အခိၚ်ကာလလၟုဟ်ဝွံ ပရိုၚ်တိုန်ဒၟံၚ် လ္တူ Social Media ဗွဲမဂၠိုၚ်တအ်ဂှ် ဒှ်ဒၟံၚ်ကောလဟာလဂၠိုၚ်တုဲ မၞိဟ်ဂမၠိုၚ်တအ်လေဝ် ထေၚ်စပရိုၚ်ဍာံတုဲ ဗက်တြးပ္တိတ်ဒၟံၚ် လ္တူ Social Media မွဲက္ဆံၚ်ဂှ် ဂွံညာတ်ကေတ်ဒၟံၚ်ရ။ လ္တူပရိုၚ်ဂမၠိုၚ်ဂှ် ဒှ်ဒၟံၚ်ပရေၚ်ဟီုဗျုတ်ဗ္ဒေက်ကဵု ဗော်ဍုၚ်မန်တၟိဗွဲဂၠိုၚ်ဂှ်လေဝ် ဂွံဆဵုကေတ်ရ။
ဗီုရုပ်သုၚ်စောဲလဝ် နူကဵု Group “သံဖြူဇရပ်မြို့ သူ/သားများ ဆုံစည်းရာ ရာမညဌာနီ” ဂှ် ပတိုန်လဝ် ဗီုရုပ်ဂှ်မ္ဂး မၞိဟ်တြးပ္တိတ်ကီု၊ မၞိဟ် comment ကီုဂှ် နွံဒၟံၚ် ဗ္ဒဲါ ၅၀ တၠဂှ်လေဝ် ဂွံဆဵုကေတ်ကီုရ။ ဟိုတ်ဒှ်သာ်ဂှ်ရ နူကဵု ကဏ္ဍ ဒး၊ ဟွံဒး တုဲ ချပ် ပိုယ်တအ်ဂှ် ပရိုၚ်ဝွံ ပရိုၚ်ပ္တောံရောၚ် စၟဳစၟတ်လဝ်ရ။
မုဟိုတ်ဂွံဟီု ပရိုၚ်ပ္တောံရောဟီုမ္ဂး ဗီုရုပ်သုၚ်စောဲလဝ်ဂှ် ဒှ်ဒၟံၚ်ဗီုရုပ်တြေံ နူကဵုအခိၚ် ဗော်ဍုၚ်မန်တၟိတအ် ထ္ပက်လဝ်လိက်ကသုက် NCA နူသၞာံ ၂၀၁၈၊ ဂိတု ဖေဖဝ်ဝါရဳ ၁၃ တေံရောၚ်တုဲ အဃောတက်လဝ် ဗီုရုပ်ကဵုဒပ်ပၞာန်ဗၟာဏောၚ်ဂှ် ဂွံတီလဝ် ချိုတ်တ်ပၠိုတ်တ်ကီုရ။ ဟိုတ်ဒှ်သာ်ဂှ်ရ ပရိုၚ်ဏအ်ဝွံ နကဵုတၚ်ရန်တၟံနွံနွံ ချူပတိုန်လဝ်ရောၚ်ဂှ် ဂွံတီကေတ်လဝ်ရ။
အခိၚ်ကာလ အာကာဲအရာပရေၚ်ဍုၚ်ကွာန် ပြံၚ်သၠာဲဒၟံၚ်တအ်ဂှ် ပရိုၚ်ဟွံဍာံတအ်ကီု၊ ပရိုၚ်ဟီုဗျံက်စ ညးမွဲလ္ပါ်ကီုဂှ် ဒှ်ဒၟံၚ်ပရိုၚ်ကောလဟာလတအ်ကီုဂှ် စိုပ်ဂတမုက်ပရိသာတ်တအ် လောဲသွာဒၟံၚ်ရ။ ဟိုတ်ဒှ်သာ်ဂှ်ရ ပရိုၚ်ဟွံဍာံ၊ ပရိုၚ်ဗၠေတ်ဗၠေတ်တအ်ဂှ် ယဝ်ဆဵုညာတ်ဒး လ္တူ facebook တအ်မ္ဂးတှ်ေ လ္ပပတှ်ေပြဟ်ဏီတုဲ ပရိုၚ်ဏံဂှ် ဒးဟာ ဗၠေတ်ဟာဂှ် ယဝ်ဒှ်ဒၟံၚ်သၠေဟ်ပၟာဏောၚ်တှ်ေ ဗဵုကျောဝ်ရံၚ် ပ္ဍဲဌာန်ပရိုၚ်တၞဟ်ဟ်ကီု ဟွံသေၚ်သာ်ဂှ် လ္ၚတ်သၟာန်ဂၠိုက်ဂၠာဲ နူမၞိဟ်ဆက်စပ်တၚ်နၚ်ပရောဂှ်ကီု၊ မၞိဟ်တီစိစောန် ဆက်စပ်ကဵုပရောဂှ်ကီုဂှ် မိက်ဂွံဗတိုက်ဖအောဝ်ဏာရ။
