဵု ဂဥုဲၜူမာဲပြံၚ်လှာဲစိုတ် ကေုာံ မယ(ပ)၂/၂၀၂၁ ဂှ်ရောၚ် ဂွံတီကေတ်လဝ်ရ။
“ရပ်စပ်မံၚ်ဂဥုဲၜူမာဲဗီုတအ်ဏံဂှ် ဗီုလဵုဂွံဟီုတှေ် ခိုဟ်ကွေံရ၊ ဆဂး ညံၚ်ဂွံဆက်ရပ်ကဵုဂၠိုၚ်ၚ်ပၠန်၊ ဂဥုဲၜူမာဲဏံဂှ် ပ္ဍဲကဵုဍုၚ်ကျာ်မြဟ်ပိုယ်ဏံ ရာန်ကေတ်လောဲမံၚ်ဂှ်ရ ဗီုတအ်ဏံဂှ် ဒးဖေက်ကွေံကွေံ၊ နွံဂၠိုၚ်နူဏံဏီဏောၚ်၊ ဂၠံၚ်ဍာန်ဍေံကၠုၚ်ဂှ် ကုတ်ထ္ပိုတ်ကဵုညိ မိက်ဂွံအာတ်မိက်ဏာရ” သာ်ဝွံ မၞိဟ်ဟွံမိက်ဓမံက်ယၟု ညးဒေသဍုၚ်ကျာ်မြဟ်မွဲတၠ ဟီုလဝ်ရ။

ဌာန်ပရိုၚ်မန်၊ ဂိတုဂျာန္နဝါရဳ ၁၉၊ ၂၀၂၁

ပ္ဍဲသၞာံ (၂၀၂၁) ဂိတုဂျာန္နဝါရဳ စၟတ်တ္ၚဲ (၁၈) အခိၚ်တ္ၚဲစေၚ်ဂှ် နူသၟတ်ဍောတ်ဍောတ် (၃) တၠ၊ ဇာတိကွာန်ၝောံလမိုၚ် (ဘေးလမိုၚ်းကျေးရွာ) ဂှ် ရပ်ဂွံဂဥုဲၜူမာဲ ၜိုတ် (၃၇၀၀) မ ပ္ဍဲကဵုပါၚ်ဂၠံၚ်(ဇီးပၚ်)၊ အရာပ်စိၚ်တံၚ်၊ ဍုၚ်ကၟာဝက်၊ ပွိုၚ်ဍုၚ်မုဟ်ဍုၚ်ဂှ် နွံဒၟံၚ်ရောၚ် ဂွံတီကေတ်လဝ် နူရုၚ်ဗၠာဲသၟိၚ် တိဍာ်ကၟာဝက်ရ။
“ဂွံပရိုၚ်တုဲ ဒပ်ပံၚ်ကောံပိုယ် ပံၚ်ကဵုဒပ်ဗတိုက်သရိုဟ် ဂဥုဲၜူမာဲတုဲ ပိုယ်တအ် မၚ်ရပ်မံၚ်ရ၊ နူကဵုသၟတ် (၃) တၠဏံ ရပ်ဂွံဂဥုဲ (၃၇၀၀) မရ၊ ရပ်ဂွံ ကြပ်ဆေၚ်ကၠေၚ် PM ၊ အဃောဍေံတံ ဂဇံဇူဒီုမံၚ် ဒၞဲါဗ္ဒမ်ဇူဒီုဂှ် လုပ်ဂၠိုက်ဂၠဲါတုဲ ရပ်ဂွံရ၊ အတိုၚ်သၞောဝ်ဂှ် ပိုယ်တအ် ပံက်လဝ်ဂဗုတ်ရ” သာ်ဝွံ သ္ကိုပ်ရုၚ်ဗၠာဲသၟိၚ် တိဍာ်ကၟာဝက် ဂျဝ်မျေအ်နာၚ် ဟီုရ။
အံၚ်ကိုဝ်တိတ် အာယုက် (၂၂) သၞာံ၊ ဂျဝ်ရဳ အာယုက် (၂၂) သၞာံကဵု ဖိုဝ်ချေတ် အာယုက် (၁၉) သၞာံ ကုညး (၃) တၠ ဇာတိကွာန်ၝောံလမိုၚ်၊ ပွိုၚ်ရေဝ်သၟဝ်ကျာဂှ် သ္ပဟိုတ်နူကဵုဒှ်သံသယတုဲ စၟဳစၟတ်ဂၠိုက်ဂၠဲါဂှ်ရ ရပ်ဂွံဂဥုဲၜူမာဲရောၚ် ဓမံက်ထ္ၜးလဝ် ပ္ဍဲစရၚ်သမ္တီဗၠာဲသၟိၚ်တအ်ရ။
ဆေၚ်စပ်ကဵုပရူဒဒှ်ဏံတုဲ ကုသၟတ် (၃) တၠဂှ် ရုၚ်ဗၠာဲသၟိၚ် တိဍာ်ကၟာဝက်တံ ကေတ်လဝ်အရေဝ် နကဵုဂဗုတ် ၝောံပိုဒ် ၁၉(က)/၂၁ စပ်ကဵုဂဥုဲၜူမာဲပြံၚ်လှာဲစိုတ် မယ(ပ)၃/၂၀၂၁ ဂှ်ရောၚ် ဂွံတီကေတ်ရ။
အ္စာဘာဒေံါဇူ နူဘာတန်သၠုၚ် ဍုၚ်ကၟာဝက် နာဲမေန်ဂျဝ်ဝေန်ဂှ် “ဟိုတ်နူကဵု ဂဥုဲၜူမာဲတအ်ဏံတုဲ အနာဂတ်သၟတ်တအ်လေဝ် လီုလာ်ကၠုၚ်အိုတ်ယျ၊ စရာဲမၞိဟ်တံလီုတုဲ လအ်ကၠုၚ်တှေ် ဂကူလေဝ် ကၠက်ကၠေံအာမာန်မံၚ်၊ ရပ်ကဵုဂၠိုၚ်ၚ်ညိ၊ အခိၚ်ဘာတန်တအ်ပံက်တှေ် ကေမၠာန်ကဵုပညာတအ် ကၠောန်ကဵုဂၠိုၚ်ၚ်ညိ၊ နကဵုဂကောံအ္စာကၞေဟ်ပိုယ်တအ်လေဝ် သွက်ဂွံကၠောန် ကေမၠာန်ကဵုပညာ ဆေၚ်စပ်ကဵုဂဥုဲၜူမာဲဂှ်လေဝ် စဳဇန်လဝ်ကီုရ” သာ်ဝွံ ညးဟီုရ။
အပ္ဍဲတွဵုရးဍုၚ်မန်ဝွံ မၞိဟ်သွံဒၟံၚ် ဂဥုဲၜူမာဲညိညိညည မွဲတဆံၚ်တံဂှ်ဟေၚ် ရပ်စပ်ဂွံမံၚ်တုဲ ကုမၞိဟ်သွံမံၚ်တဲဇၞော်(ဒေၚ်ဇၞော်)တံဂှ် ရပ်စပ်ဓမံက်ပ္တိတ် ဟွံမာန်ဏီရ။

ဌာန်ပရိုၚ်မန်၊ ဂိတုဂျာန္နဝါရဳ ၁၆၊ ၂၀၂၁

ပ္ဍဲသၞာံ (၂၀၂၁) ဂိတုဂျာန္နဝါရဳ၊ စၟတ်တ္ၚဲ (၁၅)၊ ၜိုတ်အခိၚ်သဝ်တ္ၚဲဂှ် ရပ်ဂွံဂဥုဲၜူမာဲ ပ္ဍဲသ္ၚိမွဲမ၊ မၞုံပ္ဍဲကွာန်သာယာ၊ ဂအုံကွာန်တၞံကၞေၚ်ဂှ်ရောၚ် ဂွံတီကေတ်လဝ် နူကဵုရုၚ်ဗၠာဲသၟိၚ် တိဍာ်ဍုၚ်လမိုၚ်ရ။
“ဂွံပရိုၚ်တုဲ အခိၚ်လုပ်ဂၠဲါ ပ္ဍဲသ္ၚိဂှ်တှေ် ရပ်ဂွံ ဂဥုဲၜူမာဲ (၆၅) မ ကဵု သီုမၞိဟ် (၂) တၠရ။ အတိုၚ်သၞောဝ်ဂှ် ပိုယ်တအ် ပံက်လဝ်ဂဗုတ်ရ” သာ်ဝွံ သ္ကိုပ်ဗၠာဲသၟိၚ်တိဍာ်လမိုၚ် ညာဏ်လေန် ဟီုရ။
ပ္ဍဲသ္ၚိ မိၝောံ အာယုက် (၅၅) သၞာံ ပ္ဍဲကွာန်သာယာဂှ်ဝွံ ဗၠာဲသၟိၚ်တံ ရပ်ဂွံဂဥုဲမာဲ (၆၅) မ ပ္ဍဲဇရေၚ်ဗဵုဗဵု (က) ဂျဝ်ဗဵုဗဵုထောန် အာယုက် (၃၉) သၞာံ ဒၟံၚ်ကွာန်တၟံကၞေၚ် ကရောံတၠသ္ၚိဂှ်ရောၚ် ဂွံတီကေတ်လဝ်ရ။
မၞိဟ်ဇၞော်အရာပ်အံၚ်မၚ်္ဂလာ နာဲဗမေန်ဟီုလဝ်ဂှ် “မၞိဟ်တြးမံၚ်ဂဥုဲဇေတ်တ် တံရိုဟ်ဒေၚ်ဇၞော်ဇၞော်တအ်ဂှ် မိက်ဂွံကဵုရပ်၊ အခိၚ်ကၠာတေံတှေ် မၞိဟ်လှုဲနွံဂၠိုၚ်ၚ်မှ ရာန်သုၚ်စောဲမာန်၊ အခိၚ်လၟုဟ်ဟီုတှေ် နကဵုလှုဲ (၃၊ ၄) လ္ၚီဂှ် ရာန်သုၚ်စောဲမာန်မံၚ်ယျ၊ လၟုဟ်ဟီုဂှ် တၞးဘိၚ်ဂှ်တှေ် ဒှ်မံၚ်အခိုက်ကၞာမွဲယျ၊ ဇြိုၚ်စိုတ်ကွေံကွေံရ” သာ်ဝွံ ဂးရ။
ဆေၚ်စပ်ကဵုပရေၚ်ဒဒှ်ဏံတုဲ ကုမၞိဟ်ၜါတၠ ရပ်လဝ်ဂှ် ရုၚ်ဗၠာဲသၟိၚ်တိဍာ်လမိုၚ်တအ် ပံက်လဝ်ဂဗုတ် နကဵုၝောံပိုဒ် မယ(ပ)၃/၂၀၂၁ ကေုာံ စပ်ကဵုဂဥုဲၜူမာဲပြံၚ်သၠာဲစိုတ် ၝောံပိုဒ် ၁၉(က)/၂၁ ဂှ်ရောၚ် ဂွံတီကေတ်လဝ်ရ။